Проект договора Смоленска с немцами половины XIII века

Мирный договор князя Ярослава Владимировича с немецкими послами 1189 - 1199 гг.

Печатается по изданию Русско - Ливонские акты, СПб., 1868, стр. 1 - 2

Се язъ князь Ярославъ Володимеричь, сгадавъ с посадникомь с Мирошкою и с тысяцкымь Яковомь и съ всеми Новгородьци, потвердихомъ мира старого с посломь Арбудомь и съ всеми Немьцкими сыны и съ Гты и съ всемь Латиньскымь языкомь. Послал есмь посла своего Григу на сеи правде: Первое: ходити Новгородцю послу и всякому Новгородцю в миръ в Немечьску землю и на Гъцкъ Берегъ. Такоже ходити Немьчьмь и Гтяномъ в Новъгородъ безъ пакости, не обидимъ ни кымже. Аче будеть судъ князю Новгороцкъму Новегороде или Немецкъму в Немчьхъ, а в томь миру ити гостю домовь бес пакости. А кого богъ поставить князя, а с темь мира потвердить, любо ли земля без миру станеть. А оже убьють Новгородца посла за моремъ или Немецкый посолъ Новегороде, то за ту голову 20 гривенъ серебра. А оже убьють купчину Новгородца, или Немчина купчину Новегороде, то за ту голову 10 гривенъ серебра. А оже мужа свяжють без вины, то 12 гривенъ за соромъ старыхъ кунъ. Оже ударять мужа оружеемъ любо коломъ, то 7 гривенъ за рану старые. Оже упьхньть любо мятель роздрьть, то 3 гривны старые. Оже пошибаеть мужеску жену, любо дчьрь, то князю 40 гривенъ ветхъми кунами, а жене или мужьское дчери 40 гривенъ ветхыми кунами. Оже съгренеть чюжее жене повои с головы или дщьри, явится простоволоса, 7 гривенъ старые за соромъ. Оже тяжа родится бес крови, снидутся послуси, Русь и Немци, то вергуть жеребее, кому ся выимьть, poте шедъ, свою правду възмуть. Оже емати скотъ Варягу на Русине или Русину на Варязе, а ся его заприть, то 12 мужь послухы: идеть роте, възметь свое. Оже родится тяжа в Немцехъ Новгородцю, любо Немчину Новегороде, то рубежа не творити, на другое лето жаловати; оже не правять, то, князю явя и людемъ, взяти свое у гости, оже тяжа родится в Новегороде. Оже тяжа родить в ыное земли в Рускыхъ городехъ, то у техъ свое тяжа прашати, искати Новугороду не надобе, а тяжа на городы. А Немчинъ свободь, и Новгороци, оже придеть въ своей лодьи в Немецкои домовь. Аче самъ не поидьть в ней опять, мужь дасть кърмьнику. Немчина не сажати в погребъ Новегороде, ни Новгородца в Немцехъ, нъ емати свое у виновата. Оже кто робу повержеть насильемъ, а не соромить, то за обиду гривна. Пакы ли соромить, собе свободна. Оже убьють таль или попъ Новгороцкое или Немецкъе Новегороде, то 20 гривенъ серебра за голову.

Печатается по изданию Русско - Ливонские акты, стр. 451 - 453.

А рядъ мои съ Немьци таковъ: Аже боудоуть мои Смолняне въ Ризе, вольное търгование имъ въ Ризе. Аже боудоуть Смолняне на Гътьскомь березе, вольное търгование имъ на Гътьском березе. Аже боудоуть Немьци въ моемь Смольске, вольное имъ търгование въ моемь Смольньске. А места на корабли вольная, како Немечичю, тако и Смолняниноу. Аже оубьють моужа вольного, тъ выдати розбоиникы, колико то ихъ боудеть было; не боудеть розбоиниковъ, то дата за головоу 10 гривенъ серебра. Аже оубьють посла или попа, то двое того дати за головоу; аже не будеть розбоиниковъ, боудоуть розбоиници, выдати е. Или кто выбиеть око человекоу, или ногоу ототнеть, или роукоу ототьнеть, или иноую хромотоу въ теле оучинить, 5 гривенъ серебра платити, а за зоубъ 3 гривны серебра. Или человекъ человека деревъмь оударить до кръви, или по лицю оударить, а дати емоу 3 гривны серебра. Или человекъ ранить мечемь или ножемь, а хромоты на теле его не боудеть, дати емоу 3 гривны серебра. Или Роусьскомоу гъстьи притьчася пригодить въ Ризе или на Гътьскомь березе, никакоже его въ дыбоу въсадити. Аже боудеть пороука по нь, на пopoyцe его дати; или не боудеть пороукы, а въ железа и въсадити. Или Русьскыи гъсть свои тъварь дасть в дългъ в Ризе или на Гътьскомъ бере(зе) Немьчичю, а нъ дъдълженъ боудеть инемъ, Роусьскомоу же гъстьи напереде възяти. Или Немьчьскыи гъсть въ дългъ дасть Смоленьске свои тъваръ Роусиноу, аче дълженъ боудеть инемъ, Немечьскомоу гъстьи напереде възати. Аже боудеть владыце или мастерови или которомоу соудьи гневъ на которого Немьчица, а въсхочети и казнити, а боудеть тотъ дълженъ Немьчиць Смолняниноу, переже дати емоу тъваръ Смолняниноу, а въ проче его воля. Аже Смолнянинъ тъваръ дасть въ Ризе или на Гътьскомь березе, а не росплативъ ся поидеть къ богови, а кто его задьницю възметь, тътъ и гостиный тъваръ дасть. Аже боудеть търговати Смолняниноу съ Немьчицемь, Смолняниноу одинехъ Смолнянъ на послоушьство не выводити. Такоже и Немьчицю своихъ Немечь одинехъ на послоушестьво не выводити; ставити имъ на послоушьство Роусина же Немьчица, такоже и въ всехъ тяжахъ рядъ Смолняниноу съ Немьчицемь про послоушьство. Немьчичю же въ Ризе и на Гътьскомь березе Смолнянина на железо безъ его воле не лзе имати; оулюбить своею волею нести железо, тъ ть его воля виноватъ ли боудеть, своя емоу воля, или правъ боудеть, а 10 гривенъ серебра за соромъ емоу възяти. Немьчичю же не льзе позвати на поле Роусина битъ ся въ Ризе и на Гътьскомь березе, Роусиноу же не льзе позвати Немьчича на поле битъся Смоленьске. Тако межи себе оустановимъ. Оже имоуть ся бити Роусь въ Ризе и на Гътьскомъ березе мечи или соуличами, или иная тяжа оучинить ся межи самими, не надобе то владьще, ни иномоу соудьи Немьчьскомоу, ать оуправять ся сами по своему соудоу; такоже и Немьчемъ Смольньске. Оже который Немьчиць въ Ризе или на Гътьскомь березе свяжеть Смолнянина, или въ железа въсадить, за соромъ ему платити 3 гривны серебра; такоже и Немьчицю Смолиньске. Аже боудеть Смолняниноу Немьчичь дължьнъ въ Ризе или на Гътьскомь березе, правити емоу, поемъши детьскыи оу соудье. Тътъ ли детьскыи не исправить, возма мьздоу, приставите на нь дроугого, тъть ли еметь хытрити, а поставити и передъ соудьею, ать выдасть и соудья. Такоже и Немъчицю Смолиньске поставить и передъ княземь, ать выдасть и князь. Аже кто изотьметь дължь бита оу Смолянина въ Ризе или на Гътьскомь березе, то томоу за нь платити, кто и изетялъ; такоже и Немьчемъ Смольньске.. А от Смоленьска чистыи поуть до Ригы, а не надобе имъ ни вощець ни мыто, а на Волоце, како то есть пошло. А моимъ Смолняномъ въ Ризе и на Гътьскомь березе не надобе имъ ни вощець ни мыто. Аже Немьчиць коупить въ Ризе и на Гътьскомь березе оу Смолнянина товаръ, понесеть его домовь, а въсхочеть воротити, Смолняниноу же тътъ тъваръ не надобе боле; такоже и Немьчичю Смоленьске. Оже боудеть Смолняниноу с Немьчичемь тяжа в Ризе, тоу ся тяжють передъ Рижъскымь соудьею; боудеть ли тяжа Смолняниноу съ Немъчицемь на Гътьскъмь березе, а соудити и Гътьскымъ соудьямъ, тоу то и тяжи и коньць; боудеть ли тяжа Смоленьске Немьчицю съ Смолняниномь, соудити я Смоленьскомоу князю, то уже то и тяжи и коньць. Аже кто оуръветь бороды Смолнянину въ Ризе или на Гътьскомъ березе, или Смолнянинъ Немьчицю, томоу оурокъ 3 гривны серебра. Оже оуръветь Немьчиць бороды Смолняниноу Смольньске, дати емоу 3 гривны серебра. Оже оуръветь бороды Немьчиць бояриноу, или коуноемьчи, дати емоу 5 гривенъ серебра. А како боудеть Немьчьскыи гъсть Смоленьске почьнеть ся кто от нихъ просити в ыноую землю, то како то было при моемь отци, при Мьстиславе при Романовици, и при моемь брате при Мьстиславе, о немъ ся прашати, а мне е по доуме поущати. Аже оубьють тивоуна княжа, городьского, 20 гривенъ серебра, како и послоу. Оже имоуть Роусина вольного оу вольное жены въ Ризе или на Гътьскомь березе, оже оубьють, и тъть оубитъ; пакы ли не оубьють, платиит ему 3 гривны серебра; такоже и Немьчицю Смолиньске. Аже оучинить Роусинъ насилье въ Ризе или на Гътьскомь березе надъ вольною женою, а дотоле не слышати было до нее лихого, оурока за то 10 гривенъ серебра; такоже и Немьчицю Смоленьске. Аже оучинить Роусинъ насилье надъ робою въ Ризе или на Гътьскомь березе, платити емоу за соромъ гривну серебра; такоже и Немьчицю Смоленьске. Тоже есмь с вами рядъ свои доконьчалъ про свое моуже и про свое Смолняны. Аже въедеть братъ мои которыи въ Смолньскъ, а оучинится вам свада съ их моужьми, вамъ ся ведати с ними самемъ; или гость ис которое земле приедеть въ мои Смолньскъ, а боудеть вы с нимь свада, а выдайте ся с ними сами.

Дата добавления: 2014-12-26