Москва «Искусство» 1978 6 страница

СЛАВА:

ПСАЛОМ 103
Д(а)в(и)д(ов)ь, о мирстемь сставлени.

1. Бл(а)г(осло)ви д(у)ша моя г(оспод)а. г(оспод)и б(ож)е мои,
вьзвеличился еси зело: во исповедание и вь велелепотоу облечеся,
2. Одеяися светомь яко ризою, пропиная н(е)бо яко кожю.
3. Покрывая водами превыспренняя своя, пологая облакы
в схоженье свое, ходяи на крилоу ветреню:
4. Творяи анг(е)лы своя д(у)хы, и слоугы своя огнь полящь:
5. Основаяи землю на тверди своеи: не преклонится в векы века.
6. Бездна яко риза одеянье ея, на горах станоуть воды:
7. От запрещенья твоего побегноут, от гла(са) грома твоего оустрашатся.
8. Въсходять горы, и нисходять поля, в место еже еси основалъ.
9. Предел положи, егоже не преидоуть, ни обратятся покрыти землю.
10. Посылая источникы во дебрехъ, посреде горъ проидоуть воды.
11. Напояють вся звери селныя, ждоут анагрии в жажю свою.
12. На ты птица н(е)б(ес)ная привитають: от среды каменья дадять глас.
13. Напояя горы от превыспрених своихъ: от плода делъ твоихъ насытится земля.
14. Прозебаии пажити скотомъ, и травоу на слоужбоу ч(е)ловекомъ,
извести хлебъ от земля:
15. И вино веселить с(е)рдце ч(е)л(о)в(е)коу, оумастити лице елеомъ:
и хлеб с(е)рдце ч(е)л(о)в(е)коу оукрепить.
16. Насытятся древа польская, кедры ливаньсти, яже еси насадилъ.
17. Тоу птици вьгнездятся, иродиево жилище обладаеть ими.
18. Горы высокыя еленемь, камень прибежище заецемь.
19. Створилъ еси лоуноу во времена: с(о)лнце позна запод свои.
20. Положилъ еси тмоу, и быс(ть) нощь, в неи проидоуть вси зверие лоужныи:
21. Скымени рикающе исхитити, и испросити от б(ог)а пищю собе.
22. Восия с(о)лнце, и собрашася, и на ложих своихъ лягоуть.
23. Изиидет ч(е)л(о)в(е)къ на дело свое, и на деланье свое до вечера.
24. Яко в[о]звеличишася дела твоя г(оспод)и: вся прем(у)др(о)стью створилъ еси:
исполнися земля твари твоея.
25. Се море великое и пространное: тоу гади, имже нес(ть) числа,
животная малая с великыми.
26. Тоу карабли преплывають, змии сеи, егоже созда роугатися емоу.
27. Вся к тобе чають, дати пищю имъ во бл(а)го время:
28. Давшю тобе имъ, сбероуть: отверзъшю тобе роукоу,
всяческая исполнятся бл(а)гости.
29. Отвьращьшю же тобе лице, вьзмятутся: отимеши д(у)хъ ихъ, и исчезноуть,
и в персть свою вьзратяться:
30. Послеши д(у)хъ свои, сзижются, и обновиши лице земли.
31. Буди слава г(оспо)дня въ векы: возвеселится г(оспо)дь о делехъ своихъ.
32. Призираяи на землю, и творя ю трястися: прикасаяися горамъ, воздымятся.
33. Вспою г(оспо)д(е)ви в животе моемь, пою б(о)гу моему, дондеже есмъ.

34. Да насладится ему беседа моя, азъ же возвеселюся о г(оспо)де.
35. Скончаются грешниц от земля, и беззаконници, яко не быти имъ.
бл(а)г(осло)ви д(у)ше моя г)оспо)да.

СЛАВА, И НЫНЕ: АЛЛИЛУИЯ.

ПСАЛОМ 104
Д(ави)довъ.

1. Исповедаитеся г(оспо)д(е)ви, и призываите имя его:
возвестите въ языцехъ дела его.
2. Вьспоите емоу и поите емоу: поведите вся чюдеса его.
3. Хвалитеся во имя с(вя)тое его: да вьзвеселится с(е)рдце искоущиимъ г(оспод)а.
4. Вьзыщете г(оспод)а, и оутвердитеся, вьзыщете лица его воиноу.
5. Помянете чюдеса его, яже створи, дивеся его, и соудбы оустъ его.
6. Семя авраамле раби его, с(ы)н(о)ве ияковли избраннии его.
7. Тои г(оспод)ь б(ог)ъ нашь: по всеи земли соудбы ег(о).
8. Помяноу в векы заветъ свои, слово, еже заповеда въ тысяща род:
9. Еже завеща авраамоу, и клятвоу свою исакоу:
10. И постави и яковоу в повеление, и изр(аи)лю в заветъ веченъ,
11. Г(лаго)ля: тобе дамъ землю ханааню, иже достояния вашего:
12. Зане беша малымъ числомъ, не мнози пришелци в неи.
13. И преидоша от языка вь языкъ, и от ц(а)р(с)твия в люди ины:
14. Не остави ч(е)л(о)в(е)ка обидети ихъ, и обличи о них ц(а)ря:
15. Не прикасаитеся помазанных моихъ,
и вь пр(о)р(о)цехъ моихъ не лоукавноуите.
16. И призва глад на землю: всяко оутвержение хлебное сотре.
17. Посла пред ними ч(е)л(о)в(е)ка, в рабъ проданъ быс(ть) иосифъ.
18. Смириша въ оковехъ нозе его, железо проиде д(у)шю его:
19. Дондеже прииде слово его, слово г(оспод)не ражеже и.
20. Посла ц(а)рь и разреши и, князя людемъ, и остави и.
21. И постави его господина домоу своемоу, и князя всемоу стяженью своемоу,
22. Научити князя его яко сам ся, и старца его оум(у)дрити.
23. И вниде изр(аи)ль вь египетъ, и яковъ пришельствова в землю хамовоу.
24. И вьзрасти люд(и) своя зело, и оукрепи ихъ паче врагъ ихъ.
25. Преврати с(е)рдце ихъ вьзненавидети люди его, лесть створити в рабехъ его:
26. Посла моисея раба своего, и арона, егоже избра собе.
27. Положи в них словеса знамении своихъ, и чюдесъ своих в земли хамове.
28. Посла тмоу и померче, зане прогневаша словеса его.
29. Преврати воды ихъ въ кров(ь), и измори рыбы ихъ.
30. Вьскыпе земля ихъ жабами въ с[о]кровищех ц(а)реи ихъ.
31. Рече, и приидоша песья моухы, и мушица во вся пределы ихъ.
32. Положи дождь ихъ град, огнь пополяющь в земли ихъ:
33. И изби винограды ихъ, и смокви ихъ, и сотры всяко древо пределъ их.
34. Реч(е), и приидоша проузи и гоусеница, имже не бе числа:
35. И поядоша всякоу травоу в земли ихъ, и поядоша всякъ плод земли ихъ.

36. И оуби всякъ первенець въ земли их, от начатокъ всякого троуда ихъ:
37. И изведе ихъ сребромь и златомъ, и не бе в колене ихъ боляи.
38. Възвеселися египетъ во исхожени ихъ: яко нападе страх ихъ на ня.
39. Распростреть облакъ в покровъ их, и огнь просвети имъ нощию.
40. Просиша и придоша крастели, и хлеба н(е)б(ес)н(а)го насыти я.
41. Разверзе камень, и потекоша воды, потекоша в безводныхъ рекы.
42. Яко помяноу слово с(вя)тое свое, еже къ авраамоу рабоу своемоу:
43. И изведе люди своя в радость, и избранныя своя в веселии.
44. Дас(ть) имъ страны языкъ, и троуд людии наследоваша.
45. Яко да схранять оправдания его, и закона его взыщють.

СЛАВА:

К А Ф И З М А П Я Т Н А Д Ц А Т А Я

ПСАЛОМ 105
Д(а)в(и)д(о)въ.

1. Исповедаитеся г(осподе)ви, яко бл(а)гъ, яко в векы м(и)л(о)сть его.
2. Кто вьз(гла)г(о)леть силы г(оспод)ня, оуслышаны створить вся хвалы его;
3. Бл(а)ж(е)ни хранящеи соуд и творящеи правдоу во всяко время.
4. Помяни насъ, г(оспод)и, въ бл(а)говолении люди твоихъ,
посети нас сп(ас)ениемъ твоимь,
5. Видети въ бл(а)гости избранныя твоя, възвеселитися в веселии языка твоего,
хвалитися с достояньемь твоимь.
6. Согрешихомъ со о(т)ци нашими, безаконовахомъ, неоправдихомъ:
7. О(т)ци наши въ египте не разоумеша чюдесъ твоих, ни помяноуша
оумножения м(и)л(о)сти твоея: и прогеваша вьсходяще в чермьное море.
8. И сп(а)се ихъ имени своего ради, познати силоу свою:
9. И запрети чермьномоу морю, и и[з]сяче: и проведе ихъ по безьдне,
яко по поустыни.
10. И сп(а)се ихъ из роукы ненавидящаг(о), и избави ихъ из роукы врагъ.
11. Покры вода стоужающая имъ: единъ от них не избысть.
12. И вероваша словеси его, и в[о]спеша хвалоу его.
13. Оускориша, забыша дела его, не стерпеша с[о]вета его:
14. И вьсхотеша хотению в поустыни, и искоусиша б(ог)а в безводне.
15. И дас(ть) имъ прошенье ихъ, посла сытость вь д(у)ша ихъ.
16. И прогневаша моисея вь станоу, и аарона с(вя)т(а)го г(оспод)ня.
17. Отверзеся земля и пожре дафана, и покры на сонмищи авирона:
18. И раждежеся огнь вь сонме ихъ, пламень попали грешникы.
19. И створиша телець в хориве, и поклонишася истоуканномоу:
20. И измениша славоу его в подобие телца ядоущаго травоу.
21. И забыша б(ог)а сп(а)сающаго их, створшаго велия вь египте,
22. Чоудеса в земли хамове, страшьная в мори чермьнемь.

23. Рече потребити ихъ, аще не бы моисеи избранныи его сталъ вь
скроушение пред нимь, възъвратити ярость его, да не погоубить ихъ.
24. И оуничижиша землю желанноую, не яша веры словеси его:
25. И поропташа в селехъ своих, не оуслышаша гл(а)са г(оспод)ня.
26. И вьздвиже роукоу свою на ня, низложити ихъ в поустыни,
27. И низложити семя ихъ вь языцехъ, и расточити я вь страны.
28. И причастишася веелфегороу, и снедоша жертвы м(е)ртвыхъ:
29. и прогневаша и в начинаниих своихъ, и оумножися в нихъ падение.
30. И ста фиенесъ, и оугоди, и преста сечь:
31. И вменися емоу правдоу, и в род и род до века.
32. И прогневаша и на воде пререкания, и озлобленъ быс(ть) моисеи ихъ ради:
33. Яко прогневаша д(у)хъ его, и разньствова оустьнама своима.
34. Не потребиша языкы, яже рече г(оспод)ь имъ.
35. И смесишася вь языцехъ, и навыкоша дела ихъ:
36. И работаша истоуканнымь их, и быс(ть) имь въ соблазнъ.
37. И пожроша с(ы)ны своя и дщери своя бесомь,
38. И прольяша кровь неповинноу, кровь с(ы)н(о)въ своихъ и дщерии, яже
пожроша истоуканнымъ ханаоньскымь: и оубиена быс(ть) земля ихъ кровми,
39. И осквернися вь делех ихъ: и любы створиша в начинаньихъ своих.
40. И разгневася яростью г(оспод)ь на люди своя, и омерзе емоу достояние его:
41. И предасть ихъ в роуце врагомъ, и оудолеша имъ ненавидящеи их.
42. И стоужиша имъ врази ихъ: и смиришася под роуками их.
43. Многажды изъбави ихъ: ти же прогневаша и с[о] ветомь своимь,
и смиришася в безакониих своих.
44. И виде г(оспод)ь, егда вьстоужиша [имъ], [егда] оуслыша м(о)л(и)твоу ихъ:
45. И помяноу заветъ свои, и раскаяся по оумножению м(и)л(ос)ти своея:
46. и дас(ть) ихъ в щедроты пред всеми пленшими ихъ.
47. Сп(аси) ны, г(оспод)и б(ож)е нашь, и збери ны от языкъ, исповедатися
имяни твоемоу с(вя)т(о)моу, хвалитися вь хвале твоеи.
48. Б(лаго)сл(о)венъ г(оспод)ь б(ог)ъ изр(аи)л(е)въ от века и до века.
и рекоуть вся люд(и)е: боудеть, боудеть.

СЛ(А)ВА:

ПСАЛОМ 106
Аллилоугия.

1. [И]споведаитеся г(осподе)ви, як бл(а)гъ, яко в векы м(и)л(ос)ть его.
2. Да рекоуть избавлении г(осподне)мь, ихже избави из рокы врага,
3. И от странъ собра ихъ, от въстокъ и запад, и севера и моря:
4. Заблоудиша в поустыни безводне, поути града обителна не обретоша:
5. Алчюще и жажюще, д(у)ша ихъ в них изнеможе.
6. И возваша къ г(оспод)оу, егда въстоужиша, и от бед ихъ избави их:
7. И наведе их на поуть правъ, внити в град обителныи.
8. Да исповедятся г(осподе)ви м(и)л(о)сти его,
и чюдеса его с(ы)н(о)мь ч(е)л(о)в(е)чьскымъ:

9. Яко насытилъ еси д(у)шю тщю, и д(у)шю алчющю исполни бл(а)гъ:
10. Седящая во тме и сети см(е)ртьнеи, окованныя нищетою и железомь,
11. Яко разгневаша словеса б(о)жия, с[о]ветъ вышняго раздражиша.
12. И смирися вь троудехъ с(е)рдце ихъ, изьнемогоша, не бе помогаяи.
13. И возваша ко г(оспод)оу, егда въстоужиша, и от бед ихъ сп(а)се я:
14. И изведе я ис тьмы и сени смертныя, оузы ихъ преторже.
15. Да исповедятся г(осподе)ви м(и)л(ос)ти его,
и чюдеса его с(ы)номъ ч(е)л(о)в(е)чьскымъ:
16. Яко скроуши врата меденая, и верея железныя сломи.
17. Приятъ я от поути безаконии ихъ: безаконии бо ради своихъ смиришася.
18. Всякого брашна вьзгноушася д(у)ша ихъ,
и приближишася до вратъ см(е)ртныхъ.
19. И возваша къ г(оспод)оу, егда вьстоужиша, и от бед ихъ сп(а)се их:
20. Посла слово свое, и и[с]цели ихъ, и избави ихъ от пагоубы их.
21. Да исповедятся г(осподе)ви м(и)л(ос)ти его,
и чюдеса его с(ы)н(о)мь ч(е)л(о)в(е)чьскимъ:
22. И пожрут ему жертвоу хвале, и да поведятъ дела его в радости.
23. Сходящеи в мори в кораблихъ, творяще делания в водахъ многахъ,
24. Тии видеша дела г(оспод)ня и чюдеса его во глубине.
25. Рече, и ста д(у)хъ буренъ, и вознесошася волны его:
26. Восходятъ до н(е)б(е)съ и низходятъ до безднъ: д(у)ша их в злых таяше:
27. Смутишася, подвизашася, яко пияныи, и вся мудрость ихъ поглощена бысть.
28. И возваша ко г(оспод)у, внегда скорбет[и] имъ, и от бедъ их изведе их:
29. И повеле бури, и ста в тишину, и оумолкоша волны его.
30. И возвеселиша я, яко оумолкоша, и настави я в пристанище хотения своего.
31. Да исповедятся г(осподе)ви милости его,
и чюдеса его с(ы)новомъ ч(е)л(ове)ческимъ:
32. Да вознесутъ его в ц(е)ркви людьсте[и], и на седалищи старецъ возхвалятъ его.
33. Положилъ есть реки в пустыню, и исходища водная в жажду,
34. Землю плодоносную въ слатину, от злоб живущих на неи.
35. Положилъ есть пустыню во езера водная, и землю безводную во
исходища водная.
36. И насели ту алчющая, и составиша грады обителны:
37. И насеяша села, и насадиша винограды, и сотвориша плодъ житенъ.
38. И бл(а)гослови ихъ, и оумножишася зело, и скоты ихъ не умали.
39. И оумалишася, и озлобишася от печали золъ и болезни:
40. Излияся оуничижение на княза ихъ,
и облазни ихъ по непроходне, а не по пути.
41. И поможе оубогу от нищеты, и положи яко овца от(е)чествия.
42. Оузря[т] правии и возвеселятся, и всяко безаконие заградит оуста своя.
43. Кто премудръ и сохранитъ сихъ; и разумеютъ милости г(оспод)ня.

СЛАВА:

ПСАЛОМ 107
Песнь, д(а)в(и)д(о)въ.

2. Готово с(е)рдце мое б(о)же, готово с(е)рдце мое: воспою и пою во славе моеи.
3. Востани слава моя, востани, псалтырю и гусли: востану рано.
4. Исповемся тебе в людехъ г(оспод)и, пою тебе во языцехъ.
5. Яко велия верху небесъ милость твоя, и до облакъ истина твоя.
6. Вознесися на н(е)б(е)са б(о)же, и по всеи земли слава твоя.
7. Яко да избавятся возлюбленнии твои, спаси десницею твоею, и оуслыши мя.
8. Б(ог)ъ воз(гла)г(о)ла во с(вя)темъ своемъ: вознесуся и разделю сикиму,
и оудоль селениемъ размерю.
9. Мои есть галаадъ, и мои есть манасии, и ефремъ заступление главы моея:
июда ц(а)рь мои.
10. Моавъ конобь оупования моего, на идумею наложу сапогъ мои:
мне иноплеменницы покоришася.
11. Кто введет мя во градъ обьстояния, или кто наставитъ мя до идумея;
12. Не ты ли б(о)же, отринувыи насъ; и не изыдеши б(о)же, в силах наших.
13. Даждь нам помощ(ь) от печали: и суетно спасение человеку.
14. О б(о)зе сотворим силу, и тои оуничижит враги наша.

ПСАЛОМ 108
В конецъ, д(а)в(и)д(о)въ.

1. Б(о)же, хвалу мою не премолчи:
2. Яко оуста грешнича, и оуста льстиваго на мя отверзошася, г(лаго)л(а)ша
на мя языком льстивым,
3. И словесы ненавистными обыдоша мя, и брашася со мною туне.
4. Вместо лю(б)ве оболгаху мя, аз же м(о)л(и)тву деяхъ:
5. И положиша на мя зла вь бл[а]гая, и ненависть за вьзлюбление мое.
6. Постави нань грешника, и диявол да станеть одесноую его:
7. Внегда соудитися емоу, да изыидеть осоуженъ, и м(о)л(и)тва его
боуди вь грехъ.
8. Да боудоуть дние его мали, и еп(иско)пъство его прииметь инъ.
9. Да боудоут с(ы)н(о)ве его сири, и жена его вдова:
10. Движащеся да преселятся с(ы)н(о)ве его и вьспросять, да изгнании
боудоуть из домовъ своихъ.
11. Да испытаеть заимодавець вся, елико соут(ь) его, да вьсхитять
чюжии троуды его.
12. Да не боудеть емоу помощника, ниже боудеть иже оущедрить сироты его.
13. Да боудоуть чада его в пагоубоу, в род единъ да потребится имя его.
14. Да вспомянется безаконие о(те)ць его пред г(осподе)мь, и грех м(а)т(е)ре
его да не очистится.
15. Да боудоуть пред г(осподе)мь воиноу, да потребится от земля память ихъ.
16. Занеже не помяноу створити м(и)л(о)сть, и погна ч(е)л(о)в(е)ка оубога и нища,
и оумилена с(е)рдц(е)мь оум(е)ртвити.

17. И вьзлюби клятвоу, и приидеть емоу: и не вьсхоте б(лагос)л(о)в(е)нья, и
оудалится от него.
18. И облечеся вь клятвоу яко в ризоу, и вниде яко вода в воутробоу его,
и яко елеи в кости его:
19. Да боудеть емоу яко риза, в нюжю облачится, и яко поясъ, имже
воиноу опоясоуется.
20. Се дело облыгающих мя воиноу к г(оспод)оу, и г(ла)г(о)лющих зла на
д(у)шю мою.
21. И ты г(оспод)и г(оспод)и, створи со мною имени твоего ради, яко
бл(а)га м(и)л(о)сть твоя:
22. Избави мя, яко нищь и оубогъ есмь азъ, и с(е)рдце мое вьзмоутися во мне.
23. Яко сень, егда оуклонится отяхся: стрясохся яко проужне.
24. Колене мои изнемогосте от поста, и плоть моя изменися елея рад(и).
25. Азъ быхъ поношению имъ: и видеша мя, и покиваша главами своими.
26. Помози ми г(оспод)и б(ож)е мои, и сп(аси) мя по м(и)л(о)сти твоеи:
27. И оуведять яко роука твоя си, и ты г(оспод)и створилъ я еси.
28. Прокленоуть ти, и ты б(лагос)л(о)виши: вьстающеи на мя постыдятся,
рабъ же твои вьзвеселится.
29. Да облекоутся облыгающеи мя в срамъ, и одежются яко одежею
стоудомь своимь.
30. Исповемся г(осподе)ви зело оусты моими, и посреде многъ вьсхвалю и:
31. Яко ста одесноую оубогаго, сп(а)сти от гонящих д(у)шю мою.

СЛАВА:

К А Ф И З М А Ш Е С Т Н А Д Ц А Т А Я

ПСАЛОМ 109
Д(а)в(и)д(овъ).

1. Реч(е) г(оспод)ь г)осподе)ви моемоу: сяди одесноую мене, дондеже
положю врагы твоя подножье ногъ твоихъ.
2. Жезлъ силы послет ти г(оспод)ь от сиона, и оудолееши посреде врагъ твоихъ.
3. С тобою началъство вь д(е)нь силы твоея, въ светлостех с(вя)т(ы)хъ твоихъ:
ис чрева преже д(е)ньница родих тя.
4. Клятся г(оспод)ь, и не раскаятся: ты иереи вь векы по чиноу мелхиседековоу.
5. Г(оспод)ь одесноую тобе скроушилъ есть вь д(е)нь гнева своего ц(а)ря:
6. Соудить вь языцех, и исполнить падания, скроушить главы на земли многымъ.
7. От потока на поути пиеть, сего рад(и) вьзнесеть главоу.

ПСАЛОМ 110.
Ал(ли)лоуг(иа).

1. Исповемся тобе г(оспод)и всемь с(е)рдц(е)м моимь, вь совете правых и соньма.
2. Велия дела г(оспод)ня, изыскана во всех воляхъ его:
3. Исповедание и вельлепота дело его, правда его пребываеть в векъ века.

4. Память створилъ есть чюдесъ своихъ: м(и)л(ос)т(и)въ и щедръ г(оспод)ь.
5. Пищю далъ есть боящимся его: помянеть в векы заветъ свои.
6. Крепость делъ своихъ вьзвести люд(е)мь своимь, дати имъ достояние языкъ.
7. Дела роукоу его истина и соуд, верны вся заповеди его,
8. Оутвержены в векъ века, створены во истине и правоте.
9. Избавленье посла люд(е)мь своимъ: заповеда в векъ заветъ свои,
с(вя)то и страшно имя его.
10. Зачало прем(оу)др(о)сти страх г(осподе)нь, разоум же бл(а)гъ всемь
творящиимъ и: хвала его пребываеть в векъ века.

ПСАЛОМ 111.
Д(а)в(и)д(овъ).

1. Бл(а)ж(е)нъ моужь бояися г(оспод)а, в заповедехъ его въсхощеть зело.
2. Силно на земли боудеть семя его, род правыхъ б(лагос)л(о)в(и)ться:
3. Слава и богатьство в домоу его, и правда его пребываеть в векъ века.
4. Восия во тме светъ правымь: м(и)л(ос)т(и)въ и щедръ и праведенъ.
5. Бл(а)гъ моужь милоуя и дая: расмотрить словеса своя на соуде,
яко в векъ не подвижетс(я).
6. Въ память вечноую боудет праведникъ:
7. От слоуха зла не оубоитс(я).
8. Готово с(е)рдце его оуповати на г(оспод)а: оутвердися с(е)рдце его,
не оубоится, дондеже возрить на врагы своя.
9. Расточи, дас(ть) оубогымъ: правда его пребываеть в векъ века: рогъ
его вьзнесется вь славе.
10. Грешникъ оузрить и прогневается, зоубы своими поскрегчеть и
растаеть. желанье грешника погибнеть.

СЛАВА:

ПСАЛОМ 112.
Алл(илоу)г(иа).

1. Хвалите отрочи г(оспод)а, хвалите имя г(оспод)не.
2. Боуди имя г(оспод)не б(лагос)л(о)влено от ныне и до века.
3. От в[о]стокъ с(о)лнца до запад хвалено имя г(оспод)не.
4. Высокъ надъ всеми языкы г(оспод)ь: над н(е)б(е)сы слава его.
5. Кто яко г(оспод)ь б(ог)ъ нашь; на высокых живыи,
6. И на смиреныя призирая, на н(е)б(е)си и на земли:
7. Въздвизаяи от земля нища, и от гноища оубога вьзнося:
8. Посадити его со князи, со князи люд(и)и своихъ.
9. Вселяя неплодове в домъ, м(а)т(е)рь о чадех веселящюся.

ПСАЛОМ 113.
Ал(ли)лоуг(иа).

1. Во исходе изр(аи)л(е)ве от египта, домоу ияковля из люди варваръ,
2. Быс(ть) июдея с(вя)т(ы)ни его, изр(аи)ль область его.
3. Море виде и побеже, иорданъ вьзратися вьспять:
4. Горы вьзыграшася яко овни, и холми яко агньци овчии.
5. Что ти быс(ть)море, яко побеже, и тобе иордане, яко вьзратися вьспять;
6. Горы, яко вьзыграстеся яко овни, и холми яко агньци овчии;
7. От лица г(оспод)ня подвижася земля, от лица б(ог)а ияковля:
8. Обращьшаго камень вь езера водная, и несекомыи во источникы водныя.
9. Не намъ г(оспод)и, не намъ, но имени твоемоу даи же славоу о м(и)л(о)сти
твоеи и истине твоеи.
10. Да не когда рекоуть языци: где есть б(ог)ъ ихъ;
11. Б(ог)ъ же нашь на н(е)б(е)се и на земли, вся елико вьсхоте, створи.
12. Идоли языкъ, сребро и злато, дела роукъ ч(е)л(о)в(е)чьскъ:
13. Оуста имоуть, и не г(лаго)лють: очи имоуть, и не видять:
14. Оуши имоуть, и не слышать: ноздри имоуть, и не обоняють:
15. Роуце имоуть, и не осяжють: нозе имоуть, и не поидоуть:
не вьзгласят гортанемь своимь.
16. Подобни имъ да боу[доу]ть творящеи я, и вси надеющеися на ня.
17. Домъ изр(аи)л(е)въ оупова на г(оспод)а: помощникъ и защититель имь есть.
18. Домъ аронь оупова на г(оспод)а: помощникъ и защититель имъ есть.
19. Боящеися г(оспод)а оуповаша на г(оспод)а:
помощникъ и защититель имъ есть.
20. Г(оспод)ь помяноув ны бл(аго)с(ло)в(и)лъ ест(ь) нас: бл(аго)с(ло)в(и)лъ
есть домъ изр(аи)л(е)въ, бл(аго)с(ло)в(и)лъ есть домъ ааронь:
21. Бл(аго)с(ло)в(и)лъ есть боящаяся г(оспод)а, малая с великими.
22. Приложить г(оспод)ь на вы, на вы и на с(ы)ны ваша.
23. Б(лаго)сл(о)в(е)ни вы г(осподе)ви створшемоу н(е)бо и землю.
24. Н(е)бо н(е)б(е)си г(осподе)ви, земля же дас(ть) с(ы)н(о)мь ч(е)л(о)в(е)чьскымь.
25. Не м(е)ртвии вьсъхвалять тя г(оспод)и, ни вси нисходящеи въ адъ:
26. Но мы живии б(лаго)сл(о)вимъ г(оспод)а, от ныне и до века.

ПСАЛОМ 114.
[Аллилоуиа].

1. Възлюбих, яко оуслышить г(оспод)ь глас моленья моего,
2. Яко приклони оухо свое мне, во д(ь)ни моя призовоу и.
3. Обьяша мя болезни см(е)ртныя, беды адовы обретоша мя,
скорбь и болезнь обретохъ, и имя г(оспод)не призвах:
4. Г(оспод)и, избави д(у)шю мою. м(и)л(ос)т(и)въ г(оспод)ь и праведенъ,
и б(ог)ъ нашь милоуеть.
5. Храняи младенца г(оспод)ь: смирихся, и сп(асе) мя.
6. Обратися д(у)ше моя в покои твои, яко г(оспод)ь бл(а)гоствори тобе:

7. Яко изятъ д(у)шю мою от см(е)рти, очи мои от слезъ, и нозе мои от
споползъновения.
8. Бл(а)гооугожю пред г(осподе)мь в стране живоущих.

СЛАВА:

ПСАЛОМ 115.
Ал(ли)лоуг(и)а.

1. Веровахъ, темже и възг(лаго)лахъ, аз же смирихся зело.
2. Аз же рехъ во оужасе моемь: всякъ ч(е)л(о)в(е)къ ложь.
3. Что въздам г(осподе)ви о всехъ, иже вьзъдасть ми;
4. Чашю сп(асе)ния приимоу, и имя г(оспод)не призовоу.
5. М(о)л(и)твы моя г(осподе)ви въздамъ пред всеми людми его.
6. Ч(е)стьна пред г(осподе)мь см(е)рть препод(о)бныхъ его.
7. Г(оспод)и, азъ рабъ твои, [азъ рабъ твои], и с(ы)нъ рабы твоея:
растерза оузы моя.
8. Тобе пожроу жертвоу хвале, во имя г(оспод)не призовоу:
9. М(о)л(и)твы моя г(осподе)ви вьздамь пред всеми людми его:
10. Вь дворех домоу г(оспод)ня, посреде тобе иер(уса)л(и)ме.

ПСАЛОМ 116.
Ал(ли)лоугиа.

1. Хвалите г(оспод)а вси языци, похвалите его вси люд(и)е:
2. Яко оутвердися м(и)л(о)сть его на насъ, и истина г(оспод)ня
пребываеть в векъ.

ПСАЛОМ 117.
Ал(ли)лоуг(иа).

1. Исповедаитеся г(осподе)ви, яко бл(а)г, яко в векы м(и)л(о)сть его.
2. Да речеть оубо домъ изр(аи)л(е)въ: яко бл(а)гъ, яко в веки м(и)л(о)сть его.
3. Да речеть оубо домъ аронь: яко бл(а)г, [яко въ векъ м(и)л(ос)ть его].
4. Да рекоуть оубо вси боящеися г(оспод)а:
яко бл(а)гъ, яко в векы м(и)л(о)с(ть) [его].
5. От печали призвах г(оспод)а, и призва мя вь пространьство.
7. Г(оспод)ь мне помощникъ, и азъ возрю на врагы моя.
8. Бл(а)го ест[ь] надеятися на г(оспод)а, нежели надеятися на ч(е)л(о)в(е)ка:
9. Бл(а)го ест[ь] оуповати на г(оспод)а, неже оуповати на князя.
10. Вси языци обыидоша мя, и именемь г(осподни)мь противляхся имъ:
11. Обышедше обыидоша мя, и именемь г(осподни)мь противляхся имь.
12. Обыидоша мя яко бчелы сотъ, и разгорешася яко огнь в тернии:
и именемь г(осподни)мь противляхся имь.
13. Възриновенъ преклонихся пасти, и г(оспод)ь прият мя.
14. И крепость моя и пенье мое г(оспод)ь, и быс(ть) мне въ сп(асе)ние.

15. Глас радости и сп(асе)нья в селехъ праведникъ:
десница г(оспод)ня сотвори силоу,
16. Десница г(оспод)ня вьзнесе мя, десница г(оспод)ня створи силоу.
17. Не оумроу, но живъ боудоу, и повемь дела г(оспод)ня.
18. Показая наказа мя г(оспод)ь, см(е)рти же не предасть мене.
19. Отверзете мне врата правды: вшед в ня исповемся г(осподе)ви.
20. Си врата г(оспод)ня, праведнии внидоуть в ня,
21. Исповемся тобе, яко оуслыша мя, и быс(ть) мне въ сп(а)с(е)ние.
22. Камень, егоже небрегоша зижющеи, се быс(ть) в главоу оуглоу:
23. От г(оспод)а быс(ть) си, и есть дива вь очию нашею.
24. Сии д(е)нь, иже створи г(оспод)ь, вьзрадоуемся и вьзвеселимся вонь.
25. Г(оспод)и, сп(а)си же, г(оспод)и, поспеши же.
26. Б(лагос)л(о)в(е)н грядыи во имя г(оспод)не:
б(лагос)л(о)вихомь вы из домоу г(оспод)ня.
27. Б(ог)ъ г(оспод)ь, и явися вамъ:
с[о]ставите празьдникъ вь осеняющих до рогъ олтаревых.
28. Б(ог)ъ мои еси ты, и исповемся тобе: б(ог)ъ мои еси ты, вьзнесоу тя.
исповемся тобе, яко оуслыша мя, и быс(ть) мне вь сп(асе)нье.
29. Исповедаитеся г(осподе)ви, яко бл(а)гъ, яко в векы м(и)л(о)сть его.

СЛАВА:

К А Ф И З М А С Е М Н А Д Ц А Т А Я

ПСАЛОМ 118.
Ал(ли)лоуг(и)а.

1. Бл(а)ж(е)ни непорочнии в поуть, ходящеи в законе г(оспод)ни.
2. Бл(а)ж(е)ни испытающеи сведения его, всемь с(е)рдцемь взищють его.
3. Не делающеи бо безакония в поутех его ходиша.
4. Ты заповеда заповеди твоя схранити я зело.
5. Еда исправилися быша поутие мои, схран(и)ти оправданья твоя.
6. Тогда не постыжюся, егда призрю на вся заповеди твоя.
7. Исповемся тобе вь правости с(е)рдца, внегда наоучитимися
соудбамь правды твоея.
8. Оправданья твоя сохраню: не остави мене до зела.
9. О чесомъ исправить оунныи поуть свои; вьнегда схранити словеса твоя.
10. Всемь с(е)рдц(е)мь моимь вьзысках тобе, не отрини мене от заповедеи твоихъ.
11. Вь с(е)рдци моемь скрых словеса твоя, да не согрешю тобе.
12. Б(лагос)л(о)в(е)нъ еси г(оспод)и: наоучи мя оправданьемь твоимь.
13. Оустнама моима исповедахъ вся соудбы оустъ твоихъ.
14. На поути сведении твоихъ насладихся, яко о всякомь б(ог)атьстве.
15. В заповедех твоихъ пооучюся, и разоумею поути твоя.
16. Въ оправданиихъ твоих пооучюся: не забоудоу словес твоихъ.
17. Вьздаи же рабоу твоемоу: живи мя, и схраню словеса твоя.
18. Открыи очи мои, и разоумею чюдеса от закона твоего.

19. Пришлець есмь азъ на земли: не скрыи от мене заповеди твоя.
20. Вьзлюби д(у)ша моя в[оз]желети соудебъ твоихъ на всяко время.
21. Запретилъ еси гордымъ: прокляти оуклоняющеися от заповедеи твоихъ.
22. И отими от мене поносъ и оуничижение, яко сведении твоихъ взыскахъ.
23. Ибо седоша князи, на мя клеветахоу, рабъ же твои любом(у)дръствоуя
въ оправданиихъ твоихъ:
24. Ибо сведения твоя поучение мое ес(ть), и с[о]вети мои оправданья твоя.
25. Прилпе земли д(у)ша моя: живи мя по словеси твоемоу.
26. Поути моя исповедах, и оуслыша мя: наоучи мя оправданьемь твоиъ:
27. Поути оправдании твоихъ вразоуми мя, и пооучюся в чюдесех твоих.
28. Вьздрема д(у)ша моя от оуныния: оутверди мя вь словесехъ твоихъ.
29. Поуть неправды отстави от мене, и закономь твоимь помилоуи мя.
30. Поуть истины изволих, соудебъ твоиъ не забых.
31. Прилепихся сведених твоихъ г(оспод)и, не посрами мене.
32. Поут[ь] заповедеи твоихъ текох, егда ра[з]ширилъ еси с(е)рдце мое.
33. Законъ положи мне г(оспод)и, поуть оправдании твоих, и взышю его воиноу:
34. Вразоуми мя, и испытаю законъ твои, и схраню и всемь с(е)рдцемь моимъ.?
35. Настави мя на стезю заповедии твоихъ, яко то всхотехъ.
36. Приклони с(е)рдце мое вь сведения твоя, а не в лихоимьство.
37. Отврати очи мои не видети соуеты, в поути твоемь живи мя.
38. Постави рабоу твоемоу слово твое въ страх твои.
39. Отими поношенье мое, еже непщевах: яко повеления твоя бл(а)га.
40. Се в[оз]желехъ заповедеи твоиъ вь правде твоеи живи мя.
41. И да приидеть на мя м(и)л(о)сть твоя г(оспод)и,
сп(асе)нье твое по словеси твоемоу.
42. И отвещаю поносящимъ мне слово: яко оуповах на словеса твоя.
43. И не отими от оустъ моиъ словесе истиньна до зела,
яко на соудбы твоя оуповах.
44. И схраню законъ твои присно, в векъ и в векъ века.
45. И хожахъ в широте, яко заповеди твоя взыскахъ:
46. И г(лаго)л(а)хъ о сведении твоихъ пред ц(а)ри, и не стыдяхся:
47. И пооучахся в заповедех твоихъ, яже вьзлюбихъ зело:
48. И вьздвигохъ роуце мои к заповедемь твоим, яже възлюбих,
и любом(у)дръствавахъ въ оправданиихъ твоих.
49. Помяни словесъ твоихъ рабоу твоемоу, ихже оупование дал ми еси.
50. Та мя оутеши в смирении моемь, яко слово твое живи мя.
51. Гордии законопрестоуповахоу велми: от закона же твоего не оуклонихся.
52. Помяноухъ соудбы твоя от века г(оспод)и, и оутешихся.
53. Печаль прият мя от грешникъ, оставляющих законъ твои.
54. Пета бяхоу мне оправданья твоя, на месте пришельствия моего.
55. Помяноухъ в нощи имя твое г(оспод)и, и схраних законъ твои.
56. Си быс(ть) ммне, яко оправдании твоихъ възисках.
57. Часть моя еси г(оспод)и, рехъ схранити законъ твои.
58. Помолихся лицю твоемоу всемь с(е)рдц(е)мь моимь:
помилоуи мя по словеси твоемоу.
59. Помыслих поути твоя, и обратихъ нозе мои вь сведения твоя.

Дата добавления: 2014-11-25