Олданылу аясы 1 страница

Тарау. Жалпы ережелер

1. Осы «Медициналық техника мен медициналық мақсаттағы бұйымдардың қауіпсіздігіне қойылатын талаптар» техникалық регламенті (бұдан әрі - Техникалық регламент) «Халық денсаулығы және денсаулық сақтау жүйесі туралы» Қазақстан Республикасының 2009 жылғы 18 қыркүйектегі Кодексіне, «Техникалық реттеу туралы» Қазақстан Республикасының 2004 жылғы 9 қарашадағы Заңына сәйкес әзірленді және медициналық техника мен медициналық мақсаттағы бұйымдардың қауіпсіздігіне, сондай-ақ олардың өмірлік циклі үдерістеріне қойылатын талаптарды белгілейді.
2. Осы Техникалық регламенттің реттеу объектілері осы Техникалық регламентке 1-қосымшаға сәйкес Қазақстан Республикасында өндірілетін және Қазақстан Республикасына әкелінетін, Кеден одағының сыртқы экономикалық қызметінің Бірыңғай тауар номенклатурасына (бұдан әрі - КО СЭҚ БТН кодтары) кіретін медициналық техника мен медициналық мақсаттағы бұйымдар болып табылады.
3. Медициналық техника мен медициналық мақсаттағы бұйымдарды сәйкестендіру:
1) көзбен шолып қарау;
2) атаудың ұқсастығын белгілеу;
3) КО СЭҚ БТН кодтарын белгілеу;
4) медициналық техниканың қаптамасында, ыдысында, затбелгісінде, жазба белгісінде, маңдайшасында, пайдалану құжатында берілген ақпараттар және тұтынушыға арналған медициналық мақсаттағы бұйымдарды қолдану жөніндегі нұсқаулықтар арқылы жүргізіледі.

2. Терминдер мен анықтамалар

4. Осы Техникалық регламентте мынадай негізгі терминдер мен анықтамалар пайдаланылады:
1) активті медициналық техника - белгілі бір функционалдық жүйеге, адамның ағзасы немесе тініне толық немесе іріктеу арқылы әсер етуге арналған құралдарды қозғалысқа келтіретін немесе қандай да бір түрді қуатты генерирлейтін медициналық техника;
2) контаминация - ендіру, сынамаларды іріктеп алу, қаптамалау немесе қайта қаптамалау, сақтау немесе тасымалдау барысында бастапқы материалға, аралық өнімге немесе дәрілік субстанцияға химиялық немесе микробиологиялық тектес қоспаларды немесе бөгде материалды еріксіз қосып жіберу;
3) медициналық техника мен медициналық мақсаттағы бұйымдардың қауіпсіздігі - қауіпті фактордың іске асырылу ықтималдығы мен оның салдарының ауырлық дәрежесінің үйлесуін ескере отырып, адамның өміріне, денсаулығына, қоршаған ортаға зиян келтірумен байланысты мүмкін болмайтын қауіптің болмауы;
4) медициналық мақсаттағы бұйымдар - профилактикалық, диагностикалық және емдеу іс-шараларын жүргізу үшін пайдаланылатын бұйымдар мен материалдар: медициналық құрал-саймандар, стоматологиялық, шығыс, таңу және тігу материалдары, бекітетін таңғыштар мен құрылғылар, медициналық оптика бұйымдары;
5) медициналық мақсаттағы бұйымдар мен медициналық техникаға жинақтаушылар - медициналық мақсаттағы бұйымдар мен медициналық техниканың функционалдық мақсатына сәйкес пайдалану үшін өндіруші қарастырған медициналық мақсаттағы бұйымдар мен медициналық техниканың құрамдас бөлшегі ретінде қолданылатын бұйым және (немесе) құрылғы;
6) медициналық техника - аурулардың профилактикасы, оларды диагностикалау, емдеу, оңалту, медициналық сипаттағы ғылыми зерттеулер үшін медициналық мақсатта жеке түрде, кешеннің немесе жүйенің құрамында қолданылатын аппараттар мен жабдықтар;
7) медициналық техника мен медициналық мақсаттағы бұйымдарды жөндеу - медициналық техника мен медициналық мақсаттағы бұйымдарды қолдану кезінде олардың жарамсыздықтарын жою мен қалпына келтіру жұмыстарының жиынтығы;
8) медициналық мақсаттағы бұйымдар мен медициналық техниканы қолдану қаупі - медициналық техника мен медициналық мақсаттағы бұйымды пайдаланған пациенттердің, қызметкерлердің, өзге де тұлғалардың келтірілген зияннан қауіп туындауының ықтимал жиілігі немесе денсаулық жағдайының ауырлық дәрежесінің ықтимал күшеюі;
9) медициналық техниканы пайдалану құжаты - медициналық техниканы пайдалану ережесін айқындайтын және өндірушінің медициналық техниканың негізгі өлшемдері мен сипаттамаларының (қасиеттерінің) кепілдендірген мәнін куәландыратын мәліметтерді, оны белгіленген қызмет мерзімі ішінде пайдалану бойынша кепілдіктер мен мәліметтерді көрсететін медициналық техниканың өндірушісі әзірлеген тұтынушыға арналған құжат;
10) медициналық техника мен медициналық мақсаттағы бұйымдарды пайдаланушы - медициналық техника мен медициналық мақсаттағы бұйымдарға мақсаты бойынша қызмет көрсететін тұлға (медициналық және техникалық персонал);
11) медициналық техника мен медициналық мақсаттағы бұйымдарға техникалық қызмет көрсету - оларды қолдану, сондай-ақ сақтау және тасымалдау кезінде жарамсыздықтарын анықтауды және тоқтап қалуының алдын алуды қамтамасыз ететін жүйелі жұмыстар жиынтығы;
12) медициналық техника мен медициналық мақсаттағы бұйымдардың тиімділігі - профилактикалық, диагностикалық және (немесе) емдеу тиімділігін қамтитын сипаттамалардың жиынтығы;
13) медициналық мақсаттағы бұйымдар мен медициналық техниканы таңбалау - тұтынушыға арналған ақпарат жазылған және этикеткаларға, контрэтикеткаларға, кольереткаларға, затбелгіге, қаптамаларына (ыдысқа) немесе, медициналық мақсаттағы бұйымдар мен медициналық техниканың өзіне жапсырылған мәтін, тауарлық таңба, шартты белгілер мен суреттер;
14) медициналық мақсаттағы бұйымдар мен медициналық техниканың электромагнитті үйлесімділігі - оның электромагнитті жағдайда қанағаттанарлық жұмыс істеу қабілеті, осы жағдайда бір нәрсеге мүмкін еместі электромагнитті кедергілерінің болмауы;
15) пайдалануға енгізу - болжанатын пайдалану орны бойынша медициналық техника мен медициналық мақсаттағы бұйымдарды пайдалануға дайындауға бағытталған жұмыстардың жиынтығы;
16) трансфузиялық-инфузиялық терапияда пайдаланылатын техникалық құралдар — медициналық мақсаттағы бұйымдар: донорлық қанды, оның компоненттері мен препараттарын, сондай-ақ қанды алмастыратын құралдарды алу, қайта өңдеу, сақтау және клиникалық қолдануға арналған бір рет қолданатын қондырғылар мен жүйелерді қосқанда, құралдар, аппараттар, аспаптар мен керек-жарақтар;
17) трансфузиялық-инфузиялық терапия - науқасқа емдеу мақсатымен донор қанының компоненттері мен препараттарын, сондай-ақ қанды алмастыратын ерітінділерді құю;
18) техникалық сынақтар - медициналық техника мен медициналық мақсаттағы бұйымдардың техникалық сипаттамаларының техникалық құжаттамаларға сәйкестігін анықтау.

2-тарау. Қауіпті факторлар (қауіптер)

5. Медициналық техника мен медициналық мақсаттағы бұйымдардың өмірлік циклі үдерісінде туындайтын қауіпті факторларға (қауіптерге) мыналар жатады:
1) сериялы және жаппай өндірістің конструкциясының, технологиялық үдерістердің немесе өнімінің бақылау жүйелерінің жетілмеуі;
2) өндірісте рұқсат берілмеген материалдарды қолдану;
3) қолдану үдерісінде сапалық сипаттамаларын жоғалту;
4) нақты ақпараттың болмауы.

3-тарау. Қазақстан Республикасы нарығында медициналық техника
мен медициналық мақсаттағы бұйымдар айналысының шарттары

6. Медициналық техника мен медициналық мақсаттағы бұйымдар айналысының нарықтағы негізгі шарттары осы Техникалық регламентте белгіленген талаптарға сәйкес келуі болып табылады.
7. Мыналар:
1) Қазақстан Республикасында мемлекеттік тіркеуден өтпеген;
2) қолдану немесе пайдалану мерзімі өткен;
3) осы Техникалық регламенттің талаптарына сәйкес емес;
4) медициналық техника мен медициналық мақсаттағы бұйымдарды уақытша сақтау қоймалары арқылы;
5) тұтынушыға арналған анық және толық ақпаратсыз (таңбалау, медициналық техниканың пайдалану құжаттары, медициналық мақсаттағы бұйымдарды медициналық қолдану жөніндегі нұсқаулық) медициналық техника мен медициналық мақсаттағы бұйымдарды өткізуге рұқсат берілмейді.

4-тарау. Медициналық техника мен медициналық мақсаттағы
бұйымдардың қауіпсіздігіне және өмірлік циклі үдерістеріне
қойылатын талаптар

1. Медициналық техника мен медициналық мақсаттағы
бұйымдардың қауіпсіздігі

8. Қазақстан Республикасының аумағында айналыстағы медициналық техника мен медициналық мақсаттағы бұйымдар тұтынушының және пайдаланушының өміріне немесе денсаулығына зиян келтірмеуі тиіс.
9. Медициналық техника мен медициналық мақсаттағы бұйымдар:
1) пациентті және тұтынушыны механикалық зақымданудан, дірілдің, шудың, жылу және иондаушы сәулелерден қорғауды қамтамасыз етуі;
2) электромагниттік үйлесімділікті, электрлі, химиялық қолдану қауіпсіздігін қамтамасыз етуі;
3) қауіпсіз материалдан жасалуы;
4) медициналық техниканы пайдалану құжатында көрсетілген пайдалану және қолдану қауіпсіздігі бойынша ақпараттың, медициналық мақсаттағы бұйымдарды қолдану, таңбалау жөніндегі нұсқаулықтың қажетті көлемімен жабдықталуы;
5) материалдардың физикалық қасиеттері мықтылығын, төзімділігін, контаминациялығын жоғалтуы және қоршаған орта факторларының әсері себебінен оларды қолдану, тасымалдау, сақтау кезінде пациенттердің немесе тұтынушылардың денсаулығына зиян келтіру мүмкіндігін болдырмауы;
6) байланысқа түсетін материалдармен, заттармен және газдармен бірге қауіпсіз қолданылады. Егер медициналық техника және медициналық мақсаттағы бұйымдар дәрілік заттармен қолдануға арналса, олар көрсетілген дәрілік заттарды регламенттеуші сапа және қауіпсіздік бойынша нормативтік құжаттарға сәйкес тиісті дәрілік заттармен үйлесімділігі ескеріле отырып әзірленуі және өндірілуі тиіс.

2. Медициналық техника мен медициналық мақсаттағы бұйымдардың
сәулелену немесе генерирлейтін сәулелену қауіпсіздігіне
қойылатын талаптар

10. Сәуле шығаратын немесе сәулеленуді генерациялайтын медициналық техника пациенттердің, пайдаланушылардың және басқа да тұлғалардың сәулеленуі неғұрлым төмен дәрежеге дейін жеткізілуі әр медициналық техниканың нақты түрінің тағайындалуын ескеріп, бірақ бұл ретте оны тиісті белгіленген деңгейде терапиялық және диагностикалық мақсатқа қолдану шектелмей әзірленуі және жасалуы тиіс.
11. Сәулеленудің қауіпті деңгейлерін генерациялауға арналған медициналық техниканы пайдаланушы арнайы медициналық мақсатқа қажетті қаупіне қарағанда пайдасы мейлінше маңызды болып саналатын, осындай сәулеленуді басқару мүмкіндігі болуы тиіс.
12. Ықтимал қауіпті иондайтын сәулеленуді генерациялауға арналған медициналық техника осындай сәулелену туралы ескертетін бейне немесе дыбыстық заттармен жабдықталуы тиіс.
13. Пациенттерге, пайдаланушыларға және басқа да тұлғаларға абайсыз жанама немесе шашыраған сәулелену әсері неғұрлым төмен деңгейге жеткізілуі тиіс.
14. Иондайтын сәулеленуді генерациялауға арналған медициналық техника медициналық техниканың тағайындалуын ескере отырып, сәулеленудің сандық, геометриялық және сандық көрсеткіштерін өзгерту және реттеу мүмкіндігін, сондай-ақ пациент пен пайдаланушыға ең төменгі әсер еткенде белгіленген медициналық мақсат үшін тиісті бейнені және (немесе) соңғы сапаны қамтамасыз етуі тиіс.
15. Терапиялық радиологияға (рентгенология) арналған иондайтын сәулеленуді генерациялайтын медициналық техника сенімді бақылау және сәулелену дозасымен, түрімен, энергиясымен және сәулені қайта бөлумен меңгеру қамтамасыз етуімен жобалануы және дайындалуы тиіс.
16. Сәулеленуді генерациялайтын медициналық техниканы пайдалану құжаты сәулелену сипаты, пациентті немесе пайдаланушыны қорғау құралдары туралы, дұрыс пайдалану және дұрыс монтаждалмауына (орнатылуына) байланысты қауіпті болдырмау тәсілі туралы толық ақпаратты қамтуы тиіс.

3. Қоректендіру көзіне немесе ішкі қоректендіру көзіне
қосылатын медициналық техника қауіпсіздігіне қойылатын талаптар

17. Құрамына электронды бағдарламаланатын жүйе кіретін медициналық техника оның тағайындалуына сәйкес осы жүйелердің қайталануын, сенімділігін және тиімділігін қамтамасыз ету үшін әзірленуі тиіс.
18. Пайдаланған кезде пациенттердің қауіпсіздігі ішкі қоректендіру көзіне (энергиямен жабдықтау) байланысты медициналық техника қуат көзінің жағдайын анықтайтын құралдармен жабдықталуы тиіс.
19. Пайдаланған кезде пациенттердің қауіпсіздігі сыртқы қуат көзіне (энергиямен жабдықтау) байланысты медициналық техниканың энергиямен қамтамасыз етуде бұзылулар туралы ескертуге арналған дабыл жүйесі болуы тиіс.
20. Пациенттің бір немесе бірнеше клиникалық өлшемдерін бақылауға арналған медициналық техника пациент пен пайдаланушыға пациенттің өліміне немесе оның денсаулық жағдайының аса нашарлауына ықпал ететін жағдай туралы ескертуге арналған тиісті дабыл жүйесімен жабдықталуы тиіс.
21. Медициналық техниканы әзірлеу және өндіру кезінде:
1) әдеттегі жағдайда басқа құрал-жабдықтың немесе техниканың жұмысын бұзуы мүмкін электромагниттік өрістер неғұрлым төмен қауіп дәрежесіне түсірілуі тиіс;
2) медициналық техниканы орнату (пайдалану) жөніндегі нұсқаулыққа сәйкес дұрыс орнатылған жағдайда әдеттегі қолдану кезінде және бірлі-жарым бұзылу жағдайларында электр тоғымен жазатайым зақымдану қаупі болмауы тиіс.

4. Электромагниттік үйлесімділіктің қауіпсіздігіне
қойылатын талаптар

22. Медициналық техника мен медициналық мақсаттағы бұйымдар электромагниттік өрістердің туындау қаупін ең төменгі жағдайға жеткізіле отырып әзірленуі тиіс, әйтпесе ол басқа медициналық техниканы немесе медициналық мақсаттағы бұйымдарды пайдалану немесе қолдану кезінде жұмыс істеуін бұзуы немесе сапасына әсер етуі мүмкін.
23. Медициналық техника мен медициналық мақсаттағы бұйымдар олардың электромагниттік жағдайында оларға қойылатын талаптар электромагниттік кедергілерде ғана емес, аспаптың жұмысы кезінде туындаған қуат беруші желінің сәулелендіретін радиокедергі деңгейі медициналық стандарттан аспауы тиіс.
24. Медициналық техника мен медициналық мақсаттағы бұйымдар үшін электромагниттік үйлесімділігі мен олардың сынақтарын қамтамасыз етуге қойылатын талаптар әдістемелері электромагниттік үйлесімділік саласындағы стандарттарға сәйкес келуі керек. Қойылатын талаптар жеткіліксіз болған жағдайда нақты медициналық техника мен медициналық мақсаттағы бұйымдарға қолданылатын жеке стандарттың арнайы талаптарын есепке ала отырып толықтырылады немесе нақтыланады.

5. Медициналық техника мен медициналық мақсаттағы бұйымдардың
жұқпалы және микробтық ластану қауіпсіздігіне қойылатын
талаптар

25. Медициналық техника мен медициналық мақсаттағы бұйым және оларды қолдану үдерісі пациентке, пайдаланушыға немесе онымен жанасатын басқа тұлғаға ең төменгі жұқтыру қаупімен немесе мүлдем болдырмауды көздеп жобалануы тиіс. Пациент медициналық техниканы және медициналық мақсаттағы бұйымдарды қолдану кезінде оның оңайлығы және ластауды неғұрлым төмендету мүмкіндігі қарастырылуы тиіс.

6. Медициналық техника мен медициналық мақсаттағы бұйымдардың
зарарсыздануы бойынша қауіпсіздігіне қойылатын талаптар

26. Медициналық мақсаттағы зарарсызданған бұйымдар немесе медициналық техниканың және медициналық мақсаттағы бұйымдардың зарарсызданған құраушы бөліктері әзірленуі, дайындалуы және олардың зарарсыздығын нарыққа орналастырған кезде, адамға зақым келтіретін әсерін болдырмау мүмкіндігін қарастыра отырып (патогенді биологиялық агенттердің, уытты және пирогенді әсерінің болуына негізделген жұқпалы аурулардың болуы) және зарарсыздығын белгіленген сақтау шарттарында және тасымалдағанда қорғаныш қаптаманы бұзғанға немесе ашқанға дейін сақтауды қамтамасыз ету үшін бір реттік қаптамаға және (немесе) қорғаныш қаптамаға салынуы тиіс.
27. Медициналық мақсаттағы бұйымдар немесе медициналық техника мен медициналық мақсаттағы бұйымдардың зарарсыздандырылған болуы тиіс құраушы бөліктері өндірістің технологиялық үдерісіне сәйкес зарасыздандырылады.
28. Медициналық мақсаттағы бұйымдардың қаптамалары немесе медициналық техниканың және медициналық мақсаттағы бұйымдардың құраушы бөліктері тазалықтың белгіленген дәрежесінде оларды қолдану алдында зарарсыздандыру қажет болса, микробпен ластану қаупінің ең төменгі дәрежесіне түсіру және сақталуын қамтамасыз етуі тиіс. Қаптама өндіруші (дайындаушы) ұйым көрсеткен зарарсыздандыру әдісіне сәйкес келуі тиіс.
29. Қаптама және (немесе) таңбалау зарарсыздандырылған немесе зарарсыздандырылмаған болып шығарылатын медициналық техника мен медициналық мақсаттағы бұйымдардың арасындағы сәйкестікті немесе ұқсастықты ажыратуды қамтамасыз етуге тиіс.

7. Трансфузиялық-инфузиялық терапияда және қан мен оның
компоненттерін қайта өңдеу мен сақтау үшін пайдаланылатын
техникалық құралдардың қауіпсіздігіне қойылатын талаптар

30. Қанды, оның өнімдерін және қанды алмастыратын ерітінділерді дайындау, алу, сақтау, тасымалдау және қолдану үшін тек бір мәрте қолданылатын контейнерлерді, қосатын (өткізетін) магистральдарды (жүйелерді) және құрылғыларды пайдалануға болады.
Қан мен оның компоненттерінің трансфузиясы үшін бір мәрте қолдану құрылғысы донорлық қан мен оның компоненттерінен микроагрегаттар мен ұйыған қандарды алып тастауға арналған арнайы сүзгілермен жабдықталуы тиіс.
Қан мен оның компоненттерін құюға арналған полимерлік құрылғы бір мәрте қолданылатын инемен жабдықталуы және зарарсыз болуы тиіс.
31. Трансфузиялық-инфузиялық терапияны жүргізуге арналған бір мәрте қолданылатын құрылғының түтікшесі мен тамызғышы жай көзбен-ақ ауа көпіршіктерін және сұйықтық деңгейін көруге мүмкіндік беретін материалдан жасалуы тиіс.
32. Бір мәрте қолданылатын контейнерлер, жүйелер мен құрылғылар алдын ала дезинфекциясыз арнайы құрылғыларда жойылады (кәдеге жаратылады).
33. Қан мен биопрепараттарды бөлуге арналған рефрежераторлы центрифуга мынадай талаптарға сай келуі тиіс:
1) жұмыс камерасындағы берілген температураны тұрақты ұстап тұруды қамтамасыз ету;
2) ротордың айналуы кезінде қақпақты автоматты жауып тастау және ротордың теңгерімі болмаған кезде аппаратты автоматты түрде өшіруді қоса алғанда, пайдаланушы мен қоршаған ортаны механикалық әсерден тиімді қорғауды қамтамасыз ету.
34. Плазманы тез мұздатқыштың:
1) жұмыс камерасындағы температура мәнін индикациялаудың көрнекі жүйесінің болуы;
2) қолданушы төмен температуралы үстіңгі қабаттар мен желілердің термиялық әсерлерінен сенімді қорғауды қамтамасыз етуі тиіс.
35. Электрлі медициналық тоңазытқыш мынадай талаптарға сай болуы тиіс:
1) биоөнімдер жартылай да, толық та салынған кезде жұмыс камерасының жалпы көлемі бойынша берілген температуралық режимді ұстап тұруын сенімді қамтамасыз ету;
2) түрлі топтарға жататын биоөнімдерді бөліп сақтау үшін ішкі бөлімдері (сөрелері) болуы;
3) есікті бекітуге және мөр қоюға арналған құралдың болуы;
4) жұмыс камерасында және ұзақ мерзімді құжатталған (кемінде 48 сағат) температураның өзгерістерін жазуда температураның мәнін индикациялау құрылғысының болуы;
5) температураның бастапқы мәнінен ауытқуы кезінде апаттық (дыбыс және жарық) дабыл беретін жүйенің болуы;
6) электр қуатының (кемінде 24 сағат) апаттық сөніп қалуы кезінде жұмыс камерасындағы берілген температуралық режимді ұстап тұратын резерв жүйесінің болуы.
36. Қан жасушаларын сақтауға арналған криогенді қондырғылар мынадай қауіпсіздік талаптарына сай болуы тиіс:
1) жұмыс камерасындағы берілген аса төмен температураны сенімді ұстап тұруды қамтамасыз ету;
2) сақтандырғыш клапанның болуы және жұмыс камерасының сенімді тұмшалануын қамтамасыз ету;
3) пайдаланушының термиялық әсерден сенімді сақтауды қамтамасыз ету;
4) үй-жайдағы ауа ортасының жай-күйін бақылау тетіктерімен және индикаторлармен жарақтандырылуы тиіс.
37. Жылжымалы термоконтейнер:
1) биологиялық өнімдерді тасымалдау уақытында берілген мәннен жоғары болмайтын, бірақ кемінде 8 сағат бойы температураны ішкі кеңістікте ұстап тұруды қамтамасыз етуі;
2) температураның өзгерістерін бастапқы тіркеудің ішкі (немесе ішіне салынатын) құрылғысының болуы;
3) термоконтейнердің қақпағын сүргілеуге арналған аспаптың болуы;
4) тасымалдау кезінде термоконтейнер қақпағының кездейсоқ ашылып кетуіне жол бермейтін белгілеу элементтерінің сенімді жүйесі болуы тиіс.
38. Тромбоциттік массаны сілкігіш (араластырғыш):
1) бұйымның берілген жиілікте және жұмыс платформасының ілгері-кейінді қозғалысы амплитудасының үзіліссіз жұмыс режимін;
2) қызметкерлерді платформаның қозғалысы кезіндегі механикалық жарақат алудан қорғауды;
3) платформа қозғалысының санкцияланбаған тоқтауы туралы дабылдың болуын қамтамасыз етуі тиіс.
39. Полимерлік магистралдарды (түтікшелерді) жалғауға (дәнекерлеуге) арналған құрылғы:
1) жалғанған магистральдар тігісінің тұмшаланғандығы мен зарарсыздығын;
2) полимер түтікшелер қабырғаларының диаметрі мен қалыңдығына байланысты дәнекерлеу уақытын өзгертуді;
3) технологиялық манипуляциялар кезінде жалғасу тұтастығының бұзылуына жол бермейтін тігістің беріктігін қамтамасыз етуі тиіс.

Дата добавления: 2014-11-07