Sygyzyn runot

Hengi

Tule

Vihmu

Lukus

Salvattih uksi,

Kus oldih sukset,

Ei jiännyh raguo –

Et piäze pagoh.

Lukuttih veräi,

Kus hädiä keräin,

Jäi yksi iäni

Minule piäni.

Tykittih ikkun –

Et päiväh liiku,

Tuohuksen sviettu

Ammui jo pietty.

Salvattih lukku,

Elaigu – tukkuh;

Kerähmös pilvet,

Atkalas silmät.

29 * * *

Umbisolmeh meni yö,

Vastukarai nouzi päivy,

Jälgi ilmat pilvi syöy

Sangei, pilvel vägie äijy!

Eliä hyvin himo on –

Eliä pidäy kui vai maltan,

Seizou vastu veriän tuan,

Toinah huomei ostan auton?

Toinah huomei lövvän tien,

Kudual Putin ravieh ajau,

Vaiku tiijän – osta en,

Autoh sih myöt jälgi paijan.

30 Lašku

Olis laškal plašku,

Lähtiš ruadoh lašku –

Vaiku laškal ruado

On gu kerois ruodu.

Azui huondes vihman,

Kastoi vihmu pihan,

Lumet otti – ihan!

Reduh luadii vihan.

Tule kodih, raviem astu,

Minä sille lettuu pastan,

Nostan voidu, keitän čuajun,

Ryyppiän viinua – en sih juovu.

Tule teriäm, kaglas sebiä,

Ukkuo huulih – roih meil kebjiem.

Väzyin minä yksin olla –

Jalloil odva muadu pollen.

Älä varua tulla kodih –

Mille yksin paha rodih.

Minä sille tiähtet heitän,

Toizes naizes tiähtet peitän.

33 * * *

Kus on minun valgei yö?

Kus on minun hyvä päivy?

Ehtil hengiä tusku lyöy,

Suitti elos hädiä äijy.

Toinah Äijypäivy tuou

Ozua hyviä, uuttu undu?

Eiga savvuu pergau muah,

Piälpäi panou märgiä lundu.

Joga lehtes eläy hengi,

Joga kives hengi on.

Hengi ongi raudurengis –

Hengi hengeh hengen tuou.

Hengi eläy ristikanzas,

Elän minä hengen vuoh.

Piälpäi syvä kaivo – taivas,

Šelou taivas päivät yöh.

Ei nikonzu hengi kuole

Kuni taivas piälpäi on –

Jumal andoi hengen muale,

Jumal lahjai päivän, yön…

Hengi henges ainos rippuu,

Se gu tiähtet taivahas;

Ristikanzan hengi – ikkun,

Kuni elät – tävves väis.

Joga lehtes eläy hengi,

Joga kives hengi on.

Hengi ongi raudurengis –

Hengi hengeh hengen tuou.

35 * * *

Terväh vieröy kondii muata –

Pezäh eččiu kondii kohtan,

Tulou talvi – viluu vuota,

Lumi kattau heinät, ohtoin.

Pajuau talvi jovet, järvet,

Mečän kattau turkil valgiel,

Hirvi hivou omat sarvet,

Pehmei lumi piälpäi langieu.

Reboi, hukku lähtieh eččoh,

Ravei jänöi lähtöy pagoh,

Toinah peittäy jänöin mečččy –

Löydäy valgei joga ravon.

36 Viheldäy tuuli

Viheldäy tuuli,

Ukkailou huulih,

Lehtilöi kiškou,

Istuu muan niškal.

Puzerdau pilvii,

Kačo ei silmih,

Kiireh on tuulel

Hälištä suurel –

Pilvilöin vaččua

Vardoiččou, kaččou…

Дата добавления: 2015-06-30