Jogirannal

Kibei

Libei

Juuret

Hukku

Koivu

Talvi

Segovus

Ohtoi

Pakkaine

Vihmu

Suadu lapsi

Suadu lapsi – valpas lippu,

Valgei lumi – segi eule puhtas…

Vuota, vuota, roih vie čento luhtas,

Sit gu počis redu tippuu.

9 Kažin huoli

Keskitalveh rodih lämmiä –

Kaži istuu levon piäl.

Ižäkaži n’auguu ammui –

Eččiy emiä lämmäl siäl.

Vie on talvi, älä n’augu,

Pihal seizou pakkaskuu…

Mene pertih, syö sie maiduo,

Ehtypuoleh pakastuu.

Keviäl nouze levon piäle,

Voitgi istua truvan piäl –

Lämmäl n’auguogi mieleh,

Emiä eči lämmäl siäl.

10 * * *

Piädy alah älä heitä,

Silmii omii älä peitä,

Silmis silmih kačo sa –

Älä oččua kabrasta.

Roih vie meile meijän aigu,

Sinä tirpa – tirpa vaigu!

Hyvä elos meile roih, –

tulou oza omah koih…

11 Elos meijän solmiu aigua

Elos meijän solmiu aigua,

Aigu on gu pyörän ratas,

Mennäh vuvvet – eliä vaigu –

Elä täs.

Täs on meijän valgei taivas,

Loittoun airas juostah tiähtet,

Eläyvetty nosta kaivos –

Kuole et.

Kuoltah toinah piä dai sivu,

Jiäy vai hengih syväinhengi,

Olgah piälpäi pandu rivut –

Elä vie.

Elä kodvu joga heinäs,

Igä elä joga mieles,

Ole hengis levos, seinäs,

Elä vies…

Kodvan päivy silmii peittäy

Pilvi vačas vihmua keittäy.

Konzu keitto rodieu valmis.

Sit kai viet net alah heittäy.

Vihmu se on muaspäi suadu –

Vihmah niškoi päivy ruadau.

Vetty keriäy räkkipäivil,

Tulou aigu – taivas vuadau.

Tuli myös… Kodvakse valgai…

Suures pakkazes kiinittäy astuo –

Pertih rahvahan tulluh on Rastau.

Pimei yö… Vuvven algau.

Pakkaskuu… Heittyy muah Syndy…

Midä roinnou, ga sidägi roikkah.

Tartuu pakkaine koivuzeh hoikkah –

Elaigua pakkaine kyndäy.

Hiemaih tartui ohtoi –

Löydi, bluaznu, kohtan.

Ripui hiemais kodvan,

Kiškoin ohtoin odva.

Segoin minä omih jalgih,

En voi ielleh jallol polgie,

Hyväh naizeh on jo nälgy,

Nälgyvyingi mieleh korgieh.

Segovuksis piästä en voi,

Ähkäi karu mennä meččäh –

Aku pieni lapsi segoin,

Ei nikedä ole eččoh.

Vaiku tiijän – iččes abu,

Iččes mieli gor’as piästäy;

Minä omii päivii tabuan –

Perran piädy, mieldy vestän…

Tuli mies –

Tävves väis:

Šuapku piäs,

Keppi käis.

Katoi muan

Turkil häi,

Sellän tuan

Reppu piäl.

Kuatančois

Suksittau,

Lämmät pois

Varrastau.

Ikkunan tuan on vilu,

Pertis voit vie istuo.

Tuuli kandau pilvii,

Oppiu lehtii kiškuo.

Alasti jo koivu –

Jaksatettu valgei…

Hengele roih hoivu,

Konzu tulou talvi.

Peittäy lumel koivun,

Keviäl sit vai, valgei,

Uvvessah roih roinnut.

Tiähtet

Alahan vai ylähän –

Ei sua sidä tiediä,

Tiähtet loitton paletah –

Nostakkua vai piädy.

Vilut tiähtet taivahas –

Lämmiä heispäi eule:

Ripu sinä rahvahas –

Ristikanzu ole.

Pyhkiy pihua tuuli,

Bul’kuu lykkiy huulih,

Alah sordau heinät,

Viluškoittau seinät.

Kastau vihmu muadu,

Vihmal levo vuodau,

Uinuou terväh meččy,

Lähtöy hukku eččoh.

Talvel hukal nälgy –

Seguau jänöin jälgeh…

Täs ollah meijän lujat juuret,

Net juuret vetty juvvah muas…

Sen periä mielet aiven suuret,

Sen periä lähten matkah myös.

21 Yödy vaste

Lendokoneh pilvih peityi,

Mečän tuakse päivy heityi…

Taivasrandu mečän tuan,

Pimei ehty vuaksau muan,

Čoma kuudam nouzou pilvis,

Tiähtien udu pyöriy silmis.

Syvysehty pimei myös –

Zerku hebuo et näi yös…

22 * * *

Tuuli pilven kiškoi,

Kudai vihmua niškal

Kandoi – muadu pestä…

Pilvi bokkah eistäi –

Tuulen vägie varuau.

Vaigu mustu varoi

Taivahas vie kestäy.

Dorogu on libei –

Pakut, roih sit kibei.

Öntästyt – dai lennät,

Puhalduugi nenä.

Očan tuikkain veriäh,

Očal kibei rodih –

Tahtoin puuttuu teriäm

Pihas omah kodih.

25 * * *

Ammui hengi tillii panou,

Selgiä kibei kibieh katkuau;

Midä puuttuu kägöi sanou –

Vikse mille igiä jatkuau.

Kuku kägöi kodvu-kodvu,

Älä minuh sinä kačo,

Anna olen hengis odva –

Enhäi sendäh kävy vräčoih.

Toinah tullah minun pihah

Vessel, nagro, uvvet juhlat,

Enhäi ole vahnu siga –

Toiči pyörin aku jula,

Kuku kägöi, kuku kuldu,

Työnä mille paras mieli,

Älä laske minuh undu –

Minun suus vie lekkuu kieli.

26 * * *

Loitton minuu ajoi

Koispäi pitky matku,

Vuotti meren kajoi,

Kägöi igiä jatkoi.

Nygöi minä en voi

Kynnyksessäh polgie,

Suitan suuri velgoi,

Riputtelen nölgii.

Pertis pertih liikun,

Kupettelen piädy,

Minun ystäv – ikkun,

Kunne juhlat jiädih?

G.S. Ivanovale – minun vellele

Ongiruagu olgupiäle –

Lähten kalua suamah.

Eigo čakkua, eigo kielä

Meidy meijän muamo.

Minus rippuu nuoren velli –

Rengis čyöttyö kandau,

Vellel vaste rodih nelli,

Anna kaččou randua.

Mägryjoves ahven uidau,

Jorši, haugi, särgi,

Ongi joves kalua muudu,

Jogirannal – märgy.

Ongeh panen sangien čyötön,

Lykkiän vedeh – vuotan,

Vellie leiväl voinke syötän,

Limonuadal juotan.

Istuo jovel pidäy kodvu,

Kalua et sua eiga;

Kodih reppuu kannan odva,

Tuanpäi – Gena-peigoi.

Kalarokan mama keittäy,

Leikkuau leibiä veičel.

Kaži alah päčil heittyy –

Kalan duuhu eččiy…

…Tämä aigu oli, oli!

Nygöi jäi vai musto…

Aigu loppih, aigu kuoli,

Elos rodih mustu.

Eigo mamua ole hengis,

Eigo nuorem vellie,

Kudai odva ripui rengis,

Kudual oli nelli…

Дата добавления: 2015-06-30