Жалпы ережелер 7 страница

9. Басты сот талқылауы

Басты сот талқылауы – бірінші сатыдағы соттың қылмыстық істі мәні бойынша қарауы.

Басты сот талқылауының кезеңдері:

1) басты сот талқылауының дайындық бөлімі;

2) Сот тергеуі;

3) Сот жарыссөзі;

4) сотталушының соңғы сөзі;

5) үкім шығару.

Дайындық бөлімінде мына мәселелер қарастырылады:

- Басты сот талқылауының ашылуы

- Басты сот талқылауына шақырылған адамдардың келуiн тексеру

- Аудармашыға оның құқықтары мен мiндеттерiн түсiндiру

- Аудармашыдан бас тарту туралы мәселенi шешу

- Куәларды сот отырысы залынан шығару

- Сотталушының жеке басын және оған айыптау қорытындысы көшiрмесiнiң уақтылы тапсырылғанын анықтау

- Сот құрамын, процеске басқа қатысушыла жариялау

- Сотталушыға оның құқықтарын түсiндiру

- Басқа да процеске қатысушылардың құқықтары мен міндеттерін түсіндіру

- Iске қатысушы адамдардың бiрi болмаған кезде iстi тыңдау мүмкiндiгi туралы мәселенi шешу.

Сот тергеуі:

- Сот тергеуi айыптаушының сотталушыға таққан айыбының мәнiсiн баяндаудан, ал жеке айыптау iстерi бойынша - арыз берген адамның немесе оның өкiлiнiң, ал олар болмағанда - сот отырысы хатшысының шағымды баяндауынан басталады.

- Сотталушының көзқарасын анықтау

- Сотталушыдан жауап алу;

- Сотталушының айғақтарын жария ету;

- Жәбірленушіден жауап алу;

- Сарапшы қатысса одан жауап алу;

- Куәлардан жауап алу;

- Дәлелдемелерді зерттеу.

Сот жарыссөзі

Сот жарыссөзiне қатысушының өтiнiшi бойынша оған сот жарыссөзiне дайындалу үшiн уақыт берiледi, ол үшiн төрағалық етушi оның ұзақтығын көрсете отырып, сот отырысында үзiлiс жариялайды.
Сот жарыссөзi айыптаушының, жәбiрленушiнiң немесе оның өкiлiнiң, азаматтық талапкердiң және азаматтық жауапкердiң немесе олардың өкiлдерiнiң, сотталушы мен қорғаушының сөздерiнен тұрады. Iске қатысушылардың сөздерiнiң реттiлiгiн олардың ұсыныстары бойынша сот белгiлейдi, бiрақ барлық жағдайларда бiрiншi болып айыптаушы сөз алады.
Егер мемлекеттiк айыптауды бiрнеше мемлекеттiк айыптаушы қолдаса, iске бiрнеше жәбiрленушi, қорғаушы, азаматтық жауапкер мен олардың өкiлдерi, азаматтық талапкерлер мен олардың өкiлдерi, сотталушылар қатысса, төрағалық етушi өз сөздерiнiң кезектiлiгiн өзара келiсуi үшiн оларға уақыт бередi. Қажет болғанда бұл үшiн сот отырысында үзiлiс жариялануы мүмкiн. Егер аталған адамдар жарыссөздегi өз сөздерiнiң кезектiлiгi туралы келiсiмге келе алмаса, сот олардың пiкiрлерiн тыңдап болып, сөз кезегi туралы қаулы алады.
Сот жарыссөзiне қатысушылар өз сөздерiнде сот отырысында зерттелмеген дәлелдемелерге сiлтеме жасауға құқылы емес. Сотқа жаңа айғақтар ұсыну қажет болса, олар сот тергеуiн қайта бастау туралы өтiнiш жасай алады.
Сот сот жарыссөзiнiң ұзақтығын белгiлi бiр уақытпен шектей алмайды, алайда төрағалық етушi, егер жарыссөзге қатысушы азаматтардың сөзi қаралатын iске қатысы жоқ мән-жайларға қатысты не сот отырысында зерттелмеген дәлелдемелерге негiзделген болса, оларды тоқтатуға құқылы.

Сотталушының соңғы сөзі

Сот жарыссөзi аяқталған соң, төрағалық етушi сотталушыға соңғы сөз бередi. Сотталушыға оның соңғы сөзi кезiнде ешқандай сұрақ қоюға жол берiлмейдi.
Сот сотталушының соңғы сөзiнiң ұзақтығын белгiлеуге құқылы емес. Төрағалық етушi, егер сотталушының сөзi қаралған iске қатысы жоқ мән-жайларға қатысты болса, оны тоқтатуға құқылы.

Үкім шығару

Үкiм - айыпталушының кiнәлiлiгi немесе кiнәсiздiгi және оған жаза қолдану немесе қолданбау туралы мәселе бойынша бiрiншi, апелляциялық сатыдағы сот шығарған сот шешiмi.

Үкім:

1) ақтау үкімі;

2) айыптау үкімі.

10. Соттың заңды күшіне енбеген үкімдері мен қаулыларын қайта қарау. Апелляциялық саты

Апелляциялық саты – бiрiншi сатыдағы соттың заңды күшiне енбеген үкiмдерiне, қаулыларына апелляциялық шағымдар (наразылықтар) бойынша iстi мәнi бойынша қарайтын сот.

Апелляция термині латынның «appellacio» «жүгіну» деген сөзінен шыққан. Яғни бұл істі қараған кезде төменгі сатыдағы соттың үкімін, қаулысы мен өзге де шешімін қайта қарау мақсатында жоғары тұрған апелляциялық сотқа жүгіну болып табылады.

Апелляциялық сатының міндеті:

Ø Қылмыстық іс жүргізуде іс үргізу заңының дұрыс қолданылуын қамтамасыз ету;

Ø Сот шығарған шешімдерде жіберілген қателіктерді қалпына келтіру;

Ø Тараптардың шағымдану бостандығын қамтамасыз ету;

Ø Істі қарау барысында соттың және тараптардың жауапкершілігін күшейту.

Апелляциялық (жеке) шағымдар, наразылықтар үкiм, қаулы шығарған сот арқылы берiледi.

Апелляциялық (жеке) шағымдар, наразылықтар үкiм (қаулы) жарияланған күннен бастап он бес тәулiк iшiнде берiлуi мүмкiн, ал қамауда отырған сотталған адам оны өзiне үкiмнiң (қаулының) көшiрмесi табыс етiлген күннен бастап нақ сондай мерзiмде бере алады.

Iс ол келiп түскен күннен бастап бiр айдан кешiктiрiлмей апелляциялық тәртiппен қаралуы тиiс. Егер сот жаңа материалдар мен дәлелдемелердi зерттеу және жаңа үкiм шығару қажеттiгiне негiз бар деп тапса, iс ол келiп түскен күннен бастап екi айдан кешiктiрiлмей апелляциялық тәртiппен қаралуы тиiс. Дәлелдi себептер болған кезде, бұл мерзiмдер iс жүргiзiп жатқан апелляциялық сатыдағы соттың қаулысы бойынша бiр айға ұзартылуы мүмкiн. Қажет болған жағдайда iстi апелляциялық сатыда қарау мерзiмiн одан әрi ұзарту тиiстi облыстық және оған теңестiрiлген соттың алқа төрағасының қаулысы бойынша жүзеге асырылуы мүмкiн. Бұл ретте iстi қарау мерзiмiн әрбiр ұзарту бiр айдан аспауға тиiс.

Апелляциялық сатының өкiлеттiгi:

1) сотталған адамның, жәбiрленушiнiң және iске қатысушы басқа да тұлғалардың денсаулық жағдайына, отбасы жағдайына және бұрынғы сотталғандығы туралы деректерге байланысты құжаттарды талап етiп алуға, тараптардың өтiнiштерi бойынша басқа да құжаттарды талап етiп алуға;
2) сот-психиатриялық немесе өзге де сараптама тағайындауға;
3) сот отырысына қосымша куәларды, сарапшыларды, мамандарды шақыртып, олардан жауап алуға, тараптар табыс еткен немесе олардың өтiнiштерi бойынша талап етiп алынған жазбаша, заттай немесе өзге де дәлелдемелердi зерттеуге;
4) бiрiншi сатыдағы сот зерттеген материалдарды дәлелдеме ретiнде пайдалануға жол берiлмейдi деп тануға және оларды дәлелдемелер қатарынан алып тастауға;
5) бiрiншi сатыдағы сот дәлелдемелер қатарынан алып тастаған материалдарды дәлелдеме ретiнде пайдалануға жол берiледi деп тануға және оларды зерттеуге;
6) азаматтық талап қоюға қатысты мән-жайларды зерттеуге және азаматтық талап қою бойынша шешiм қабылдауға;
7) iстiң барлық материалдарын толық, жан-жақты және объективтi түрде зерттеудi қамтамасыз ету және iс бойынша ақиқатты анықтау үшiн қажеттi басқа да iс-әрекеттердi орындауға құқылы.

Апелляциялық саты қабылдайтын шешiмдер:

1) бiрiншi сатыдағы соттың үкiмiн (қаулысын) – өзгерiссiз, ал апелляциялық (жеке) шағымды, наразылықты қанағаттандырусыз қалдыру туралы;
2) үкiмдi өзгерту туралы;
3) үкiмнiң күшiн жою және iстi қысқарту туралы;
4) айыптау үкiмiнiң күшiн жою және ақтау үкiмiн шығару туралы;

5) ақтау үкiмiнiң күшiн жою және айыптау үкiмiн шығару туралы;
6) алқабилердiң қатысуымен шығарылған үкiмнiң күшiн жою және iстi жаңадан сот қарауына жiберу туралы;
7) үкiмнiң күшiн жою және iстi ҚІЖК-нің 303-бабының бiрiншi бөлiгiнде көрсетiлген негiздер бойынша қосымша тергеуге жiберу туралы;
8) қаулыны өзгерту, жаңа қаулы қабылдау арқылы қаулының күшiн жою туралы шешiмдердiң бiрiн қабылдайды.

11. Кассациялық шағымдар, наразылықтар бойынша істі қарау

Кассациялық саты – бiрiншi және апелляциялық сатыдағы соттың заңды күшiне енген үкiмдерiне, қаулыларына кассациялық шағымдар (наразылықтар) бойынша iстi қарайтын сот.

Кассациялық сатыдағы сот үкiмдi (қаулыны) шығарған соттың қылмыстық және қылмыстық iс жүргiзу заңдарының нормаларын сақтауын тексередi және соның негiзiнде үкiмнiң (қаулының) заңдылығын, негiздiлiгiн және әдiлдiгiн тексередi.

Iс кассациялық сатыға келiп түскен күннен бастап бiр айдан кешiктiрiлмей қаралуға тиiс. Бұл мерзiм iстiң қиындығына немесе көлемiнiң үлкендiгiне байланысты, сондай-ақ өзге де дәлелдi себептер болған кезде iстi қарайтын соттың қаулысымен, бiрақ әр ретте бiр айдан аспайтын мерзiмге ұзартылуы мүмкiн.

Кассациялық сатыдағы соттың өкiлеттiгi:

1) сотталған адамның денсаулық жағдайына, отбасы жағдайына және бұрынғы сотталғандығы туралы деректерге байланысты құжаттарды талап етiп алуға;
2) уақыт, кеңiстiктiк тұрғысынан заңның қолданысын айқындау үшiн және бiрiншi және апелляциялық сатылардағы сот iстi шешкен кезде қылмыстық және қылмыстық iс жүргiзу заңдарының нормаларын дұрыс қолданғанын айқындау үшiн қажеттi мәлiметтердi талап етiп алуға құқылы.

Кассациялық саты қабылдайтын шешiмдер:

1) бiрiншi саты үкiмiн және апелляциялық саты қаулысын өзгерiссiз, ал шағымды немесе наразылықты қанағаттандырусыз қалдырады;
2) сот актiлерiнiң күшiн жояды және iстi тоқтатады;
3) апелляциялық сатыдағы сот актiлерiнiң күшiн жояды және бiрiншi саты үкiмiн өзгерiссiз қалдырады;
4) апелляциялық сатыдағы сот актiлерiнiң күшiн жояды және iстi апелляциялық сатыдағы сотқа жаңадан қарауға жiбередi;
5) бiрiншi сатыдағы сот актiлерiнiң күшiн жояды және егер iс апелляциялық тәртiппен қаралмаған болса, сондай-ақ бiрiншi сатыдағы сотта iс алқабилердiң қатысуымен қаралған болса, iстi бiрiншi сатыдағы сотқа жаңадан қарауға жiбередi;
6) бiрiншi саты үкiмiн және апелляциялық саты қаулысын өзгертедi;
7) үкiмнiң күшiн жояды және iстi ҚІЖК-нің 303-бабының бiрiншi бөлiгiнде көрсетiлген негiздер бойынша қосымша тергеуге жiбередi;
8) ҚІЖК-нің 387-бабында көрсетiлген мән-жайлар анықталған кезде жеке қаулы шығарады.

12. Сот шешімдерін орындау

Аудандық және оларға теңестiрiлген соттар, қылмыстық iстер жөнiндегi мамандандырылған ауданаралық сот, қылмыстық iстер жөнiндегi мамандандырылған ауданаралық әскери сот, кәмелетке толмағандардың iстерi жөнiндегi мамандандырылған ауданаралық сот, гарнизонның әскери соты шығарған бiрiншi сатыдағы сот үкiмдерi, егер оларға шағым жасалмаса немесе наразылық келтiрiлмесе, апелляциялық шағым жасау немесе наразылық келтiру мерзiмi өткен соң заңды күшiне енедi және орындалуға жатады.
Iс апелляциялық сатыда қайта қаралған жағдайда, егер үкiмнiң күшi жойылмаса, ол апелляциялық қаулы шығарылған күнi күшiне енедi. Егер апелляциялық (жеке) шағымдар, наразылық апелляциялық сатыдағы сот отырысы басталғанға дейiн керi қайтарып алынса, үкiм апелляциялық сатының шағымның, наразылықтың керi қайтарып алынуына байланысты iс жүргiзудiң тоқтатылғаны туралы қаулысы шығарылған күнi заңды күшiне енедi.
Бiрiншi сатыдағы сот үкiм заңды күшiне енген немесе iс жоғары тұрған соттан қайтарылған күннен бастап үш тәулiктен кешiктiрмей үкiмдi орындауға кiрiседi.

ҚІЖК-нің 450-451-баптарына сәйкес, үкімді орындауға кірісу туралы тараптарға хабарланады және сотталушының туыстарымен жүздесуге рұқсат беріледі.

Адамды қоғамдық жұмыстарға, түзеу жұмыстарына тартуға, бас бостандығын шектеуге немесе бас бостандығынан айыруға соттау туралы үкiмдi орындау мынадай негiздердiң бiрi болған кезде:
1) жазаны өтеуге кедергi келтiретiн, сотталушының ауыр сырқаты болса, - ол сауығып кеткенге дейiн;
2) сотталған әйелдiң жүктi болуы немесе сотталған әйелдiң жас балалары болса және жас балаларды жалғыз өзi тәрбиелейтiн еркектерге қатысты - Қазақстан Республикасы Қылмыстық кодексiнiң 72-бабында көзделген тәртiпте;
3) өрт немесе кездейсоқ апат, отбасының еңбекке жарамды жалғыз мүшесiнiң ауыр науқастануы немесе қайтыс болуы немесе басқа да төтенше жағдаяттардың салдарынан, сотталған адам немесе оның отбасы үшiн жазаны дереу өтеуi аса ауыр зардапқа әкелiп соқтыруы мүмкiн болса, сот белгiлеген алты айдан артық емес мерзiмге, ал Қазақстан Республикасы Қылмыстық кодексiнiң 74-бабының екiншi бөлiгiнде көрсетiлген адамдарға қатысты - үш айдан артық емес мерзiмге кейiнге қалдырылуы мүмкiн.

Соттылықты алып тастау туралы мәселенi жазасын өтеген адамның өтiнiшi бойынша тұрғылықты жерiндегi сот шешедi.

ҚР ҚК-нің 77-бабы 3-бөлігіне сәйкес соттылық жойылады:
а) шартты түрде сотталған адамдар жөнiнде - сынақ мерзiмi өтуi бойынша;
б) әскери қызмет бойынша шектеу немесе абақтыда ұстау түрiнде жазасын өтеген әскери қызметшiлер жөнiнде - iс жүзiнде жазаны өтеу бойынша;
в) бас бостандығынан айырумен салыстырғанда жазаның неғұрлым жеңiл түрiне сотталған адамдар жөнiнде - жазаны өтегеннен кейiн бiр жыл өтуi бойынша;
г) кiшiгiрiм немесе орташа ауырлықтағы қылмысы үшiн бас бостандығынан айыруға сотталған адамдар жөнiнде - жазаны өтегеннен кейiн үш жыл өтуi бойынша;
д) ауыр қылмысы үшiн бас бостандығынан айыруға сотталған адамдар жөнiнде - жазаны өтегеннен кейiн алты жыл өтуi бойынша;
е) аса ауыр қылмысы үшiн бас бостандығынан айыруға сотталған адамдар жөнiнде - жазаны өтегеннен кейiн сегiз жыл өтуi бойынша.

13. Сот актiлерiн Қазақстан Республикасы Жоғарғы Сотының сот қадағалауы тәртiбiмен қайта қарауы

Қадағалау сатысы - заңды күшiне енген сот шешiмдерiне өтiнiштер, наразылықтар бойынша iстi қадағалау тәртiбiмен қарайтын Қазақстан Республикасы Жоғарғы Сотының алқасы, сондай-ақ Жоғарғы Сот Төрағасының ұсынымын немесе Бас прокурордың наразылығын қарайтын, Қазақстан Республикасы Жоғарғы Сотының жалпы отырысы.

Қадағалау сатысының маңызы - тергеу не сотта істі қарау кезінде азаматтардың конституциялық құқықтары мен бостандықтарының бұзылуына жол берілуінің салдарын қайта қалпына келтіру кепілдігі.

Төменгі тұрған сот шешімдері заңды күшіне енгенннен кейін ҚІЖК-нің 459-бабына сәйкес негіздерр бойынша қайта қаралуға жатады, сонымен қатар, мемлекет қауіпсіздігіне не адам өмірі үшін орны толмас ауыр салдарды жою үшін берілген ұсыныстар қаралады.

Қадағалау тәртібімен қаралуға жатпайтын шешімдер:

- Мемлекеттiк айыптаушының және жеке айыптаушының айыптаудан бас тартуына байланысты;

- қамауға алу түрiндегi бұлтартпау шарасына және оның мерзiмiн ұзартуға санкция беру мәселелерi бойынша;

- анықтауды немесе алдын ала тергеудi жүзеге асыратын тұлғалардың iс-әрекеттерi мен шешiмдерiне немесе прокурордың iстi алдын ала тергеу сатысындағы iс-әрекеттерi мен шешiмдерiне берiлген шағымдарды шешу жөнiнде шығарылған шешімдер.

Заңды күшiне енген айыптау үкiмiн сотталған адамның кiнәсiздiгi себептерi бойынша, сондай-ақ жазаның қатаңдығына қарай онша ауыр емес қылмыс туралы заңды қолдану қажеттiгiне байланысты немесе сотталған адамның жағдайын жақсартуға әкелетiн өзге де негiздер бойынша сот қадағалауы тәртiбiмен қайта қарау туралы өтiнiш жасау, наразылық беру мерзiммен шектелмейдi.
Заңды күшiне енген ақтау үкiмiн, айыптау үкiмiн жазаның жеңiлдiгiне қарай неғұрлым ауыр қылмыс туралы заңды қолдану қажеттiгiне байланысты немесе сотталған адамның жағдайын нашарлатуға әкелетiн өзге де негiздер бойынша не соттың iстi тоқтату туралы қаулысын сот қадағалауы тәртiбiмен қайта қарау туралы өтiнiш, наразылық беруге олар заңды күшiне енгеннен кейiн бiр жыл iшiнде жол берiледi.

Заңды күшiне енген сот актiлерiн қайта қарау туралы өтiнiш, наразылық Жоғарғы Сотқа жазбаша түрде берiледi.

Заңды күшiне енген сот актiлерiн қайта қарау туралы өтiнiштi Жоғарғы Сот Төрағасының немесе алқа төрағасының тапсырмасы бойынша құрамы үш судьядан тұратын сот алдын ала зерделейдi және қарайды.

Қадағалау тәртібімен қараудың нәтижесінде сот мына шешімдердің бірін қабылдайды:

1) соттың үкiмiн, қаулысын – өзгерiссiз, ал оларды қайта қарау туралы өтiнiштi, наразылықты қанағаттандырусыз қалдырады;
2) бiрiншi, апелляциялық сатылардағы соттың үкiмiн, бiрiншi, апелляциялық және кассациялық сатылардың қаулысын өзгертедi;
3) үкiмнiң және одан кейiнгi барлық қаулылардың күшiн жояды және iстi қысқартады;
4) үкiмнiң және кейiнгi барлық қаулылардың күшiн жояды және егер iс апелляциялық тәртiппен қаралмаса, сондай-ақ егер iс бiрiншi сатыда алқабилердiң қатысуымен қаралса, iстi апелляциялық сатыдағы сотқа немесе бiрiншi сатыдағы сотқа жаңадан сот қарауына жiбередi;
5) соттың үкiмiн өзгертiп немесе оны өзгерiссiз қалдыра отырып, апелляциялық және кассациялық тәртiппен шығарылған қаулылардың күшiн жояды.

13. Жаңадан ашылған мән-жайларға байланысты iс бойынша
iс жүргiзудi қайта бастау

Жаңадан ашылған мән-жайларға байланысты іс боынша іс жүргізуді қайта бастауды заң әдебиетінде мәні алдын ала тергеу органдары мен сотқа бұрын белгілі болмаған жағдайларда заңды күшіне енген үкімдер мен қаулыларда жіберілген қателер мен олқылықтарды түзетуден тұратын қылмыстық процестің ерекше сатысы деп қарастырады.

Жаңадан ашылған мән-жайларға байланысты қылмыстық іс бойынша іс жүргізу сатысының қылмыстық іс жүргізуде алатын орны ерекше. Ол «қылмсытық істер бойынша іс жүргізудің заңда белгіленген тәртібі адамды және азаматты негізсіз айыптау мен соттаудан, олардың құқықтары мен бостандықтарын заңсыз шектеуден қорғауды, кінәсіз адам заңсыз сотталған не айыпталған жағдайда оны дереу және толық ақтауды қамтамасыз етуі, сондай-ақ заңдылық пен құқық тәртібін нығайтуға, қылмыстың алдын алуға, құқықты құрметтеу көзқарасын қалыпастыруға жәрдемдесуі тиіс» деген қағиданы жүзеге асыратын саты болып табылады.

Жаңадан ашылған мән-жайларға байланысты қылмыстық iс бойынша iс жүргiзудi қайта бастаудың негiздерi:
1) соттың заңды күшiне енген үкiмiнде анықталған жәбiрленушiнiң немесе куәгердiң айғақтарының, сарапшы қорытындысының көрiнеу жалғандығы, сондай-ақ заңсыз немесе негiзсiз үкiм не қаулы шығаруға әкеп соққан заңсыз немесе негiзсiз үкiм не қаулы шығаруға әкеп соққан заттай айғақтардың, тергеу және сот iс-әрекеттерi хаттамаларының және өзге де құжаттардың жалғандығы немесе аударманың көрiнеу бұрыс жасалуы;
2) соттың заңды күшiне енген үкiмiнде анықталған анықтаушының, тергеушiнiң немесе прокурордың заңсыз және негiзсiз үкiм, қаулы шығаруға әкеп соққан қылмыстық iс-әрекеттерi;
3) соттың заңды күшiне енген үкiмiнде анықталған судьялардың осы iстi қарау кезiнде жасаған, қылмыстық iс-әрекеттерi;
4) ҚІЖК-нің 474-бабында көзделген тәртiппен тексеру немесе тергеу арқылы анықталған және прокурордың қорытындысында баяндалған, үкiм шығару кезiнде сотқа беймәлiм болған өзге де мән-жайлар сотталушының айыпсыздығы туралы немесе оның ауырлық дәрежесi жөнiнен өзi сотталғаннан гөрi өзге қылмыс жасағаны туралы не ақталған адамның немесе өзiне қатысты iс тоқтатылған адамның айыптылығын өз алдына немесе бұрын анықталған мән-жайлармен бiрге айғақтайтын ұйғарымдар;
5) өзiне қатысты ҚІЖК-нің 315-бабы екiншi бөлiгiнiң
2) тармағында белгiленген тәртiппен iс қаралған сотталушының, ол қылмыстық процестi жүргiзушi органға келген жағдайда ерiк бiлдiруi;
6) сот актiсiн шығару кезiнде сот қолданған заңды немесе өзге де нормативтiк құқықтық актiнi Қазақстан Республикасы Конституциялық Кеңесiнiң конституциялық емес деп тануы болып табылады.

Айыптау үкiмiн жаңадан ашылған мән-жайларға байланысты сотталушының пайдасына қайта қарау ешқандай мерзiммен шектелмейдi.
Ақтау үкiмiн, iстi тоқтату туралы қаулыны қайта қарау, сондай-ақ жазаның жұмсақтығы себебi бойынша немесе сотталушыға анағұрлым ауыр қылмыс туралы заңды қолдану қажеттiгi бойынша айыптау үкiмiн қайта қарауға қылмыстық жауаптылыққа тартудың Қазақстан Республикасы Қылмыстық кодексiнiң 69-бабында белгiленген мерзiмнiң ескiруi iшiнде ғана және жаңа мән-жайлардың ашылған күнiнен бастап бiр жылдан кешiктiрiлмей жол берiледi.

Жаңадан ашылған мән-жайларға орай iс жүргiзудi қозғау құқығы сотталғанға, ақталғанға, жәбiрленушiге немесе олардың заңды өкiлдерiне, қорғаушыларына, сондай-ақ прокурорға тиесiлi. Өтiнiш үкiм, қаулы шығарған сотқа берiледi.

Дата добавления: 2015-05-10