Unen ihalmo

Uuzi vuozi

Hengen kodi

Aino

Natali Jerkojevan

Älä kaimua Ainua,

Paha sana lainua –

Ei sua šlöttie kaivoh,

Kaivos vetty juot.

Aino – sinun vaimo,

Älä vaimua kaimua,

Lähtenöy vai Aino –

Pitkät roijah yöt.

Älä kiirehtä enne –

Ehtit sinne mennä:

Tiähtih lähtöy hengi,

Kalmah pannah luut...

Polle ielleh muadu,

Kehtua kodvu ruadua,

Jumal sinuu nägöy,

Mustetahgi muut.

Hengi meil on aino,

Älä hengie kaimua:

Hengie eččiy karu –

Riähkät työnä pois.

Ole hengeh rakas,

Ripu rouno akas,

Hengeh pane hengi,

Häi on sinun kois.

Hengen kodi – sinä,

Hengen kodi – minä,

Hengen kodi – rahvas,

Rahvahas kai myö.

Eči paras matku,

Muale igiä jatkua,

Anna eläy ilmu,

Anna eläy mua.

72 * * *

Kuittine – oigiel käil,

Mägräi on hurual käil,

Keskučal Lambero seizou.

Lamberoh omal väil

Jumalan kebjiel käil –

Keskuččah tulin da seizon.

Meččy da meččy ymbäri.

Tuulou, tuulou, tuulou tuuli,

Ukkuau tuuli lapsen huulii.

74 * * *

Astuu akku alasti –

Akku algai astuo.

Kasti kobrat käz’asties –

Kiireh käzii kastua.

75 * * *

Koiran vuozi lähti pois,

Pihal seizou ruskei počči…

Kenbo vuottau minuu kois?

Tyhjät pertit, päčin očču…

76 * * *

Livestyi talvi,

Vihmannu itköy,

Järves jiä halgei,

Märgy siä pitky.

Miksebo talvi

Keviänny rodih,

Miksebo halgei –

Kiirehtäy kodih?

77 * * *

Pakkaskuu vihmal valattau muadu,

Rastavan aijal taivas yön vuodau,

Tänävuon talvi ei tulluh miän kodih,

Midäbo talvekse muailmal rodih?

Uuzi vuozi muale heityi,

Vahnu vuozi tuakse peityi.

Sano, Uuzi, midä toit –

Meile ozua hyviä roih?

Joga taloih ozua anna,

Ilmua, ruskuo, juhlua kanna,

Anna lähtöy joga kois

Hädä, riähky, paha pois!

79 * * *

On gu sygyzy tänävuon kezä,

Peitetty tuules varoloin pezät…

Harmannuh taivas. Pohju on vägey,

Päiväine vihmas pilvilöih pagei.

80 * * *

Midä puuttuu unis tulou,

Unes aunua, tiijän, eule…

Tuuli-koiru pihal ulvou:

– En ma koiru, hukku olen!

Midä meijän muale rodih?

Kenbo šeloi talven, kezän?

Vilukäin ken tungi kodih?

Syvys, kevät – mi on ezmäi?..

81 * * *

Sinun huulet – magei meri,

Sinun syväi – pyhävezi,

Silmät ollah syväkaivo,

Sinä minun rakas, aino.

Oli elaigua kaikkie,

Näin ma hyviä dai pahua;

Oli ihalmua, hädiä,

Pyzyi kormanis rahua.

Oli käis minul piäsköi,

Tahtoin tavata kurgii –

Kuni taivahah kačoin,

Loppih täh minun murgin.

Tuli ildaine pertih:

Stolan piäl leiby muureh,

Stuulan reunal ma istun,

Kačon čuppuzeh suureh.

Tyhjät seinäzet ollah –

Kenbo obrazat lainai?

Minul emändiä eule –

Kunne armahan kaimain?

Pertis viheldäy tuuli,

Minä ihalmua vuotan,

Eule ies vaimon huulii –

Vieren yksinäh muate.

Unis ihalmo tulou,

Unis armastu sebiän –

Roih sit huondeksel hyvä,

Päiväl hengele kebjiem.

83 * * *

Konzu pakkuu piä,

Tulou piätöi aigu…

Jumalanke jiä,

Elät sit sa vaigu.

Дата добавления: 2015-06-30