О городских мостех, осменики поплата

О человеце

О сиротьем вырятьке

О сене

О немолоченом жите

О молоченомъ ячмени

О молоченом овсе

О полбе немолоченои

О немолоченои ржи

О ржи

О пчелах

О лоньскои телици

А от лоньскои телици на 9 лет приплода 4 коровы и с матерью, а третьячинъ телиць 3, лоньскыхъ 2 телици, от старыхъ коровъ 3 быки старые, а лоньскыхъ 2 быка, а однолетныхъ 5 быковъ.

А то кунами 7 гривенъ.

А корова метана по две гривне (третиячина по гривнe, а лоныцина по полугривне)(> Поставленное в скобки добавлено из другого списка.).

А того скота 20 безъ одного.

А от того скота сыровъ 300 и 60 сыровъ, а масла 30 горнцевъ; а то кунами 14 гривенъ и 20 резане, а сыръ метанъ по резане, а горнець масла по 10 резанъ.

А от двоихъ пчелъ на 12 летъ приплода роевъ и съ старыми пчелами 200 и 50 и 6 роевъ; то кунами 100 гривенъ и 20 гривенъ и 4 гривны; а то чтено по полугривне рои с медомъ; а приплода на то по единому рою.

А в селе сеянои ржи на два плуга 16 кадеи ржи ростовьскыхъ, а того на одно лето прибытка на два плоуга 100 копенъ ржи, а на всю 12 лет 1000 копенъ и 200 копенъ ржи.

А ржи немолоченые 40 копенъ а на тоу рожь прибытка на одно лето 20 копенъ, а на всю 12 летъ в тои ржи прибытка 4000 копенъ и 600 и 60 копенъ ржи.

А полбы немолоченые 15 копенъ, а на то прибытка на одно летъ 7 копенъ, а на всю 12 летъ в той полбе прибытка 1000, 700 и 50 копен.

А овса молоченого 20 половникъ и единъ, а на то прибытка на одно лето 11 половникъ овса, а на всю 12 лет в томъ овсе прибытка 2000 и 800 и 60 и 3 половникы овса.

А ячмени молоченого 6 половникъ, а на то прибытка на едино лето 3 половникы, а на всю 12 летъ в томъ ячмени прибытка 700 и 11 половникъ.

Немолоченое жито метано на 2 копны 3 - я, молоченое жито метано на 2 половника 3, а на всю 12 летъ.

А немолоченаго жита на 12 летъ ржи половниковъ 7000 копенъ и 600 копенъ и 10 копенъ.

А молоченаго жита и овса и ячмени полъчетверты тысячи половникъ и 70 половникъ и 4 половникы, а всего того коунами 170000 гривенъ и 9000 гривенъ и 300 гривенъ и 90 гривенъ и 4 гривны и 30 резанъ и резана, опроче жита.

А того же села пять стожеи сена, а та на всю 12 летъ 60 стог сена, а стогъ по гривне, а то 60 гривенъ кунами.

А женка съ дчерию, темъ страды на 12 летъ, по гривне на лето, 20 гривенъ и 4 гривны коунами.

В конце Карамзинского списка добавлены статьи:

Оже человекъ полгавъ куны оу людей, а побежить в чюжоу землю, веры емоу не яти, какъ и татю.

А в Людинъ конець чрез гроблю от Добрынины оулици в городняя врата до Бискупли оулици до Бориса и Глеба, а Тиможеномъ до Коломнянъ, а Коломляномъ до Нерьтьско на мостоу; а Нерядичаномъ до Веряжанъ, а Веряжаномъ до Пидьблянъ, а Пидьбляном до Чюдинцевои оулице, а Чюдиньцевеи оулици съ Загорожаны до городныхъ воротъ, а владыце сквозе городная врата съ изгои, а съ другыми до Острое оулици. 1) Довыдожа ста, 2) Слепцева ста, 3) Бовыкова ста, 4) Олексина ста, 5) Ратиборова ста, 6) Кондратова ста, 7) Романова ста, 8) Сидорова ста, 9) Гаврилова ста, 10) Княжа ста, 11) Княжа, 12) Рьжевьская, 13) Бежитьская, 14) Володьская, 15) Обонижеская, 16) Лоуская, 17) Лобьская, 18) Волховьская, 19) Яжельбичьская, двои рили до торгу, Софьяномъ до тысяцьскаго, тысяцьскомоу до Вощникъ, от Вощникъ посаднику до Великаго ряду, от Великаго ряду князю до Неметьскаго вымола, Немцемь до Иваня вымола, Гтомъ до Гелардова вымола до задняго, от Гелардова вымола огнищаномъ до Боудитина вымола, Ильицаном до Матеева вымола, а Михаиловцемъ до Бардины оулки, а Видьковичамъ до Климятиныхъ сенеи.

Дата добавления: 2014-12-26