III. ТОДЛТН. Дорҗ ямаран һазрур зуульчлв?

II. УМШТН

Дорҗ ямаран һазрур зуульчлв?

Дорҗин эцк Австральд көдлнә. Австраль – йир ик арл. Эн хол цагас нааран арл болсмн. Тегәд энд бәәх зерлг аңгуд оңгдан һазрмудт харһхш. Үлгүрнь, кенгуру болн коала. Австралин бәәрн улс – аборигенмүд, дамшлтта аңһучнр болн зуульчлачнр энд 40000 җилин турш бәәнә. Австралин ик зунь элстә көдә һазр болн өндр уулмуд. Энд бәәх әмтн нурһлҗ мал өскәчнр.

Өдгә цагт австралийцнрин ик әңгнь деед үзгин болн дорд үзгин көвәһәр бәәх балһсдар бәәнә. Эннь – Брисбен, Сидней, Мельбурн болн Аделаида балһсд.

Эн хол һазр Дорҗиг йир икәр соньмсулна. Амрлһндан эн эк-эцктәһән тиигәрән йовна. Москва балһснур автобусар күрнә. Цаарандан самолётар Австралюр темцнә. Аһарт самолёт зөвәр цагтан ниснә. Энүнә терзәр өвәрц бәәдл секгднә. Цаһан үүлд ова цасн мет хаҗуһар давад йовна. Дора тегш һазр үзгднә. Зәрм һазрар өндр уулмуд, никт модд давна. Деерәс хәләхлә, йир сәәхн бәәдл һарна. Генткн: «Сидней балһснур өөрдҗ йовнавидн. Бийән белдтн», - гисн стюардессин зарлһн соңсгдв. Цугтан бийән белдцхәв. Самолет бууһад, аэродромин хаалһд орв. Энүг шишлң автобус тосч ирв. Цуг әмтн самолётасн бууһад, аэровокзалд ирцхәв. Мадн такси авад, кергтә хайгурн темцвидн. Зууран балһсна бәәдл һәәхвидн.

Сидней – Австралин сәәхн балһсдын негнь. Үүлнд күрсн өндр гермүд дүңгәлднә, ке-сәәхн афишмүд олн зүсн герләр эрәтрнә. Сәәхн цевр уульнцсар түмн әмтн йовцхана. Көлгн-күчнә магистраль нег-негән керчҗ, холд татгдна. Төмр хаалһар хурдн поездмүд гүүнә. Олн зүсн көлгн-күчн балһсна судснь болҗ, залһлда тогтана.

Сурврмудын хәрү текстәс олҗ умштн:

1. Дорҗин эцк альд көдлнә?

2. Австраль һазрин ямаран әңг?

3. Энд бәәх ямаран аңгуд талдан һазрт харһхш?

4. Австралин бәәрн улсиг яһҗ нерәднә?

5. Сидней ямаран балһсн?

*Көдлмшин девтрәр көдллһн.

растения зелёные холмы у подножия маленькие озера коала

урһмл өөдмс нуурмуд коала

Дата добавления: 2014-11-06