Беседа третья. О изобретении

(1) Вопрос: Что убо изобретение есть?

Ответ: Изобретение есть первая часть риторики, поучающая изобретати доводы или изветы слова предложеннаго.

(2) Вопрос: Что есть довод?

Ответ: Есть укрепление, достоверну повесть творящее.

(3) Вопрос: Суть ли разныя виды изветов?

Ответ: Суть.

(4) Вопрос: Многократныя ли?

Ответ: Сугубыя. Но суть виды изветов сугубы: уверяющия и понуждающия. Уверяющия нарицаются просто доводы или изветы. Понуждающия же именуются страсти.

(5) Вопрос: Чесо ради тако?

Ответ: Яко страсти во человеце, возбуждающе разумей любовь, милосердие, гнев, ненависть, омерзение, боязнь, скорбь и прочая, не просто уверяют, но аки нуждею влекут ко соизволению на тое, о чем глаголет проповедник.

(6) Вопрос: Требуют ли некогда доводы ко подкреплению самых себе доводов или должны суть сами собою тверди и уверителни быти?

Ответ: Суть многие иже требуют, но доводы доводов паки сугубы суть: инныя нарицаются основание, инных же умножение.

(7) Вопрос: Что основание и что умножение?

Ответ: Основание есть простое подкрепление. Умножение же есть не токмо крепку, но и зело крепку и велику вещь творящее и сим от основания разнствует, яко оное подкрепляет токмо, аще что нетвердо быти мнится. Сие же и подкрепляет нетвердое и великим творит еже мнится быти невелико, например, святый Златоустый хощет показати, что Иаков патриарх, имевый великую скорбь по погубленном Иосифе, глаголет во второй книзе о смотрении Божием:

Братия Иосифовы, ризу его окровавленну отцу показующе, различною его скорбию удручиша, не точию бо о самой токмо смерти рыдаше, но и о странном виде тоя смерти. И многая стекошася, яже ум его помрачаху, и еле не во отчаяние вметаху: яко любимой жены сын, яко лучший от иных, яко наипаче себе возлюбленный, яко в самом еще цветном возрасте, яко от него посланный, яко не в дому, ни на ложи, ни отцу предстоящу, ни глаголяй что, ниже послушаяй, яко не общею всех смертию, яко жив зверей свирепием раздран бысть, яко ниже мощей его обрести мощно бе и земли предати, и яко скорбь сия не в юности Иакову случися, когда лутче ю понести можаше, но в последней старости. Доселе Златоустый.

Видиши зде, како к подкреплению слова о скорби Иякова довлеяше токмо возспомянути смерть сыновню, он же, хотя скорбь ту велику зело показати, зри, коль изрядно отвсюду собрал умножение, совокупляюще тая, яже болезнь умножают.

(8) Вопрос: Воистинну избранно и силно есть сие учение. Но коим убо образом доводы, страсти, основания и умножения изобрести возмогу?

Ответ: Места суть от тщателных древних риторов на сие усмотренная, в них же аки в совровищных хранилищах вся ко подкреплению слова обрести есть мощно. Суть же видом сугубая: внутренняя и внешняя.

(9) Вопрос: Кая суть внутренняя?

Ответ: Яже суть внутри самой вещи или внутрь разсуждения о ней составляемаго обретаются. Суть же числом 16:

1) описание,

2) частей разделение,

3) имени сказание,

4) сопряженная,

5) род и

6) вид,

7) подобие

8) и неподобие,

9) противная и

10) привязаемая,

11) предыдущая и

12) последующая,

13) невместимая,

14) вины,

15) содеяния вин,

16) сравнение болших с меншими и равных с равными.

(10) Вопрос: Внешняя же кая суть места?

Ответ: Сугуб род мест внешних есть: свидетельства слова и образы дела.

(11) Вопрос: Что есть слова свидетельства?

Ответ: Суть ветхаго и новаго завета писания, правила соборов церковных, предания некая отеческая, людей мудрых или честных изречения. Такожде и живых свидетелей изветы и прочая.

(12) Вопрос: Образы же дела что суть?

Ответ: Вся добрая или злая делания мужей древних, яже суть повести многая в ветхом завете, в книгах бытия, исход, числ, втораго закона, в книгах наипаче судейских, царств, Есфирь, Июдифь, Иовлих Маккавейских, в новой же благодати – евангельския повести и деяния апостольская.

Та же вся историческая книги, содержащая в себе жития святых или от внешних повестителей древния брани и прочая.

(13) Вопрос: Скажи вократце во коемждо особь месту внутреннем, о внешних бо, понеже ясная суть, не требую извещения.

Ответ: И о внутренних разсуждати не есть трудно, реку убо сокращение, елико довлеет ко их познанию. Всякая вещь, животная или неживотная, имать себе инная согласныя, инна же противны, аки бы некое родство и врагов. От родства убо или от согласных вещи суть:

описание самаго ея естества;

части, от них же слагается;

сопряженная со собою по имени или по естеству;

род, в нем же содержится;

и вид, иже есть часть рода;

свойство – случай;

вина, от нея же походят и плоды, иже от нея происходят;

привязанная, с ними же сходится или ей последствуют или предыдут – и сия суть: место, время, образ, и пособие, деяния – предидущая, купноидущая и последствующая;

к тому же и равная и подобная. Сия вся суть некое родство вещей, без них же ни едина вещь не бывает.

(14) Вопрос: От сопротивных же кия обретаются?

Ответ: Вся тая, в них же некое есть несогласие и противство ко вещи той, яко же неравная, неподобная, противословная и прочая разньствия, ими же вещь от прочих вещей разнствит: или в естестве, яко человек от зверя; или во свойстве, яко быстроумный от косноумнаго; или во случаю, яко богатый от нищаго и прочая. Сия же вся тако разсмотревше, удобно есть елико довлеет познати и разумети.

(15) Вопрос: Скажи убо, коим образом в коемждо том месте изобретати имам доводы подкрепления слову предложенному.

Ответ: Сие наипаче нужно есть ведати, да убо совершенно уразумееши. Веждь первие: яко во всяком предложении (предложение же есть всякое слово, со разумом совершенным изреченное) две обретаются началныя части: подлог и прилог.

Подлог есть самая вещь, о ней же слово глаголется.

Прилог же есть другая вещь, яже к первой словом прилагается или согласная ей, или противная: согласная – соединяющеся, противная – отделяющеся. Например, сие предложение: Христос есть Богъ истинный имать подлог Христос, сия бо вещь есть, о нем же глаголет предложение; Бог же истинный есть прилог, сие бо словом ко Христу прикладается. Прикладает же ся соединением есть, ибо согласно есть. В сем же другом предложении Слово Божие не есть тварь паки Слово Божие есть подлог, тварь же прилог есть. Но понеже сей прилог подлогу сему несогласен есть, не соединением, но прекословием ему приложися, не есть истинный прилог.

(16) Вопрос: Разумно мне се, но к чесому полезно?

Ответ: Сие уразумевши, зело удобно изобрящеши многия доводы, твое предложение подкрепляющия или во внутренних или во внешних местех.

(17) Вопрос: Что убо творити имам?

Ответ: Иди через вся места, в них же или подлога и прилога или все родство и противство содержится. И не пытуй, аще кое от согласных подлога согласует прилогу, или аще кое от согласных прилога согласует подлогу, или аще не согласует и противится. Аще бо что от согласных прилога согласует подлогу, то и сам прилог подлогу согласует. Аще ли ни, то ниже прилог ему согласует. И тако яве подкрепиши речь твою.

(18) Вопрос: Изясни сие примером.

Ответ: Пример и образ того да будет вышереченнаго слов предложение, еже слагати зде начинаем. Предложение убо бяше яко еретицы достойни суть проклятия. В сем предложении подлог есть еретицы, о них бо есть слово. Прилог же есть достойни проклятия. Начнем разсуждати согласная с подлогом. Пойдем убо к первому месту, еже есть описание естества вещи. Зри, кое может быти описание ереси. Святый апостол в послании своем тако еретиков описует: Сии суть во любвах ваших сквернителе с вами ядущеи, без боязни себе пасущие; облацы безводнии, от ветр преносимии; древеса есенна безплодная, дважды умерша искорененная; волны свирепыя моря, воспеняющая своя стыдения; звезды прелестная, им же мрак вовеки тмы блюдется.

Сие описание ереси приличное есть прилично подлогу, прилично и прилогу, си есть достоинству проклятия, яве есть убо и прилог подлогу приличен есть. И глаголи тако: сквернителе во любвах, без боязни себе пасущия; облацы безводныя и прочая достойни суть проклятия. Но сии суть еретицы, убо они проклятия суть достойни.

Аще бо двое со единым третиим согласуются, и между собою имут согласие, ибо егда хощем мерити два столпа разстоящая, равна ли или не равна суть, примеряем до единаго жезл, потом же до другаго. И аще оба столпа томужде жезлу соравняются, яве есть, яко и между собою равна суть.

Се уже имамы един довод предложения нашего, от описания вещи изобретенной на подкрепление.

(19) Вопрос: Поступи до иных мест.

Ответ: Единым образом отвсюду доводы собираются. Обаче желанию твоему хощу удовлетворити. Раздели на части ересь (веждь же, яко многажды части и види тожде суть, яко же и зде): инная ересь – арианская, инная – несторианская, инная – македониева, инная – оригенова, инная – евтихиева, аполинариева, савелиева, люторова, калвинова, латинская, армейская и прочая.

(20) Еще имя изтолкуй.

Ересь убо сказуется от греческаго языка самомненное избрание, егда кто тако свое мнение любит, яко оное вышше самой предвечной истинны от Бога откровенной превозносит и ценит. Подобный в том суще гордому диаволу или ангелу, иже вожделел быти равен Вышнему.

(21) В коем же роде содержится ересь? Во лже.

(22) В коем виде лжи?

В том, иже сопротивляется совести своей и самому Святому Духу, о ней же Христос рече: вы присно Святому Духу противитеся.

(23) Пойди к подобию. Кое даси подобие еретиком? Подобны суть волком, яко же их сам Христос нарицает.

(24) Пойди ко соравняемым: сравни ересь со инными грехами и обрящеши ю быти паче всех грехов мерску пред Богом.

(25) Испытай к тому противная. Кая благая со ересию сочетатися не могут?

Не сочетовается мир и тишина, не любовь, не благость Божия, ниже конечне вечное житие. И паки елико любително есть Богу едино от противных, толико мерско другое: уведавше убо, коль любимо и приятно есть Богу истинное благочестие, понеже православную церковь невесту свою возлюбленную нарицает, лепо есть уведати, коль ему есть мерско злочестие.

(26) Та же разсмотри вся привязаемая: место, время, пособие, образ, деяния, знамения и прочая. И обрящеши ересь, помрачающую день спасения, время благоприятно, оскверняющую святая места, пособием диавола и оружною силою свое учение проповедающую, знаменанную во Иоанновом откровении и Данииловом многовидным страшилами сим подобная.

(27) Испытай уже о вине: от кого и от коего корене еретицы происходят?

Сам убо отец лжи диавол еретиков раждает. По словесем Господним: вы от отца диавола есте и плевелы, яже образ суть еретическаго мудрования от врага человека между пшеницею всеяны быти глаголются. Веждь же сие наипаче и всегда в доброй храни памяти, яко преизобилнейшая места всех подкреплений и аки источники неисчерпаемая суть два сия: первый – привязуемая, о нем же уже рехом; вторый – плоды, или изчадия, от коейждо вещи аки от своей вины раждаемая. И многажды от единаго от сих мест всецелое подкрепление слову избирается без всякаго труда. Например: поищи, кия плоды раждает ересь, и зри, коль многия обрящеши. Перво, повреждает церковь, овцы христовы люте разграбляющи, не тако бо зелным и свирепым гонением идолослужителским, яко ересию умалися верных собрание. И не тако во время губительства телеса человеческия, яко души во время смущения церковнаго повреждаются. Много бы о том глаголати требе довлеет на подкрепление того.<… >

Вопросы и задания

1. Каково определение риторики в «Старообрядческой риторике»? Что значит «добре глаголати» (хорошо говорить)? Считается ли хорошо говорящим («добре глаголющим») тот, кто «погрешает на Бога»?

2. Какие роды слова выделяются в «Старообрядческой риторике»?

3. Какие части слова (композиции) описаны в сочинении?

4. Каково определение довода? Какие два вида доводов выделены в «Старообрядческой риторике»? Почему страсти также отнесены к доводам? Какие виды страстей описаны в этом сочинении (Беседа 3, № 5)?

5. Как распространяется речь? В чем разница между основанием и умножением (см. беседу 3, № 7)? Какому современному понятию соответствует термин умножение! Какими выразительными средствами пользуется автор риторики, чтобы показать пример «умножения» слов?

6. Какие внутренние места описывает неизвестный автор риторики и насколько названия «мест» отличны от предыдущих риторик? В чем своеобразие примеров, используемых автором данной риторики?

7. На какой вид речи ориентируется неизвестный автор (см. № 18)? С какими целями написана старообрядцами данная «Риторика»?

Дата добавления: 2014-11-26