Дополнительные статьи

Текст

УСТАВ ВЕЛИКОГО КНЯЗЯ ВСЕВОЛОДА О ЦЕРКОВНЫХ СУДАХ,

И О ЛЮДЕХ, И О МЕРИЛАХ ТОРГОВЫХ

1. Се аз, князь великый Всеволод, нареченный в святем крещении ИГФШЬ⁵¹⁵, правнук Игорев и блаженныя прабабы Олгы, нареченныя в святемь крещении Елена и матере Володимеровы, нареченного в святем крещении Василие, и тые господа прияле святое крещение от греческыих царей и от Фотия патриарха цареградскааго, взяша перваго митрополита Михаила⁵¹⁶ Киеву, иже крести всю Русьскую землю.

2. По том же летом многым минувшемь моляся Спасу и пречистей его матери святей Богородици приснодевей Марии, устроишя церковь святую Богородицу Десятинную и дашя ей десятину в всей Русской земле и с всих княжений в съборную церковь святые Богородица, иже в Киеве, и святей Софии киевской, и святей Софии новгородской, и митрополитом киевъскыим, и архиепископом новгородскыим от всякого княжа суда десятую векшу, а ис торгу десятую неделю, а из домов на всякое лето и от всякого стада, и от всякого жита десятое святому Спасу и пречистей его матери и премудрости божий святей Софии.

3.⁵¹⁷. А се изъобретохом⁵¹⁸ в греческом номоканоне, что сих судов и тяжь не судити князю, ни его детем, ни его наместником, ни его боляром, ни его тиуном, ни десят(и)ника⁵¹⁹ не дръжати.

4. И⁵²⁰ съзвал есмь 10 сочких, и старосту Болеслава, и бириця Мирошку⁵²¹ и старосту иваньскаго Васяту и погадал есмь с владыкою, и с своею княгынею, и с своими боляры, и с десятию сочьскыми, и с старостами, дал есмь суд и мерила, иже на Торгу святей Богородици в Киеве и митрополиту, а в Новегороде святей Софии, и епископу, и старосте иваньскому, и всему Новгороду мерила торговаа, скалвы вощаныи, пуд медовый и гривенку рублевую, и локоть еваньскый и свой оброк кубець черницам, а попу иваньскому⁵²² рускаа пись с бо-рисоглебьскым напол, а сторожю иваньскому⁵²³ руской порочици пятно да десять конюхов соли.

5. А не въступатися в тыи оброкы моим детем, ни моим наместником, ни моим боляром на дом святии Софии и святого Ивана.

6. А дом святей Софии владыкам строити с сочьскыми, а старостам и торговьцам докладывай владыки или кто будеть нашего рода князе и Новагорода строить⁵²⁴ дом святого Ивана.

7. А се приказываю своим наместником и тиуном суда церковного не обидети, ни судити без владычня наместника.

8. А се дах в алтарь святей Софии и причту церковному вседеньник сенаник, венце; что суды церковныя – то святей Софии; а кто нашего роду пограбить или отъиметь, того повелехом владыце събором в синанице проклинати.

9. А се суды церковныя: роспускы, смилное, заставание, умычка, пошибалное, промежи мужем и женою о животе⁵²⁵ и о бездетном животе⁵²⁶, в племени или в сватовьстве поимутся, потворы, чяродеяние, влъхвования, ведьство, зелейничество, зубоежа, урекания три: бляднею, зелии, еретичьство; отца или матерь биеть сын или дщи, или сноха свекровь, братия или дети тяжутся о заднице, церковная татба, мертвеци съвлачають, крест посекуть или⁵²⁷ на стенах режють, или два мужа имутся бити и единого жена иметь за лоно другаго, раздавить, или кого застануть с (че)твероногою, или кто молится под овином, или в рощении, или у воды, или девка детя по-вержеть, скот, или псы, или поткы, или ино что неподобно церкви подеють.

10. А тыи суды ecu церкви даны суть, епископу, а князю и боляром, и судиям в ты⁵²⁸ суды не вступатися. А то дал есмь по перьвых царев уряжению и по вселеньскыих святых 7 съборов великих святитель⁵²9.

11. А по сем не въступатися детем моим, ни внучатам моим, ни всему роду моему до века в люди церковный, ни в вси суды их.

12. Аже кто преобидить нашь устав, таковым непрощеном быти от закона божиа, и горе себе наследують, и мука вечнаа ждеть их.

13. А⁵³⁰ о всех⁵³¹, что преди писано, дръжах за своими боляры, аже они обидять гостей, а где живуть, тым наровять, а княжю душю топять.

14. И⁵³² аз въсмотрех в Фотея патриарха цареградьскааго грамоты, что принесл на Русь князь великый Владимер, нареченный в святемь крещении Василие, сын Святославль, а внук Игорев и преблаженныя княгыни прабабы Олгы, аже стоить в грамоте.

15. Торговый вся весы, мерила и скалвы вощаныя, и пуд медовый, и гривенка рублевой, и всякая известь, иже на Торгу промежи людьми от бога тако исконе уставлено есть, епископу блюсти без пакости, ни умалити, ни умножити, а на всякый год извещивати. А скривится, а кому приказано, а того казнити близко смерти, а живот его натрое: треть живота святей Софии, а другаа треть святому Ивану, а третьая треть сочьскым и Новугороду.

16. А епископу, не управив того, за все то дати ему слово в день великааго суда, а печяловатися ему о том управлении, яко же и о душах человечьскыих. Аще же управить епископ сия управления нашя, блажен будеть и небесному царствию наследник будеть, а не урядить, а мы то с своей души сводим.

17. А се церковный люди: игумен, игумениа, поп, диякон и дети их, а кто в крилосе, попадия, чернець, черница, проскурниця, паломник, свещегас, стороник, слепець, хромець, вдовица, пущеник, задушьный человек, изгои трои: попов сын грамоты не умееть, холоп из холопьства выкупится, купець одолжаеть. А се четвертое изгойство и себе⁵³³ приложим: аще князь осиротееть; монастыреве, болници, гостиници, странноприимъници.

18. То люди церковныи, богаделныи. Или митрополит, или епископ тыи ведають между ими суд, или обиду, или кому прикажють, или которого задниця.

19. Или будеть иному человеку с тыми людьми речь, ино обчии суд.

20. Своим тиуном приказываю суда церковнааго не обидети, а с суду давати 9 чястей князю, а десятую святей Софии за княжю душю.

21. А кто приобидить суды церковныи, платити ему собою, а пред богом тому же отвещяти на страшнем суде пред тьмами ангел, идеже когождо дела не съкрыются благаа же и злаа, идеже не поможеть никто же никому же, но токмо правда избавить от вторыя смерти и от вечныя мукы, и от огня негасимааго, яко же есмы управиле по святых отець правилом и по первых царей и князей уряжению.

22. А кто иметь преступати сия правила, или дети мои, или внучата⁵³⁴, или правнучата, или в коем городе наместник, или тиун, или судиа, или кто, а⁵³⁵ пообидить суды церковныи, да будуть прокляти в сии век и в будущий седмию съборы святых отець вселеньскыих.

23. А та вся дела приказах святей Софии и всему Новугороду моим мужам⁵³⁶ и 10-ти⁵³⁷ сочьскыим⁵³⁸. Вы блюдите, а не възблюдете⁵³⁹, и вы сами за то ответ дадите в день страшнаго суда пред лицем царя славы. Аминь.

Дата добавления: 2015-05-06