Студопедия

КАТЕГОРИИ:


Архитектура-(3434)Астрономия-(809)Биология-(7483)Биотехнологии-(1457)Военное дело-(14632)Высокие технологии-(1363)География-(913)Геология-(1438)Государство-(451)Демография-(1065)Дом-(47672)Журналистика и СМИ-(912)Изобретательство-(14524)Иностранные языки-(4268)Информатика-(17799)Искусство-(1338)История-(13644)Компьютеры-(11121)Косметика-(55)Кулинария-(373)Культура-(8427)Лингвистика-(374)Литература-(1642)Маркетинг-(23702)Математика-(16968)Машиностроение-(1700)Медицина-(12668)Менеджмент-(24684)Механика-(15423)Науковедение-(506)Образование-(11852)Охрана труда-(3308)Педагогика-(5571)Полиграфия-(1312)Политика-(7869)Право-(5454)Приборостроение-(1369)Программирование-(2801)Производство-(97182)Промышленность-(8706)Психология-(18388)Религия-(3217)Связь-(10668)Сельское хозяйство-(299)Социология-(6455)Спорт-(42831)Строительство-(4793)Торговля-(5050)Транспорт-(2929)Туризм-(1568)Физика-(3942)Философия-(17015)Финансы-(26596)Химия-(22929)Экология-(12095)Экономика-(9961)Электроника-(8441)Электротехника-(4623)Энергетика-(12629)Юриспруденция-(1492)Ядерная техника-(1748)

Москва «Искусство» 1978 4 страница





 

ПСАЛОМ 65
1. Д(а)в(и)д(о)в, в конец.

2. Въскликнете г(осподе)ви вся земля, поите же имени его, дадите славоу хвале его:
3. Рцете б(ог)оу: коль страшна дела твоя,
во множьстве силы твоея солжю тобе врази твои.
4. Вся земля да поклонитьтися и поеть тобе, да поют же имени твоемоу, вышне.
5. Приидете и видите дела б(о)жия, коль страшенъ въ с[о]ветех паче
с(ы)н(ов)ъ ч(е)л(о)в(е)ческъ;
6. Обращаяи море въ соушю, в реце проидоуть ногами: тоу възвеселимся о немь,
7. Обладающомоу силою своею векоу. очи его на языкы призираета,
прогневающеи да не вьзносятся в собе.
8. Бл(а)г(о)с(ло)в(и)те языци б(ог)а нашего, и оуслышанъ створите глас хвалы его,
9. Положшаго д(у)шю мою в животъ, и не давшаго в смятенье ногоу моею.
10. Яко искоусил ны еси, б(ож)е, ражжены, якоже ражизается сребро.
11. Ввел ны еси в сеть, положилъ еси скорби на хребте нашем.
12. Възведе ч(е)л(о)в(е)кы на главы наша: проидохомь сквозе огнь и водоу,
и изведе ны в покои.
13. Внидоу в домъ твои со всесжегаемыми, възъдамъ тобе м(о)л(и)твы моя,
14. Яже изрекосте оустне мои, и гл(агола)ша оуста моя в печали моеи.
15. Всесжегаеми мождяны възнесоу тобе с кадиломь и овны,
възнесоу тобе волы с козлы.
16. Придете, слышите, и повемь вамъ, вси боящеися б(ог)а,
елика створи д(у)ши моеи.
17. К немоу оусты моими возвах, и възнесох под языкомь моимь.
18. Неправьдоу аще позрехъ въ с(е)рдци моем, не оуслышит мене г(оспод)ь.
19. Сего рад(и) оуслыша мя б(ог)ъ, внятъ глас м(о)л(и)твы моея.
20. Бл(а)г(о)с(ло)в(е)нъ б(ог)ъ, иже не остави молитвы моя и м(и)л(ос)ти
своя от мене.

ПСАЛОМ 66.
1. Д(а)в(и)д(о)въ.

2. Б(ож)е оущедри ны и бл(а)г(о)с(ло)в(и) ны, просвети лице твое на ны,
и помилоуи ны:
3. Да познаем на земли поуть твои, во всехъ языцехъ сп(асе)нье твое.
4. Да исповедятся тобе люд(и)е б(ож)е: да исповедятся тобе люд(и)е вси.
5. Да вьзвеселятся, и възрадоуются языци: яко соудиши люд(е)мь
вь правость, и языкы на земли наставиши.
6. Да исповедятся тобе люд(и)е б(ож)е, да исповедятся тобе люд(и)е вси.
7. Земля дасть плод свои: бл(аго)с(ло)ви ны б(ож)е, б(ож)е наш,
8. Бл(аго)с(ло)в(и) ны б(ож)е: и оубоятся его вси конци земля.

СЛАВА :

 

 

ПСАЛОМ 67
1. Д(а)в(и)д(овъ).

2. Да вьскр(ес)неть б(ог)ъ, и разыдоутся врази его,
и да бежат от лица его ненавидящеи его.
3. Яко исчезаеть дымъ, да исщезноуть: яко таеть воскъ от лица огню,
тако да погыбноут грешници от лица б(о)жия.
4. А праведници възвеселятся, да възрадоуются пред б(о)гомь,
насладятся в веселии.
5. Вспоите б(ог)оу, поите же имени его, поуть створите вшедшемоу
на запады: г(оспод)ь имя его, и радоуитеся пред нимь.
6. Смятоутся от лица его, о(т)ца сирыихъ и соудя вдовиць:
б(ог)ъ в месте с(вя)темь своемь.
7. Б(ог)ъ вселяеть единомысленыя в домь, изводя окованьныя
моужьствомь, такоже прогневающая живоущая в гробехъ.
8. Б(ож)е, егда исхожаше пред людми своими, егда мимо хожаше в поустыни:
9. Земля потрясеся, ибо н(е)б(е)са каноуша от лица б(ог)а синаина,
от лица б(ог)а израилева.
10. Дождь воленъ отлоучиши б(ож)е достоянию твоемоу:
и изнеможеть, иже сверши я.
11. Животная твоя живоуть на неи, оуготовалъ еси благ(ос)тью своею
нищемоу б(ож)е.
12. Г(оспод)ь дасть г(лаго)лъ бл(а)говестоующимъ силоу многоу,
13. Ц(а)рь силъ вьзлюбленаго, лепотою домоу разьделити користь:
14. Аще поспите межю предель, криле голоубине посребрене,
и межюрамыя ея в блещени злата.
15. Егда разньствить н(е)б(е)сныи ц(а)ря на неи, оснежатся в селмоне.
16. Гора б(о)жия, гора тоучная, гора оусыреная, гора тоучная.
17. Вьскоую непщюете горы оусырены; гора юже бл(а)говоли б(ог)ъ жити в неи:
ибо г(оспод)ь вселится до конца.
18. Колесница б(о)жия тмами темь, тысяща гобзоующих:
г(оспод)ь в них в синаи вь с(вя)темь.
19. Вшелъ еси на высотоу, пленилъ еси пленъ: приялъ еси даянье вь
ч(е)л(о)в(е)цехъ, ибо противящаяся вселитис(я).
20. Г(оспод)ь б(ог)ъ бл(аго)с(ло)в(е)нъ, бл(а)г(о)с(ло)в(е)нъ г(оспод)ь
д(е)нь дне, поспешить намъ б(ог)ъ сп(асе)нии наших.
21. Б(ог)ъ нашь б(ог)ъ сп(а)сати: и г(оспод)ня г(оспод)ня исходища см(е)ртная.
22. Обаче б(ог)ъ с(о)кроушить главы врагъ своихъ,
верхъ власъ преходящих вь прегрешенихъ своихъ.
23. Рече г(оспод)ь: от васана обрящю, обрящоу в глоубинах морьскыхъ:
24. Да омочится нога твоя в крови, языкъ песъ твоихъ от врагъ от нег(о).
25. Видена быша шествия твоя б(ож)е, шествия б(ог)а моего ц(а)ря,
иже вь с(вя)темь.
26. Вариша князи близь поющих, посреде д(е)въ тоумпанниц.
27. Въ ц(е)рьквахъ б(лагос)л(о)в(и)те б(ог)а, г(оспод)а от источникъ изра(иле)въ.



 


28. Тоу веньяминъ оуноша во оужасе, князи июдовы вл(а)д(ы)кы ихъ,
князи заоулони, князи нефталимли.
29. Заповежь б(ож)е силоу твою, оутверди б(ож)е се, еже сдела в насъ.
30. От ц(е)ркве твоея во иер(у)с(а)л(и)мъ тобе принесоуть ц(а)рие дары.
31. Запрети зьверемь тростнымь: снемь оунець во оуницах людьскыхъ,
затворити искоушеныя сребромъ, ражжени языкы хотящая бранем.
32. Придоуть м(о)л(и)твеници от египьта, ефиопия варить роука ея кь б(ог)оу.
33. Ц(а)рствия земная вспоите б(ог)оу, поите г(осподе)ви,
34. Вшодшомоу на н(е)бо н(е)б(е)сное на вьстокы:
и се дас(ть) гласоу своемоу глас силы.
35. Дадите славоу б(ог)оу: на изр(аи)ли велелепота его, и сила его въ облацехъ.
36. Дивенъ б(ог)ъ вь с(вя)т(ы)хъ своихъ: б(ог)ъ изр(аи)л(е)въ, тои дасть
силоу и державоу люд(е)мь своимь. б(лаго)сл(о)в(е)нъ б(ог)ъ.

СЛАВА :

ПСАЛОМ 68
1. Д(а)в(и)д(о)въ.

2. Сп(аси) мя б(ож)е, яко внидоша воды до д(у)ша моея.
3. Оуглебохъ в тимении глоубины, и нес(ть) постояния:
придох в глоубины морьскыя, и боуря потопи мя.
4. Оутроудихся зовы, измолче гортань мои, исчезосте очи мои,
оуповающю ми на б(ог)а моего.
5. Оумножишася паче власъ главы моея ненавидящеи мене всуе: оукрепишася
врази мои, изгонящеи мя бес правды: ихже не въсхыщах, тогда въздаяхъ.
6. Б(ож)е, ты оувиде безоумье мое, и прегрешения моя от тобе не оутаишася.
7. Да не постыдятся о мне терпящеи тебе г(оспод)и, г(оспод)и сил,
ни посрамляютжеся о мне ищющеи тобе б(о)же изр(аи)л(е)въ.
8. Яко тобе ради прияхъ поношение, покры срамота лице мое.
9. Чюжь бых братьи моеи, и страненъ с(ы)номь м(а)т(е)ре моея:
10. Яко зависть домоу твоего снесть мя,
и поношения поносящих ти нападоша на мя.
11. И прикрых постомъ д(у)шю мою, и быс(ть) в поношение мне:
12. И положих одеяние мое вретище, и бых имъ в притьчю.
13. И мне глоумляхоуся седящеи во вратехъ, и о мне пояхоу пиющеи вино.
14. Аз же молитвою моею к тобе б(ож)е, время благоволения, б(ож)е: во
множьсьтве м(и)л(о)сти твоея оуслыши мя, воистине сп(асе)ния твоего.
15. Сп(а)с(и) мя от бернья, да не оуглябноу: избави мя от ненавидящихъ
мя, и от глоубокыхъ вод.
16. Да не потопить мене боуря водная, ни пожреть мене глоубина,
ни сведеть о мне ровникъ оустъ своихъ.
17. Оуслыши мя г(оспод)и, яко бл(а)га м(и)л(о)сть твоя:
по множьствоу щедротъ твоихъ призри на мя.
18. Не отврати лица твоего от отрока твоего: яко скорбьлю, скоро оуслыши мя.

 


19. Вонми д(у)ши моеи, и отими ю: врагъ моихъ ради избави мя.
20. Ты бо свеси поношенье мое, и стоуд мои, и срамотоу мою:
пред тобою соуть вси стоужающеи мне.
21. Поношенье причая д(у)ше моя и стр(а)сть: и жадах иже со мною
поскорбить, и не бе, оутешающаго, и не обретох.
22. Вдаша вь ядь мою золчь, и в жажю мою напоиша мя оцта.
23. Боуди тряпеза ихъ пред нимь въ сеть, и възъданье и вь соблазнъ.
24. Помрачитася очи ихъ не видети, и хребетъ ихъ отноудь смири.
25. Пролеи на ня гневъ твои, и ярость гнева твоего да иметь я.
26. Боуди дворъ ихъ поустъ, и в селех ихъ не боуди иже живеть.
27. Зане егоже ты порази, ти погнаша, и къ болезни язвъ моихъ приложиша.
28. Приложи безаконье къ безаконию ихъ, и да не внидоуть в правдоу твою.
29. Да потребятся от книгъ живоущих, и с праведными не напишются.
30. Нищь и боля есмь азъ: сп(асе)ние твое б(оже) приятъ мя.
31. Вьсхвалю имя б(ог)а моего с песнью, възвеличю его вь хвалении.
32. И годе боудеть б(ог)оу паче телца оуна, рогы изьдеюща и пазногти.
33. Да оузрять нищии и възвеселятся: взищете б(ог)а,
и жива боудоуть д(у)ша ваша.
34. Яко оуслыша нищая г(оспод)ь, и окованых своихъ не оуничижит.
35. Да вьсхвалять его н(е)б(е)са и земля, море и вся движащеся в немь.
36. Яко б(ог)ъ сп(а)сеть сиона, и сзижются гради июдеистии,
и вселятся тоу, и наследять его:
37. И семя рабъ твоихъ оудержить и, и любящеи имя твое вселятся вонь.

ПСАЛОМ 69
1. Д(а)в(и)д(овъ), въ конець.

2. Б(ож)е, в помощь мою вонми: г(оспод)и помощи мне потщися.
3. Да постыдятся и посрамятся ищющеи д(у)ша моя:
да вьзратятся вьспять и постыдятся мыслящеи мне злая.
4. Да вьзратятся абье стыдящеся г(лаго)люще мне: бл(а)гоже, бл(а)гоже.
5. Да вьзрадоуются и вьзвеселятс(я) о тобе вси ищющеи тобе б(ож)е,
и г(лаго)лять воиноу, да вьзвеличится г(оспод)ь, любящеи сп(асе)нье твое.
6. Аз же нищь есмь и оубогъ, б(ож)е помози ми:
помощникъ мои и избавитель мои еси ты, г(оспод)и не закости.

СЛАВА :

 

К А Ф И З М А Д Е С Я Т А Я

ПСАЛОМ 70
Д(а)в(и)д(овъ).

1. На тя г(оспод)и оуповах, да не постыжюся в векы.
2. Правдою твоею избави мя, изми мя: приклони ко мне оухо твое, и сп(аси) мя.
3. Боуди ми въ б(ог)ъ защититель, и в место твердо спасти мя:
яко оутверженье и прибежище мое еси ты.
4. Б(ож)е мои, избави мя из роукы грешьнаго,
из роукы законопрестоупнаго и обидящаго:
5. Яко ты еси терпенье мое г(оспод)и, г(оспод)и, оупованье мое от оуности моея.
6. На тя оутвердихся от оутробы, из чрева м(а)т(е)ри моея ты еси мои
покровитель, о тобе пенье мое воиноу.
7. Яко чюдоу бых многымъ, и ты помощникъ мои крепокъ.
8. Да исполнятся оуста моя похвалы, яко да вьспою славоу твою,
весь д(е)нь велелепотоу твою.
9. И не отверзи мене во время старости:
егда изнемогаеть крепость моя, не остави мене.
10. Яко реша врази мои мне, и стрегоущеи д(у)шю мою с(о)вещаша вкоупе,
11. Г(лаго)л(ю)ще: б(ог)ъ оставилъ есть его:
поженете и имете его, яко нес(ть) избавляяи.
12. Б(ож)е мои, не оудалися от мене: б(ож)е мои, помощь мою вонми.
13. Да постыдятся и исчезноуть оклеветающеи д(у)шю мою,
да облекоутся в стоудъ и срамъ ищющеи злая мне.
14. Аз же воиноу оуповаю на тя, и приложю на всякоу похвалоу твою.
15. Оуста моя възвестятъ правдоу твою, весь д(е)нь сп(асе)нье твое,
яко не познах книжна.
16. Внидоу в силе г(оспод)ни: г(оспод)и, помяноу правьдоу единаго тобе.
17. Б(ож)е мои, имже наоучи мя от оуности моея,
и до ныне възвещю чюдеса твоя.
18. И до старости матерьства б(ож)е мои, не остави мене, и дондеже
възвещю мышцю твою родоу всемоу грядоущемоу,
19. Силоу твою, и правдоу твою, б(ож)е, до вышних,
яже створил ми еси величья. б(ож)е, кто подобенъ тобе;
20. Еликы явил ми еси скорби многы и злы; и обращь живил мя еси,
и от безднъ земля вьзвел мя еси:
21. Оумножилъ еси на мне величествие твое, и обращь оутешил мя еси,
и от безднъ земли пакы вьзведе мя.
22. Ибо азъ исповемься тобе в людех г(оспод)и, въ сосоудехъ п(са)л(о)мъскых
истиноу твою б(ож)е. пою тобе в гоуслех, с(вя)тыи из(раи(л(е)в.
23. Възрадоуе та ся оустне мои, егда пою тобе, и д(у)ша моя, юже еси избавилъ:
24. Еще же и языкъ мои вес(ь) д(е)нь пооучится правде твоеи,
егда постыдятся и посрамятся ищющеи злая мне.

 

ПСАЛОМ 71
Д(а)в(и)д(о)в, о соломоне х(ри)с(то)ва пр(о)рочьства ц(а)р(с)тва
избавление языкомь.

1. Б(ож)е, соуд твои ц(а)р(е)ви даи же, правьдоу твою с(ы)ноу ц(а)р(е)воу:
2. Соудити людемь твоимь вь правдоу, и нищимь твоимь в соуд.
3. Да приимоу[т] горы миръ людии, холми правдоу.
4. Соудить нищимь людскымь, и сп(а)сеть с(ы)ны оубогых, и смирить клеветника.
5. И пребоу[де]ть [с] с(о)лнц(е)мь, преже лоуны рода родовъ.
6. И снидеть яко дождь на роуно, и яко капля каплющия на землю.
7. Восияеть во д(ь)ни его правда, и множьствомь мира, дондеже отимется лоуна.
8. И обладаеть от моря до моря, и от рекъ до конець вселеныя.
9. Пред ним припадоуть ефиоплене, и врази его персть полижють.
10. Ц(а)рие фарсистии, острови дары принесоуть,
ц(а)рие аравитьстии и сава дары приведоуть:
11. И поклонятся емоу вси ц(а)рие земьстии, вси языци поработають емоу.
12. Яко избавилъ есть нища от силна, и оубога, емоуже не бе помощника.
13. Пощадить нища и оубога, и д(у)ша оубогых сп(а)сеть:
14. От лихвы и от неправды избавить д(у)шю ихъ, и честно имя его пред ними.
15. И живъ боудеть, и дасться емоу от злата аравииска,
и помоляится о немь воиноу, весь д(е)нь бл(а)г(о)с(ло)вять и.
16. И боудеть оутвержение на земли на верхъ горъ: превъзнесется пач(е) лива(на)
плод его, и процветоуть от града яко трава земная.
17. Боудеть имя его бл(аго)с(ло)вено в векы, преже с(о)лнца пребываеть имя его:
и възбл(аго)сл(о)вятся о немь вся колена земная, вси языци оубл(а)жать ег(о).
18. И б(лагос)л(о)в(е)нъ г(оспод)ь б(ог)ъ из(раи)л(е)въ, творяи чюдеса единъ.
19. И б(лагос)л(о)в(е)но имя славы его в векы, и вь векъ века:
и исполнится славы его вся земля: боудеть. боудеть.

СЛАВА :

ПСАЛОМ 72
Асафовъ.

1. Коль бл(а)гъ б(ог)ъ из(раи)л(е)въ, правымь с(е)рдц(е)мь.
2. Мне же мало не подвизастася нозе, мало не прольяшася стопы моя.
3. Яко вьзревновах на безаконныя, миръ грешникомъ зря:
4. Яко нес(ть) вьсклонения вь см(е)рти ихъ, и оутвержения в ране ихъ:
5. Вь троудех ч(е)ловечьскыхъ не соуть, и сь ч(е)л(о)в(е)кы не приимоуть ранъ.
6. Сего ради оудержа ихъ гордыни до конца:
одеяшася неправдоую и нечестьемь своемь.
7. Изыидеть яко ис тоука неправда ихъ: преидоша в любовь с(е)рдца.
8. Помыслиша и г(лаго)л(а)ша вь лоукавьстве, неправдоу в высотоу г(лаго)л(а)ша.
9. Положиша на н(е)б(е)си оуста своя, и языкъ ихъ преиде по земли.
10. Сего ради обратятся люд(и)е мои семо, и д(е)нье исполнь обрящются въ них.

 


11. И реша: како оуведе б(ог)ъ; и аще есть разоумь в вышнемъ;
12. Се си грешници и гобзоующе в векы, и оудержаша богатство.
13. И рехъ: оубо всоуе оправдих с(е)рдце мое,
и оумых въ неповинных роуце мои;
14. И быхъ бьенъ весь д(е)нь, и обличьникъ мои на оутрия.
15. Аще г(лаго)л(а)хъ, повемь тако: се родоу с(ы)н(о)въ твоихъ, емоуже обещахоу.
16. И непьщевах разоумети: се троуд есть пред(о)мною,
17. Дондеже внидоу вь с(вя)тило б(о)жие, и разоумею в последняя ег(о).
18. Обаче за лщения ихъ, положилъ имь еси злая,
низложилъ ихъ еси, внегда разгордеша.
19. Како быша в запоустение; внезапоу сканчашася,
погибоша за безакон(и)е свое.
20. Яко сонье въстающаго, г(оспод)и, вь граде твоемь иконоу ихъ оуничижиши.
21. Яко розгореся с(е)рдце мое, и оутроба моя изменис(я):
22. И азъ оуничиженъ, и не разоумехъ, скотъ быхъ оу тобе.
23. И азъ выиноу с тобою: держалъ еси роукоу десноую мою:
24. И сь с(о)ветомь твоимь наставил мя еси, и сь славою прият мя.
25.Что бо ми есть на н(е)б(е)си; и от тобе что в(о)схотех на земли;
26. Исчезе с(е)рдце мое и плот(ь) моя, б(ож)е с(е)рдца моего,
и честь моя б(ож)е вь векы.
27. Яко се оудаляющеися от тобе, погибноуть:
потребилъ еси всякого любодеющаго от тобе.
28. Мне же прилеплятися б(ого)ви бл(а)го есть, пологати на г(оспод)а оупованье мое,
да вьзвещю вся хвалы твоя, и во вратехъ дщере сионя.

ПСАЛОМ 73
Разоумъ асафовъ.

1. Въскоую б(ож)е отриноу до конца,
разгневася ярость твоя на овьца пажити твоея;
2. И помяни снемь твои, иже стяжа исперва. избавилъ еси жезлъ
достоянья твоего, гора сионъ си, и вь ню же вселился еси.
3. Възьдвигни роуце твои на гордыню их вь конець,
елико лоукавнова врагъ о с(вя)темь твоемь.
4. И вьсхвалишася ненавидящеи тобе посреде празника твоего:
положиша знаменья своя, знаменья и не разоумеша.
5. Яко во исходе превыше: яко в доубраве древяне секирами расекоша
6. Двери его вкоупе, сечивомь и оскордомь разроушиша и.
7. Вожгоша огнемь с(вя)тило твое на земли, оскверниша село имени твоего.
8. Реша вь с(е)рдци своемь оужики ихъ вкоупе:
придете и отставимъ вся празникы б(о)жия от земля.
9. Знамении их не видехомъ: нес(ть) ктомоу пр(о)р(о)ка,
и нас не познаеть потомь.
10. Доколе б(ож)е поносить врагъ;
раздражаеть противныи имя твое до конца;
11. Вскоую отвращаеши роукоу твою,
и десницю твою от среды ядрь твоихъ до конца;

 

12. Б(ог)ъ же ц(а)рь нашь преже векъ, с(о)дела сп(асе)нье посреде земля.
13. Ты оутверди силою твоею море, ты с(о)кроушилъ еси главы змиемь в воде.
14. Ты столче главоу змиемоу, и далъ еси того брашно людемь ефиопьскымь.
15. Ты расторже источникы и потокы: ты исяче рекы ефамьскыя.
16. Твои есть д(е)нь, и твоя есть нощь: ты с(о)верши зяря и с(о)лнце.
17. Ты с(о)творилъ еси вся пределы земля: лето и весноу ты созьда.
18. Помяни сия: врагъ поноси г(осподе)ви,
и люд(и)е безоумнии разьдражиша имя твое.
19. Не преда же зверемь д(у)ша, исповедающаяся тобе,
д(у)шь оубогых твоихъ не забоуди до конца.
20. Призри на заветъ твои:
яко наполнишас(я) омрачении земля домовъ неправеденъ.
21. Да не вьзратится смиренъ и срамленъ: нищь и оубогъ вьсхвалита имя твое.
22. Вьскр(е)сни б(ож)е, соуди прю твою:
помяни поношение твое, еже от безоумнаго вес(ь) д(е)нь.
23. Не забоуди гл(а)са м(о)л(и)твеник твоихъ,
гордыни ненавид(я)щих тя взииде воиноу.

СЛАВА :

ПСАЛОМ 74
1. Асафовъ.

2. Исповемся тобе б(ож)е, исповемыся тобе, и призовемь имя твое:
повемы вся чюдеса твоя.
3. Егда приимоу время, азъ правоты соужю.
4. Растаяся земля и вси живоущеи на неи. азъ оутвердихъ столпы ея.
5. Рехъ законопрестоупникомь: не безаконоуите,
и согрешающимъ: не възносите рога.
6. Ни вьздвижите на высотоу рога вашего, и не г(лаго)лите на б(ог)а неправдоу:
7. Яко ни от исходъ, ни от запад, ни от поустъ горъ.
8. Яко б(ог)ъ соудии есть, сего смиряеть, а сего възносить.
9. Яко чаша в роуце г(оспод)ни, вина не растворена исполнь растворения,
и оуклони от сия в сию: обаче дрождья его не искыдася,
испиють вси грешнии земли.
10. Аз же вьзрадоуюся вь векы, пою б(ог)оу ияковлю:
11. И вся рогы грешныхъ сломлю, и вьзнесетс(я) рогъ праведнаго.

ПСАЛОМ 75
1. Асафовъ.

2. Ведомь во июдеи б(ог)ъ, во изр(аи)ли велие имя его.
3. Быс(ть) в мире место его, жилище его в сионе.
4. Тоу с(о)кроуши крепости лоукъ, щитъ и ороужье и брань.
5. Просвещаеши ты дивно от горъ веченъ.

 


6. Вьзмоутишася вси неразоумнии с(е)рдц(е)мь: оусноуша сонъ свои,
и не обретоша ничтоже, вси моужие богатъства роуками своими.
7. От запрещенья твоего, б(ож)е ияковль, вьздремашася вьседше на коня.
8. Ты страшенъ еси, и кто противоустанеть ти; оттоле гневъ твои.
9. Съ н(е)б(е)се слышанъ с(о)творилъ еси соуд, земля оубояся, и оумолча,
10. Внегда вьскр(ес)неть на соуд б(ог)ъ, сп(а)сти вся кроткыя земли.
11. Яко помышление ч(е)л(о)в(е)ка исповесться тобе,
и останокъ помышления праздьноует ти.
12. Помолитеся и вьздадите г(осподе)ви б(ог)оу нашемоу вси соущии
окр(е)стъ его принесоуть дары,
13. Страшномоу и отемлющемоу д(у)хы княземь,
страшьномоу паче ц(а)реи земных.

ПСАЛОМ 76
1. В конець, о идифоуме, асафовъ.

2. Г(лаго)л(о)мь моимь къ г(оспод)оу возвах, г(лаго)л(о)мь моимь къ г(оспод)оу,
и внят ми.
3. Вь д(е)нь печали моея б(ог)а взисках роукама моима, нощию пред нимь,
и не прелщенъ бых: отвержеся оутешитися д(у)ша моя.
4. Помяноух б(ог)а и вьзвеселихся, вьскорбехъ, и пренеможе д(у)хъ мои.
5. Предваристе стражбы очи мои, смоутихся и не г(лаго)лахъ.
6. Помыслих д(ь)ни перьвыя, и лета вечная помяноух, и пооучихся.
7. Нощию с(е)рдц(е)мь моимь п(о)оучяхся, и клецаше д(у)хъ мои:
8. Еда в векы отринеть г(оспод)ь, и не приложить бл(а)говолити пакы;
9. Ли до конца м(и)л(о)сть свою отсечеть, сконча г(лаго)лъ от рода в род;
10. Егда забоудеть оущедрити б(ог)ъ;
или оудерьжить вь гневе своемь щедроты своя;
11. И рехъ: ныне начахъ: си измена десница вышняго.
12. Помяноухъ дела г(оспод)ня: яко помяноу от зачала чюдеса твоя,
13. И пооучюся во всехъ делехъ твоих, и в начинаньихъ твоихъ пооучюся.
14. Б(ож)е, вь с(вя)темь поуть твои: кто б(ог)ъ велеи яко б(ог)ъ нашь;
15. Ты еси б(ог)ъ творяи чюдеса: сказалъ еси в людехъ твоихъ силоу твою,
16. Избавилъ еси мышцею твоею люд(и) твоя, с(ы)ны ияковля, иосифовы.
17. Видеша тя воды б(ож)е, видеша тя воды, и оубояшася: смоутишася безды.
18. Множьствомь шюма вод: глас даша облаци, ибо стрелы твоя преходять.
19. Глас грома твоего в колеси, осветиша молонья твоя вселеноую:
подвижася, и тре(пе)тна быс(ть) земля.
20. В мори поутье твои, и стезя твоя в водах многахъ,
и стопы твоя не познаются.
21. Извелъ еси яко овца люди своя, роукою моисеевою и аронею.

СЛАВА :

 


 

К А Ф И З М А О Д И Н Н А Д Ц А Т А Я

ПСАЛОМ 77
Д(а)в(и)д(о)въ.

1. Вънемлете, люд(и)е мои, законъ мои,
приклоните оухо ваше вь г(лаго)лы оустъ моихъ.
2. Отверзоу вь притъчахъ оуста моя, провещаю гаданья исперва.
3. Елико слышахомь и разоумехомь я, и о(т)ци наши поведаша намъ:
4. Не оутаися от чад ихъ в родъ инъ, възвещающе хвалы г(оспод)ня,
и силы его, и чюдеса его, яже с(о)твори.
5. И вьзъдвиже сведенье во иякове, и законъ положи въ изр(аи)ли:
елико заповеда о(т)ц(е)мь нашимь, сказати я с(ы)номь своимь.
6. Яко да познаеть родъ инъ, с(ы)нове родящеися,
и вьстаноуть и поведять я с(ы)н(е)мь своим:
7. Да положать на б(ог)а оупованье свое, и не забоудоуть делъ б(о)жиихъ,
и заповеди его взищють:
8. Да не боудоуть якоже о(т)ци ихъ, род стропьтивъ и прогневаяи, род,
иже не исправи с(е)рдца своего, и не оувери съ бо(го)мь д(у)ха своего.
9. С(ы)нове ефремови напрягающе и стреляюще лоукы,
възвратишася вь д(е)нь брани:
10. Не с(о)храниша завета б(о)жия, и в законе его не изволиша ходити.
11. И забыша бл(а)годеянии его, и чюдеса его, яже яви имь:
12. Пред о(т)ци ихъ, яже с(о)твори чюдеса в земьли егоупетьстеи,
и на поли танеосе.
13. Разверже море, и проведе я: представи воды яко мехъ:
14. И веде я облакомь во дне, и всю нощь просвещеньемь огня.
15. Разверзе камень в поустыни, и напои я яко в бездне мнозе:
16.[ И изведе воду ис камене], и низведе яко рекы воды.
17. И приложиша еще согрешати емоу, разгневаша вышняго в безводне:
18. И искоусиша б(ог)а вь с(е)рдцихъ своихъ, вьспросити брашна д(у)ш(а)мъ своимь.
19. И клеветаша на б(ог)а, и рекоша:
еда вьзможеть б(ог)ъ оуготовати тряпезоу в поустыни;
20. Понеже порази камень, и потекоша воды, и потоци наводнишася:
еда и хлебъ можеть дати; ли оуготовати тряпезоу людемь своимь;
21. Сего ради слыша г(оспод)ь и разгневася, и огнь вьзгорися во иякове,
и гневь взииде на изр(аи)ля:
22. Зане не яша веры б(ого)ви, ни оуповаша на сп(асе)нье его.
23. И заповеда облаком свыше, и двери н(е)б(е)се отверзе:
24. Одожди имь манноу ясти, и хлебъ н(е)б(е)сныи дас(ть) имь.
25. Хлебъ анг(е)л(ь)скыи яде ч(е)л(о)в(е)къ, брашно посла имь до обилья:
26. Вьзьдвиже оугъ с н(е)б(е)се, и наведе силою своею ливоу:
27. И одожди на ня яко прах плоти, и яко песокъ морьскыи и птица пернаты,
28. И падоша посреде стана ихъ, окр(е)стъ жилищь их.
29. И яша и насытишася зело, и желанье ихъ принесе имъ.

 


30. Не лишишася от желании своихъ. еще брашноу соущю во оуст(е)х ихъ,
31. И гневъ б(о)жии взыде на ня, и оуби множаишая ихъ,
и избраннымъ изр(аи)л(е)вомь запятъ.
32. Над всеми семи согрешиша пакы, и не яша веры чюдесемь его:
33. И скончашася в соуете д(е)нье ихъ, и лета ихъ со тщаниемь.
34. Егда оубиваше ихъ, тогда взыскахоу его, и обращахоуся,
и оутреневахоу къ б(ог)оу:
35. И помяноуша: яко б(ог)ъ помощникъ имь есть,
и б(ог)ъ вышни избавитель имь есть.
36. И възлюбиша его оусты своими, и языкомь своимь солгаша емоу:
37. С(е)рдце же ихъ не бе право с нимь, ни оуверишася в завете его.
38. То же есть щедръ, и очесть грехи ихъ, и не растлить,
и оумножить вьзвратити ярость свою, и не ражжеть всего гнева своего.
39. И помяноу, яко плоть соуть, д(у)хъ ходяи не обращаяся.
40. Колькраты прогневаша и в поустыни, разъдражиша и в земли безводне;
41. Обратишася и искоусиша б(ог)а, и с(вя)т(а)го изр(аи)л(е)ва прогневаша.
42. Не помяноуша роукы его д(е)нь, вонже избави ихъ из роукы стоужающаго:
43. Якоже положи вь египте знамения своя, и чюдеса своя на поли танеосе.
44. И преврати в кровь рекы ихъ, и источники ихъ, яко да не пиють.
45. Посла на ня песья моухы, и поядоша их, и жабы, и растли ихъ.
46. И дас(ть) ерисиви плод ихъ, и троуды ихъ проугомъ.
47. Изби градомъ винограды их, и сикамины ихъ сланою:
48. И предасть градоу скоты ихъ, и именье ихъ огню.
49. Посла на ня гневъ ярости своея, ярость и гневъ и скорбь,
послание анг(е)лы лютыми.
50. Поуть створити стезя гневоу своемоу:
не пощади от см(е)рти д(у)ша ихъ, и скоты ихъ вь см(е)рти затвори:
51. И поби всякъ первенець в зимли египетьстеи,
от начатокъ всякого троуда ихъ в селех хамовехъ.
52. И в[о]здвиже яко овца люди своя, и вьзведе я яко стадо в поустыни.
53. И настави я на оупование, и не оустрашишася, и врагы ихъ покры море.
54. И введе я в гороу с(вя)т(ы)ня своея, гороу сию, яже стяжа десница его.
55. И изгна от лица ихъ языкы, и по жребью раздели имь землю оужемь
деломернымъ, и всели в селехъ ихъ колена изр(аи)л(е)ва.
56. И искоусиша и прогневаша б(ог)а вышняго, сведенья его не с(о)храниша.
57. И обратишася, и отвергошася якоже и о(т)ци ихъ,
превратишася в лоукъ развращенъ.
58. И прогневаша и в холмехъ своихъ, и во истоуканных своихъ разражиша и.
59. Слыша б(ог)ъ и презре, и оуничижи зело изр(аи)ля:
60. И отриноу скынию силомьскоую, село внеже вселися вь ч(е)л(о)в(е)цехъ:
61. И предас(ть) вь пленъ крепость ихъ, и доброту ихъ в роукы врагомь.
62. И затвори въ ороужи[и] люд(и) своя, и достоянье свое презре.
63. И оуноша ихъ поясть огнь, и д(е)вы ихъ не осетованы быша.
64. И св(я)щ(е)нници ихъ ороужьемь падоша, и вдовица ихъ и не оплаканы быша.
65. И вьста яко спя г(оспод)ь, яко силенъ и шюменъ от вина:
66. И порази врагы своя вьспять, поношенье вечно дасть имъ.

 


67. И отриноу село иосифово, и колено ефремово не избра:
68. И избра колено июдово, гороу сионю, яже вьзлюби.
69. И созда яко инорогъ с(вя)т(ы)ню свою, в земли основа ю в векы.
70. И избра д(а)в(и)да раба своего, и поятъ и от стад овчихъ:
71. От доилиць поятъ его, пасти иякова раба своего, и изр(аи)ля достояние свое:
72. И оупасе ихъ въ незлобе с(е)рдца своего,
и в разоумех роукоу своею наставилъ я есть.

СЛАВА :

ПСАЛОМ 78
Асафовъ.

1. Б(ож)е, придоша языци в достояние твое, оскверниша ц(е)рковь с(вя)тоую твою,
2. Положиша иер(у)с(а)л(и)ма яко овощное хранилище:
положиша троупия рабъ твоихъ брашна птицамь н(е)б(е)снымь,
плоти пр(е)п(о)д(о)бныхъ твоихъ зверемь земнымь:
3. Прольяша кровь ихъ яко водоу окр(е)стъ иер(у)с(а)л(и)ма, и не бе погребаяи.
4. Быхомь поношенье соуседомь нашимь
подражанье и пороугание соущимь окр(е)стъ насъ.
5. Доколе г(оспод)и гневаешися в конець, разгорится яко огнь рвение твое;
6. Пролеи гневъ твои на языкы незнающая тобе,
и на ц(а)рствия, яже имени твоего не призваша:
7. Яко поядоша иякова, и место его опоустиша.
8. Не помяни нашихъ безаконии первыихъ: скоро да варяет ны щедроты твоя
г(оспод)и, яко обнищахомъ зело.
9. Помози намъ б(ож)е сп(аси)т(е)лю нашь: славы ради имени твоего г(оспод)и,
избави нас, и очести грехы наша имени твоего рад(и):
10. Да не когда рекоуть языци: где есть б(ог)ъ ихъ; и оувесться вь
языцехъ пред очима нашима месть крове рабъ твоихъ пролитыя.
11. Да внидеть пред тя вьзъдыханье окованных:
по величью мышца твоея, снабди с(ы)ны оум(е)рщвенныхъ.
12. Вьздаи же соуседомь нашимь седмерицею вь надра ихъ поношенье ихъ
имже поносиша тобе г(оспод)и.
13. Мы же люд(и)е твои, и овца пажити твоея, исповемся тобе б(ож)е в векы,
в род и род вьзвестимь хвалы твоя.

ПСАЛОМ 79
1. Асафо(овъ).

2. Пасыи изр(аи)ля вонми, водяи яко овча иосифа, седяи на хероувиме явися,
3. Пред ефремомь, и вениаминомъ, и манасеем: въздвигни силоу твою,
и прииди сп(а)сти насъ.
4. Б(ож)е, обрати ны, и просвети лице твое, и сп(а)семся.
5. Г(оспод)и б(ож)е силъ, доколе гневаешися на м(о)л(и)твоу рабъ твоихъ;

 


6. Напитаеши ны хлеба слезнаго, и напоиши ны слезъ в мероу.
7. Положил ны еси в пререканье соуседомъ нашимъ,
и врази наши подражаша ны.
8. Г(оспод)и б(ож)е сил, обрати ны, и просвети лице твое, и сп(а)с(е)ни боудемь.
9. Виноград изь египта принесе: изгна языкы, и насади.
10. Поуть с(о)твори пред нимь, и насади коренье его, и исполни землю.
11. Покры горы сень его, и лозье его кедры б(ож)ия:
12. Простре розгы его до моря, и до рекъ отрасли его.
13. Вьскоую разори оплоты его, и обьимають и вси преходящеи поутемь;
14. Озоба и вепрь от лоуга, и инокъ диви поялъ и есть.
15. Б(ож)е силъ обрати же, и призри с [не]б(е)се и вижь, и посети виноград сеи:
16. И с[о]верши его, иже насади десница твоя, и на с(ы)на ч(е)л(о)в(е)ча,
егоже оукрепилъ еси собе.
17. Пожеженъ огнемь и раскопанъ: от запрещения лица твоего погибноут.
18. Боуди роука твоя на моужа десница твоя и на с(ы)на ч(е)л(о)в(е)ческа,
егоже оукрепилъ еси собе.
19. И не отстоупимъ отъ тобе: живиши ны, [и] имя твое призовемь.
20. Г(оспод)и б(ож)е силъ, обрати ны, и просвети лице твое, и сп(асе)ни боудемъ.





Дата добавления: 2014-11-25; Просмотров: 271; Нарушение авторских прав?


Нам важно ваше мнение! Был ли полезен опубликованный материал? Да | Нет



ПОИСК ПО САЙТУ:


Рекомендуемые страницы:

studopedia.su - Студопедия (2013 - 2020) год. Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав! Последнее добавление
Генерация страницы за: 0.012 сек.