Sygyzyn viesti

Mieli

Oman koin savvu

Oman koin savvu

Kuččuu jo ammui,

Armahat koivut –

Hengele hoivu.

Lähtin ma eččoh

Parastu eluo,

Ymbäri – meččy,

Armastu eule.

Midäbo ruadua?

Polletan suodu,

Vierastu muadu –

Sie kikkuon da kuavun…

Työnin välläle mielen,

Se, gu linduine lendi,

Löydi karjalan kielen –

Äijäl ihastui hengi.

Mieli piäh andau runuo,

Mieli parandau verdy,

Enne aigoi en uinuo –

Työnän mielen vie kerdu.

Anna tuou runuo uuttu,

Hyvä sit rodieu mieles,

Pahas hyväkse muutun,

Teispäi en lähte iäres.

Lapset luvetah anna

Minun suarnua da runuo,

Niidy muailmah kannan –

Sit nikonzu en uinuo.

61 Jället

N. Jerkojevale

Kenen sinä segoit jälgih?

Minun jället kaimait pois?

Minul rodih sinuh nälgy,

Mindäh sinuu eule kois?

Sinä tahtoit eliä välläl!

Vaiku tämä välly gon? -

Olla pidäy karun jällil -

Jället nemme riähky on.

Olgah. Riähkät prostiu Jumal,

Minä iče riähkiä suan:

Nygöi minuu voittau humal,

Sinuu eule – minä juon.

Kiändäi minuh, tule vastah,

Minä sinuu vuotan vie,

Iče tiijät, minä astun,

Kuni kestäy minun piä.

Tule – niezin, tule – sebiän,

Kahtei astuo kebiem roih.

Eliä kahtei – eliä kebiäm,

Tänne meidy Jumal toi…

62 * * *

Tule yksin minulluo yöl,

Tyhjäs postelis kova on muata.

Älä varua, en sinuu syö,

Sinun jaksatan, sinä vai vuota.

Tulle yöl, älä kačo nikeh,

Älä varua, se ei ole riähky.

Sanon ven’akse: ”Eto ne greh”

Ližiän livvikse: ”Ei ole riähky”.

63 * * *

Liijän suaren hyppiät,

Liigu orau puuttuu.

Loukot omat typpiä –

Anna hengi uuttuu.

Tulgah paras elos,

Roikkah hyvä piä,

Pahua sanua kerois

Älä laske, mies.

Eči hyvät sanat,

Mieldy omah koih –

Annai hengen annat,

Hyvä mieles roih.

Päiväine eččiy jo taivahan reunua,

Ehty jo varustih – tulemas on.

Lyhenöy päivy jo. Mittumua kehnuo,

Puolendau valgien, pitkendäy yön?

Kezäine lähtöy sit, sygyzy tulou:

Čomendau meččäzet – kuldaine roih.

Kuulet, jo truvazis tuuline ulvuo?

Se sygyzy viestizen ičespäi toi.

65 Mägryjoven rannal

Mägryjoven rannal

Istuin minä kannol,

Rohjos nouzi savvu –

Oli se jo ammui.

Olin minä lapsi,

Muamal meidy – kaksi.

Čen’a-velli kuoli,

Jäin ma yksin – puoli.

Mamua eule sežo,

Yksin minä seižoin.

Magryjoven rannal

Istun sil že kannol.

66 Čuaju

Čuajuh heitän hengen –

Juožin tävven rengin.

Toižen-moižen juožin vie,

Oliš syvvä midä vie.

Oliš n’amuloi da lettu,

Oliš maidoloispäi kettuu,

Oliš piiraidu da voidu,

Čuajus kodvu rippuo voibi.

67 Minun ystävät

Ystävät minun orav da jänöi,

Suvaičen minä kukkii da kanoi.

Ystävät minun – meččy da suo,

Sie minä parastu elostu suan.

Ystävät minun koirat da kažit,

Älä jo, sanotah minule, blaži!

Blaži se en, hyvät ystävät minun,

Suvaičen zvierii, armastan linduu...

Hämähäkki

– Hämähäkki, hämähäkki!

Eigo sinul ole räkki?

– Minä räkkie vuotan aiven –

Kezäl syvvä sit on taigin.

69 Pin’oi

Pertis pin’oi pinižöy,

Pihal taivas halgei –

Kodvan vihmu pagižou,

Peitti päivänvalgien.

Ei sua piästä pihale,

Lähtet – kerras kastut;

Istun pin’oin vihale –

Kunne pin’ois astut?

Älä pin’oi piniže,

Pure parem kerras,

Vihman jytyi pagiže,

Elä minun vieres.

Дата добавления: 2015-06-30