I. УМШТН. Калян Санҗ үүдәврмүдтән юуна тускар бичҗ йовсмб?

Калян Санҗ үүдәврмүдтән юуна тускар бичҗ йовсмб?

Эн ямаран күн бәәсмб?

(Бичәчин намтрас)

Калян Санҗ – Хальмгин ачта бичәч болн шүлгч. Калян Санҗ 1905-гч җил төрв. Энүнә һарсн өдр – туула сарин 2. Калян Санҗ Цаһан Нур гидг хотнд төрсмн. Школын хөөн багшин техникум төгсәв.

Калян Санҗ билгтә күн билә. Эн хальмгин урн амн үгин зөөр сәәнәр меддг билә. Бичәч олн көдлмшт көдлв. Хальмг искусствин техникумд багш болҗ көдлв. Хальмг театрин түрүн һардач болв. «Хальмг үнн» газетин редакцд көдлв. Хальмг ах сурһулин институтд көдлв. Хальмг бичәчнрин ниицәнә гешүн болн сегләтр болҗ йовла.

Санҗ Каляевич бичкдүдт йир дурта билә. «Теегт нерәдсн частрас», «Малчнрин көдлмш», «Май сарин йисн», «Юрий Гагарин» болн нань чигн үүдәврмүд бичкдүдт нерәдв. Энүнә түрүн шүлгүд «Бамб цецг» болн «Хальмг баһчуд».

Калян Санҗ төрскндән дурта күн бәәсмн. Эн олн үүдәврмүдтән төрскн теегән, эврә улсан, хальмг келән магтсмн. Энүнә үүдәврмүд дунд ончта орм «Хальмг келн» гидг шүлг эзлнә.

Сурврмудт хәрү өгтн:

1. Калян Санҗ кезә төрсмб?

2. Энүнә төрскн һазр ямаран нертә?

3. Бичәч альд көдлҗ йовсмб?

4. Энүнә түрүн шүлгүд ямаран нертә?

5. Калян Санҗ шүлгүдтән кенә болн юуна тускар бичҗ йовсмб?

Күүндтн:

Гилән: Калян Санҗ альд төрсмб?

Мергн: Цаһан Нур хотнд.

Гилән: Ямаран техникум чиләсмб?

Мергн: Багшин техникум.

Гилән: Юуна һардачар көдлсмб?

Мергн: Хальмг искусствин техникумин

болн театрин һардачар көдлсмн.

Гилән: Калян Санҗ ямаран күн бәәсмб?

Мергн: Билгтә, цецн, цаһан седклтә күн бәәсмн.

Гилән: Үүдәврмүдтән юуна тускар бичҗ йовсмб?

Мергн: Төрскн теегин, хальмг келнә, теегин улсин тускар бичҗ йовсмн.

• • Соңстн.

Эн Хальмгин нертә бичәч. 1905-гч җилд Цаһан Нур хотнд төрсмн. Эн төрскнч седклтә күн бәәсмн. Үүдәврмүдтән хальмг теегән магтҗ йовсмн.

Дата добавления: 2014-11-06