Bauhiu tuuli

Bauhiu tuuli,

Pedvuau tuuli lehtet,

Tuli syvys

Myös on vilut ehtät.

Keriäy tuuli

Yhteh tukkuh pilvet,

Itköy syvys –

Märrät ollah silmät…

38 Särizöy pihlai

Särizöy pihlai,

Vilustui mua,

Sygyzy pihal –

Guarbalo suol.

Päiväine – zero,

Kuudam on yös,

Pohjola keroin

Avai sit myös.

Vihmu da tuuli –

Sygyzyn siä,

Aldo on suuri

Järvilöin viäs…

39 Aunus minun – armas kodi

Aunus minun – armas kodi,

Kallis randu – suandukohtu.

Vastua minuu, konzu tulen –

Minä olen sinun poigu.

Enhäi ole sille vieras…

Kenen jälgih minä segoin?

Vikse koispäi pete vedäy,

Toinah iče olen bluaznu…

Lähtin minä koispäi ammui,

Vierasrandua kodvan pollin,

Puaksuh häilyin Amerikas –

Poikki meres viättih laivat.

Ankurin ma kunne lykkäin?

Meren aldo piäzi eloh –

Minun hengi tillii panou,

Vikse iče segoin matkoih.

Merenmatku, raudumatku…

Armas muamo viruu kalmas,

Sihgi nygöi velli vieri –

Kedä minä ilmal palvuan?

Yksi musto jäi vai luja,

Mual täl minä matkuniekku –

Astua pidäy – hengi tirpau,

Tirpau, kuni olen hengis…

Hengis olla kodvu pidäy,

Eiga eliä huigei rodieu…

40 * * *

Ihalmos vihmu,

Atkalas ilmu,

Päiväine peityi,

Hämäri heityi.

Perrettäy muadu –

Gu kauhazes vuodau,

Märiččy siäl

Tuskevui piä.

41 * * *

Minä ammui en näi tiähtii,

Pilvi peitti tiähtet kai.

Kuudam sežo peittoh lähti –

Pimei yöhyt lekkuu vai.

Yöle vastah huondes harmai

Rygimisty nostes tuou,

Enne zor’ku muadu palvai,

Nygöi vihmu pezöy muan.

Päivän kaiken vetty valau –

Vilu vihmu heinii lyöy,

Mustu pilvi päivän salbai,

Pitky ehty kuččuu yön.

Minä ammui en näi tiähtii,

Pilvi peitti tiähtet kai.

Kuudam sežo peittoh lähti –

Pimei yöhyt lekkuu vai…

42 * * *

Joga mies on oman ozan seppy,

Älä čakkua elaigua nikus.

Jogirannal kazvau paju, leppy,

Pellol kazvau herneh, kagru, ruis.

Sepänvuaras roinnuh minun buabo,

Mägriäh viettih minun buabua tiet,

Päiväh kaččou koivu, kaččou huabu,

Aunus-jogeh mennäh Mägriäs viet.

Mägry-joven rannal minun muamo,

Nosti yläh oman čoman piän;

Siepäi lähtin minä ozua suamah,

Siepäi minä omua matkua vien…

* * *

Mille mieleh tulou puaksuh

Kui meis päivy iäres juoksou;

Joga päivy pimieh pagieu,

Mugai meijän igä langieu.

Igä eliä – igä eččie,

Voit vie puuttuo karun meččäh:

Sit sie seguat dorogoih,

Hyväs mieles paha roih.

Mieles tusku puaksuh eläy,

Tusku – syväin minun eläi,

Joga yödy en voi muata,

Joga päiviä ozua vuotan.

Vuvvet juostah mentie kunne,

Omua iččie odva tunnen;

Pitkil matkoil riähkiä sain,

Keskities yksin jäin.

Žiäli minul omua muamua,

Mikse lähtin hädiä suamah?

Tulin kodih – muamua eule,

Eule vellie, kodii eule…

Tusku mieles kodvan pyzyy,

Rippuu minus – ei ni kyzy,

Päivy päiväs piäliči –

Viego kedä žiäleičen?

Lapsusaigu silmis puaksuh,

Hyvämieles jiännyh tuakse,

Vaiku minä ečin matkua,

Kudai pahan elon katkuau.

Hyviä tiezi minun syväin,

Eulluh pahua, oli hyvä,

Kedä nygöi viärittiä? –

Iče kaimain oman tien.

Työnän edeh langua kerän,

Löydyy toinah minun veräi,

Avuan veriän – kodih puutun,

Harpuan pertih – pertis uutun,

Roimmos uuzi – et ni tunne,

En sit lähte mentie kunne:

– Minä, sanon, – olen kois,

Mengiä minus riähkät pois!

Дата добавления: 2015-06-30