Студопедия

КАТЕГОРИИ:


Архитектура-(3434)Астрономия-(809)Биология-(7483)Биотехнологии-(1457)Военное дело-(14632)Высокие технологии-(1363)География-(913)Геология-(1438)Государство-(451)Демография-(1065)Дом-(47672)Журналистика и СМИ-(912)Изобретательство-(14524)Иностранные языки-(4268)Информатика-(17799)Искусство-(1338)История-(13644)Компьютеры-(11121)Косметика-(55)Кулинария-(373)Культура-(8427)Лингвистика-(374)Литература-(1642)Маркетинг-(23702)Математика-(16968)Машиностроение-(1700)Медицина-(12668)Менеджмент-(24684)Механика-(15423)Науковедение-(506)Образование-(11852)Охрана труда-(3308)Педагогика-(5571)Полиграфия-(1312)Политика-(7869)Право-(5454)Приборостроение-(1369)Программирование-(2801)Производство-(97182)Промышленность-(8706)Психология-(18388)Религия-(3217)Связь-(10668)Сельское хозяйство-(299)Социология-(6455)Спорт-(42831)Строительство-(4793)Торговля-(5050)Транспорт-(2929)Туризм-(1568)Физика-(3942)Философия-(17015)Финансы-(26596)Химия-(22929)Экология-(12095)Экономика-(9961)Электроника-(8441)Электротехника-(4623)Энергетика-(12629)Юриспруденция-(1492)Ядерная техника-(1748)

Москва «Искусство» 1978 5 страница





ПСАЛОМ 80
1. В конець, асаф(о)в.

2. Радоуитеся б(ог)оу помощникоу нашемоу, вьскликнете б(ог)оу ияковлю:
3. Приимете пс(а)л(о)мъ и дадите тимпанъ, псалтьрь красенъ с гоусльми.
4. Вьстроубите на новъ м(е)с(я)ць троубою,
в нарочитъ день праздьника вашего:
5. Яко повелен(и)е из(раи)л(е)во ес(ть), и соудба б(ог)а ияковля.
6. Сведенье на иосифе положи, егда изыиде от земля египетьскыя:
языка, егоже не зна, оуслыша.
7. И от[ъ]ятъ от бремене хребетъ его: и роуце его в коши поработасте.
8. Вь скорби призва мя, и избавих тя: оуслышах тя в таине боурне:
искоусих тя на воде пререкания.
9. Слышите, люд(и)е мои, и засведетельствоую вамъ, изр(аи)лю, аще
послоушаеши мене:
10. Да не боудеть въ тобе б(ог)ъ новъ, ни поклонишися б(ог)оу чюжемоу.
11. Аз бо есмь г(оспод)ь б(ог)ъ твои, изведыи тя от земля египетьскыя:
рашири оуста твоя, и исполню я.
12. И не послоушаша люд(и)е мои гласа моего, изр(аи)ль не внятъ ми:
13. И отпоустих ихъ по начи(на)нью с(е)рд(е)ць ихъ,
и поидоуть в начинаниихъ своихъ.
14. Аще быша люд(и)е мои послоушали мене,
и из(раи)ль в поути моя аще бы ходилъ,
15. Ни очесомъ же оубо врагы его смирилъ быхъ,
и на стоужающая имъ възложилъ быхъ роукоу мою.
16. Врази г(оспод)ни солгаша емоу, и боудет время ихъ в векъ:
17. И напита их от тоука пшеничьна, и от камене меда насыти я.

СЛАВА :

ПСАЛОМ 81
Асаф(о)въ.

1. Б(ог)ъ ста в сонме б(о)говъ, посреде же богы расоудить.
2. Доколе соудите неправдоу, и лиць грешничь обиноуетеся;
3. Соудите сироу и нищю, смирена и оу(бо)га оправдите:
4. Измете нища и оубога, из роукы грешнича избавите и.
5. Не оуведяша, ни разоумеша, во тме ходять:
да подвижются вся основания земли.
6. Азъ рехъ: б(о)зи боудете, и с(ы)н(о)ве вышняго вси.
7. Вы же яко ч(е)л(о)в(е)ци оумираете, и яко единъ от князь падаете.
8. В(о)скр(ес)ни б(ож)е, соуди земли: яко ты наследиши во всехъ языцех.

ПСАЛОМ 82
1. Д(а)в(и)д(о)в, песнь.

2. Б(ож)е, кто оуподобится тобе; не премолчи, ни оукроти б(ож)е:
3. Яко се врази твои въшюмеша, и ненавидящеи тобе вьздвигноуша главоу.
4. На люди твоя лоукавноваша волею, и с[о]вещаша на с(вя)тыя твоя.
5. Реша: приидете и потребимъ я от языкъ, и не помянется имя изр(аи)лево ктомоу.
6. Яко с[о]вещаша единомышлениемъ вкоупе, и на тя заветъ завещаша:
7. Села идоумеиска, исмаилите, моавъ и агарене,
8. Гевалъ, и аммонъ и амаликъ, иноплеменници съ живоущиими в тире.
9. Ибо и ассоуръ с ними приде, быша в застоупление с(ы)н(о)мъ лотовым.
10. С[о]твори имъ яко мадиамоу и сисаре, яко авимоу в потоце киссове.
11. Потребишася во иердоре, быша яко гнои земныи.
12. Положи князя ихъ, яко орива и зива, и зевея и салмона, и вся князя ихъ,
13. Иже реша: да наследимъ собе с(вя)т(и)ло б(ож)ие.
14. Б(ож)е мои, положи ихъ яко коло, яко трость пред лицемъ ветроу.
15. Яко огнь, иже попаляеть доубравы, яко пламень пожигаяи горы:
16. Тако поженеши я боурею твоею, и гневомъ твоиъ смоутиши ихъ.
17. Исполни лица их бесчестья, и взъищють имени твоего г(оспод)и.
18. Да постыдятся и смятоутся в векы века, и посрамятся и погибноуть.
19. И познають, яко имя тобе г(оспод)ь, ты единъ вышнии по всеи земли.



ПСАЛОМ 83.
1. C(ы)новъ кореов.

2. Коль вьзлюблена села твоя г(оспод)и силъ;
3. Желаеть и скончевается д(у)ша моя во дворы г(оспод(ня):
с(е)рдце мое и плоть моя вьзрадовастася о б(о)зе живе.
4. Ибо птица обрете собе храминоу, и горлица собе гнездо, идеже положи
птенца своя: олторя твоя г(оспод)и б(ож)е силь, ц(а)рю мои, б(ож)е мои.
5. Бл(а)ж(е)ни живоущеи в домоу твоемъ: векы векомъ вьсхвалятъ тя.
6. Бл(а)ж(е)нъ моужь, емоу же есть застоупленье его от тобе:
въсхоженье вь с(е)рдци своемь завеща,
7. Въ оудолъ плачевне, на месте идеж(е) положи:
ибо бл(агос)л(о)в(е)нье дас(ть) законъ даяи.

 

8. Поидоуть от силы в силоу: явится б(ог)ъ б(о)гомь в сионе.
9. Г(оспод)и б(ож)е силъ, оуслыши м(о)л(и)твоу мою, вноуши б(ож)е ияковль:
10. Защитниче нашь вижь б(ож)е, и призри на лице х(рист)а твоего.
11. Яко лоуче д(е)нь единъ вь дворехъ твоихъ, паче тысящь: изволих приметатися
в домоу б(ог)а моего и паче, нежели жити ми в селехъ грешничих.
12. Яко м(и)л(о)сть и истиноу любить г(оспод)ь б(ог)ъ, бл(а)г(о)д(а)ть и славоу дас(ть):
г(оспод)ь не лишить бл(а)га ходящихъ незлобою.
13. Г(оспод)и б(ож)е силъ, бл(а)ж(е)нъ ч(е)л(о)в(е)къ оуповаяи на тя.

ПСАЛОМ 84
1. В конець, с(ы)н(о)в кореовъ.

2. Бл(а)говолилъ еси г(оспод)и землю твою, възвратилъ еси пленъ ияковль.
3. Отпоустилъ еси безакония люд(е)мъ твоимь, покрылъ еси вся грехы ихъ.
4. Оукротилъ еси весь гневъ твои, вьзвратился еси от гнева ярости твоея.
5. Обрати ны б(ож)е сп(асе)нии наших, и възврати ярость твою от нас.
6. Еда в векы прогневаешися на ны; или простреши гневъ свои от рода в род;
7. Б(ож)е, ты обращь живиши ны, и люд(и)е твои вьзвеселятся о тобе.
8. Яви намъ г(оспод)и м(и)л(о)сть твою, и сп(асе)ние твое даи же намъ.
9. Оуслышю, что реч(е)ть о мне г(оспод)ь б(ог)ъ: яко речеть миръ на
люд(и) своя, и на преподобныя своя, и на обращающая с(е)рдца к немоу.
10. Обаче близь боящимся его сп(асе)нье его, вселити славоу в землю нашю.
11. М(и)л(о)сть и истина сретостася, правда и миръ облобызастася:
12. Истина от земля восия, и правда с н(е)бес(е) приниче.
13. Ибо г(оспод)ь дасть бл(а)г(о)дать, и земля наша дасть плод свои.
14. Правда пред нимъ предидеть, и положить в поуть стопы своя.

СЛАВА :

К А Ф И З М А Д В Е Н А Д Ц А Т А Я

ПСАЛОМ 85
М(о)л(и)тва д(а)в(и)д(о)ва.

1. Приклони г(оспод)и оухо твое, и оуслыши мя: яко нищь и оубоъ есмь азъ.
2. Схрани д(у)шю мою, яко пр(е)п(о)д(о)б(е)нъ есмь:
сп(а)си раба твоего б(ож)е мои, оуповающаго на тя.
3. Помилоуи мя г(оспод)и, яко к тобе взовоу вес(ь) д(е)нь.
4. Вьзвесели д(у)шю раба твоего, яко к тобе взяхъ д(у)шю мою.
5. Яко ты г(оспод)и бл(а)гъ и кротокъ,
и многом(и)л(о)ст(и)въ всемъ призывающим тя.
6. Вноуши г(оспод)и м(о)л(и)твоу мою, и вонми глас моленья моего.
7. Въ д(е)нь печали моея возвах к тобе, яко оуслыша мя.
8. Нес(ть) подобна тобе г(оспод)и въ б(о)зехъ, и нес(ть) по деломъ твоимъ.

 

9. Вси языци, елико створи, приидоуть и поклонятся пред тобою г(оспод)и,
и прославятъ имя твое:
10. Яко велеи еси ты, и творяи чюдеса, ты еси б(ог)ъ единъ.
11. Наведи мя г(оспод)и на поуть твои, и поидоу въ истине твоеи:
да вьзвеселится с(е)рдце мое боятися имени твоего.
12. Исповемся тобе г(оспод)и б(ож)е мои всемъ с(е)рдцемъ моимъ,
и прославлю имя твое в векы:
13. Яко м(и)л(о)сть твоя велия на мне, избави д(у)шю мою от ада преисподняго.
14. Б(ож)е, законопрестоупници вьсташа на мя, и снемь крепкых
взыскаша д(у)ша моя, и не предложиша тобе пред собою.
15. И ты г(оспод)и б(ож)е мои щедръ и м(и)л(о)ст(и)в, долготерпливъ
и многом(и)л(о)ст(и)въ, и истиненъ,
16. Призри на мя и помилоуи мя: даи же державоу отрокоу твоемоу,
и сп(а)си с(ы)на рабы твоея.
17. Створи со мною знамение вь бл(а)го: и оувидять ненавидящии мя,
постыдятся, яко ты г(оспод)и поможе ми, и оутешил мя еси.

ПСАЛОМ 86
1. С(ы)н(о)въ кореовъ.

2. Основания его на горахъ с(вя)т(ы)хъ:
любить г(оспод)ь врата сионя паче всех селъ ияковль.
3. Преславная г(лаго)л(а)шася о тобе граде б(о)жии.
4. Помяноу раавъ и вавилона сведоущих мя: и се иноплеменници,
и тиръ, и люд(и)е ефиопьстии, си быша тоу.
5. М(а)ти сионъ речеть: ч(е)л(о)в(е)къ и ч(е)л(о)в(е)къ родися в нем,
и тъ основа и вышнии.
6. Г(оспод)ь повесть вь книгахъ людемь и княземъ, симь бывшимъ в немь:
7. Яко веселящимся всемъ жилище оу тобе.

ПСАЛОМ 87
1. Пес(нь) с(ы)н(о)въ кореов.

2. Г(оспод)и б(ож)е сп(асе)нья моего, вь д(е)нь возвах, и в нощи пред тобою:
3. Да внидеть пред тя м(о)л(и)тва моя, приклони оухо твое к молен(ь)ю моемоу.
4. Яко исполнися золъ д(у)ша моя, и животъ мои аде приближися.
5. Привм[е]ненъ бых с нисъходящиими в ровъ,
быхъ яко ч(е)л(о)в(е)къ бес помощи,
6. Вь м(е)ртвыхъ свобод(ь): яко язвени спяще в гробех, ихже неси помяноулъ
ктомоу, и ти от роукы твоея отриновени быша.
7. Положиша мя в рове преисподнемь, в темных и сени см(е)ртнеи.
8. На мне оутвердися ярость твоя, и вся волны твоя наведе на мя.
9. Оудалилъ еси знаемых моихъ от мене: положиша мя мерзость собе:
преданъ бых и не исхожах.
10. Очи мои изнемогосте от нищиты: возвах к тобе г(оспод)и вес(ь) д(е)нь,
въздех к тобе роуце мои.

 


11. Егда м(е)ртъвыми створиши чюдеса;
ли врачеве въскр(е)сять, и исповедятся тобе;
12. Еда повесть кто вь гробехъ м(и)л(о)сть твою, и истинноу твою в погибели;
13. Егда познана боудоуть во тме чюдеса твоя, и правда твоя в земли забовнеи;
14. И азъ к тобе г(оспод)и возвах, и оутро м(о)л(и)тва моя варить тя.
15. Въскоую г(оспод)и отрееши д(у)шю мою; отвращаеши лице твое от мене;
16. Нищь есмь азъ, и въ троудех от оуности моея:
вьзнесъ же ся, смирих и омоутихъ.
17. На мне преидоша гневи твои, оустрашения твоя възмоутиша мя:
18. Обидоша мя яко вода вес(ь) д(е)нь, одержаша мя вкоупе.
19. Ооудалилъ еси от м(е)не дроуга ближняго, и знаемых моихъ от стр(ас)ти.

СЛАВА :

ПСАЛОМ 88
1. Разоумъ ефама израильтянина.

2. М(и)л(о)сть твою г(оспод)и в векы вспою,
в род и род вьзвещю истиноу твою оусты моими.
3. Яко реклъ еси: в векы м(и)л(о)сть съзижется:
на н(е)б(е)се оуготовается истина твоя.
4. Завещах заветъ избраннымъ моимъ, кляхся д(а)в(и)доу рабоу моемоу:
5. До века оуготоваю семя твое, и сзижю в род и род престолъ твои.
6. Исповедять небеса чюдеса твоя г(оспод)и,
ибо истиноу твою вь ц(е)ркви с(вя)т(ы)хъ.
7. Яко кто въ облацех оуравнится г(осподе)ви,
8. Оуподобится г(осподе)ви въ с(ы)нохъ б(о)жиихъ, б(ог)ъ прославляемъ въ
с[о]ветех с(вя)тыхъ, велеи и страшенъ есть над всеми окр(е)стъными его.
9. Г(оспод)и б(ож)е силъ, кто подобенъ тобе;
силен еси г(оспод)и, и истина твоя окр(е)стъ тобе.
10. Ты владееши державою морьскою: възмоущенье же волнъ его ты оукротиши.
11. Ты смирилъ еси яко язвена гордаго,
мышцею силы твоея разгналъ еси врагы твоя.
12. Твоя соут(ь) н(е)б(е)са, и твоя ес(ть) земля: вселенная и конца ея ты основа.
13. Северъ и море ты созда: фаворъ и ермонъ о имени твоемь възрадоуетася.
14. Твоя мышца с силою: да оутвердится роука твоя, вьзнесется десница твоя.
15. Правда и соудба оуготование пр(ес)т(о)лоу твоемоу:
м(и)л(о)сть и истина предидеть пред лицемь твоимь.
16. Блажени люд(и)е ведоущеи вьскликновение:
г(оспод)и, вь свет(е) лица твоего поидоуть,
17. И о имени твоемь вьзрадоуются вес(ь) д(е)нь, и правдою твоею възнесоутся.
18. Яко похвала силы ихъ ты еси, и въ бл(а)говолении твоемь възнесется рогъ нашь.
19. Яко г(оспод)не ес(ть) застоупленье, и с(вя)т(а)го изр(аиле)ва ц(а)ря нашаго.
20. Тогда г(лаго)лалъ еси в видении с(ы)номь твоимь, и реч(е):
положих помощь на силнаг(о), вьзнесохъ избраннаго от люди(и) моихъ:

 


21. Обретох д(а)в(и)да раба моего, елеемь с(вя)тыимъ моимъ помазахъ и.
22. Роука бо моя поможеть емоу, и мышца моя оукрепить и:
23. Ничтоже оуспееть врагъ нань, и с(ы)нъ безакония не приложить озлобити его.
24. И сьсекоу от лица его врагы его, и не[на]видящая его побежю.
25. И истина моя, и м(и)л(о)сть моя с нимь, и во имя мое вьзнесется рогъ его:
26. И положю на мори роукоу его, и на реках десницю его.
27. Тои взовет мя: о(те)ць мои еси ты, б(ог)ъ мои, и застоупникъ сп(асе)ния моего.
28. И азъ первенца положю и, высока над ц(а)рии земьскыми.
29. В векы схраню емоу м(и)л(о)сть мою, и заветъ мои веренъ емоу:
30. И положю в векы века семя его, и пр(е)ст(о)лъ его яко д(е)нье н(е)боу.
31. Аще оставять с(ы)н(о)ве его законъ мои, и въ соудбахъ моихъ не поидоуть:
32. Аще оправданья моя осквернять, и заповедии моихъ не схранять:
33. Посещю жезломь безакония ихъ, и ранами неправды ихъ.
34. М(и)л(о)сть же мою не разорю от них, ни преврежю же во истине моеи:
35. Ни оскверню же завета моего, и исходящихъ от оустъ моихъ не отвергоуся.
36. Единою кляхся вь с(вя)тое мое, аще д(а)в(и)доу солжю;
37. Семя его в векы пребоудеть, и пр(ес)т(о)лъ его яко с(о)лнце предо мною,
38. И яко лоуна свершена в векы: и сведетель на н(е)б(е)си веренъ.
39. Ты же отриноу и не оуничижи, отверже х(рист)а твоего:
40. Разорилъ еси заветъ раба твоего, осквернилъ еси на земли с(вя)т(ы)ню его.
41. Низложилъ еси вся оплоты его, положилъ еси твердь его страх.
42. Расхыщахоуть и вси мимоходящии поутемь,
быс(ть) поношенье соуседомь своимъ.
43. Вьзнеслъ еси десницю стоужающиимъ емоу, вьзвеселилъ еси вся врагы его:
44. Вьзвратилъ еси помощь ороужья его, и не застоупи его вь брани.
45. Разорилъ еси от оцещения его, пр(е)ст(о)лъ его на земли поверже:
46. Оумалилъ еси д(ь)ни времене его, облиялъ еси стоудомъ.
47. Доколе г(оспод)и отвращаешися в конець; разгорится яко огнь гневъ твои;
48. Помяни, кыи мои съставъ: еда бо всоуе созда вся с(ы)ны ч(е)л(о)в(е)ч(ьс)кыя;
49. Кто ес(ть) ч(е)л(о)в(е)къ, иже поживеть и не оузрить см(е)рти,
избавить д(у)шю свою из рокы адовы;
50. Кде соуть м(и)л(о)сти твоя древняя г(оспод)и,
имьже клятся д(а)в(и)доу во истине твоеи;
51. Помяни г(оспод)и поношение рабъ твоихъ,
иже оудержа в надре моемь многы языкы:
52. Иже поносиша врази твои г(оспод)и, иже поносиша изменение х(рист)а твоего.
53. Бл(агосло)в(е)нъ г(оспод)ь вь векы: боудеть, боудеть.

СЛАВА :

ПСАЛОМ 89
1. М(о)л(и)тва мооусеова ч(е)л(о)в(е)ка б(ож)ия.

2. Г(оспод)и, прибежище быс(ть) намъ в род и род:
3. Преже даже горамъ не быти и создатис(я) земли и вселенеи,
и от века и до века ты еси.

 

4. Не възврати ч(е)л(о)в(е)ка вь смирение. и реклъ еси:
обратитеся с(ы)н(о)ве ч(е)л(о)в(е)чьстии.
5. Яко тысяща летъ пред очима твоима г(оспод)и яко д(е)нь вчерашьнии,
иже мимо иде, и стража нощная.
6. И оуничижения ихъ еще боудоуть: оутро яко [тра]ва мимо идеть,
оутро процвететь и преидеть: вечеръ отпадеть, ожестееть и исхнеть.
7. Яко скончахомся гневомъ твоимь, и яростью твоею смятохомся.
8. Положилъ еси безакония наша пред собою:
векъ нашь вь просвещение лица твоего.
9. Яко вси дн(и)ье наши оскоудеша, и гневомь твоимъ скончахомся:
10. Лета наша яко паоучина пооучахоуся. дн(и)ье летъ наших, в них же
седмьдесятъ летъ, аще ли же в силахъ, осмьдесятъ лет, и множае ихъ
троуд и болезнь: яко наиде кротость на ны, и накажемся.
11. Кто свесть державоу гнева твоего; и от страха твоего ярость твою исчести;
12. Десницю твою тако скажи ми, и окованныя с(е)рдц(е)мь въ м(у)др(о)сти.
13. Обрати г(оспод)и, доколе; и оумоленъ боуди на рабы твоя.
14. Исполнихомся заоутра м(и)л(о)сти твоя г(оспод)и, и вьзрадовахомся и
вьзвеселихомся:
15. Во вся д(ь)ни наша вьзвеселихомся, за д(ь)ни, в няже смирил ны еси,
и лета в няже видехомъ злая.
16. И призри на рабы твоя, и на дела твоя, и настави с(ы)ны ихъ.
17. И боуди светлость г(оспод)а б(ог)а нашег(о) на нас, и дела роукъ наших
исправи, и дело роукъ наших исправи.

ПСАЛОМ 90
Хвала песни д(а)в(и)д(о)вы.

1. Живыи в помощи вышняго, вь крове б(ог)а н(е)б(ес)н(а)го водворится.
2. Речеть г(осподе)ви: застоупникъ мои еси и прибежище мое, б(ог)ъ
мои, оуповаю нань.
3. Яко то избавитъ мя от сети ловча, и от словесе мятежьна.
4. Плещима своима осенить тя, и подъ криле его надеешися:
ороужьемь обыдет тя истина его.
5. Не оубоишися от страха нощнаго, от стрелы летящея во д(ь)нь,
6. От вещи во тме преходящая, от сряща и беса полоуденьнаго.
7. Падеть от страны твоея тысяща, и тьма одесноую тобе,
к тобе же не приближится:
8. Обаче очима своима смотриши, и вьзданье грешникомь оузриши.
9. Яко ты г(оспод)и оупованье мое: вышняго положилъ еси прибежище твое.
10. Не придеть к тобе зло, и рана не пристоупить к телеси твоемоу.
11. Яко ангеломь своимь заповесть о тобе, схранити тя во всехъ поутех твоихъ.
12. На роукахъ возмоуть тя, да не когда притъкнеши о камень ногоу твою.
13. На аспида и василиска настоупиши, и попреши льва и змия.
14. Яко на мя оупова, и избавлю и: покрыю и: яко позна имя мое.
15. Взоветь ко мне, и оуслышю и: с нимь есмь вь скорби, измоу и, прославлю и:
16. Долготоу дн(и)и исполню и, явлю емоу сп(асе)нье мое.

СЛАВА :

 

К А Ф И З М А Т Р И Н А Д Ц А Т А Я

ПСАЛОМ 91
1. Песни в [день] соуботныи.

2. Бл(а)го есть исповедатися г(осподе)ви, и пети имени твоемоу, вышне:
3. Вьзвещати заоутра м(и)л(ос)ть твою, и истиноу твою на всякоу нощь,
4. В десятостроуннем п(са)лт(ы)ри, сь песнью въ гоуслех.
5. Яко вьзвеселилъ мя еси г(оспод)и вь твари твоеи,
и в делех роукоу твоею вьзрадоуюся.
6. Яко вьзвеличишася дела твоя г(оспод)и, зело оуглоубишася помышления твоя.
7. Моужь безоуменъ не познаеть, и неразоумивъ не разоумееть сих.
8. Егда прозябноуша грешници яко трава, и проникоша
вси творящеи безаконие, яко да потребятся в векы века.
9. Ты же вышнии в векы г(оспод)и.
10. Яко се врази твои г(оспод)и, яко се врази твои погибноуть,
и разидоутся вси делающеи безаконие.
11. И вьзнесется яко инорога рогъ мои, и старость моя вь елеи мастите.
12. И вьзре око мое на врагы моя,
и на вьстающая на мя лоукавноующая оуслышить оухо мое.
13. Праведникъ яко финиксъ процвететь, яко кедръ, иже в ливане, оумножится.
14. Насажени в домоу г(оспод)ни, вь дворехъ домоу б(ог)а нашего процветоуть:
15. Еще оумножатся вь старости мастите, и бл(а)гоприемлюще боудоуть.
16. Да вьзвестять, яко правъ г(оспод)ь б(ог)ъ нашь, и нес(ть) неправды в немь.

ПСАЛОМ 92
Хвала пении д(а)в(и)д(у).

1. Г(оспод)ь воц(а)рися, в лепотоуся облече, облечеся г(оспод)ь
в силоу и препоясася: ибо оутверди вселеноую, яже не подвижится.
2. Готовъ пр(ес)т(о)лъ твои оттоле: от века ты еси.
3. Вьздвигоша рекы г(оспод)и, вьздвигоша рекы гласы своя.
4. Возмоуть рекы строугы своя, от гласа вод мног.
дивны высоты морьскыя: дивенъ вь высокыхъ г(оспод)ь.
5. Сведенья твоя оуверишася зело, домоу твоемоу подобаеть
с(вя)т(ы)ни г(оспод)и в долготоу дн(и)и.

ПСАЛОМ 93
Д(а)в(и)д(о)в.

1. Б(ог)ъ мьстии г(оспод)ь, б(ог)ъ мьстии не обиноулся есть.
2. Вьзнесися соудяи земли, вьздаи же вьздаяние гордым.
3. Доколе грешници г(оспод)и, доколе грешници вьсхвалятся;
4. Провещають и вьзг(глаго)лють неправдоу,
вьзг(лаго)лють вси делающеи беззаконие;
5. Люд(и) твоя г(оспод)и смириша, и достоянье твое озлобиша.

 


6. Вдовицю и сира оумориша и пришелца оубиша.
7. И реш(а): не оузрит г(оспод)ь, ниж(е) разоумееть б(ог)ъ ияковль.
8. Разоумеите ныне безоумнии в людех, и боуи некогда оумоудритеся.
9. Всажеи оухо, не слышит ли; ли создавы око, не смотряет ли;
10. Наказая языкы, не обличит ли, оучаи ч(е)л(о)в(е)ка разоумоу;
11. Г(оспод)ь свесть помышленья ч(е)л(о)в(е)ч(е)ская, яко соут(ь) соуетна.
12. Бл(а)ж(е)нъ ч(е)л(о)в(е)къ, егоже аще накажеши г(оспод)и,
закона твоего наоучиши и:
13. Да оукротиши его от днии лютъ, дондеже изрыется грешномоу яма.
14. Яко не отринеть г(оспод)ь люди своихъ, и достоянья своего не оставить:
15. Дондеже правда обратится на соуд, и близь ея вси правии с(е)рдц(е)мь.
16. Кто станеть мне на лоукавноующая;
или кто со мною станеть на делающая безаконие;
17. Яко аще не бы г(оспод)ь помоглъ мне, вмале вселилася бы въ адъ д(у)ша моя.
18. Аще г(лаго)л(а)хъ: подвижася нога моя,
и м(и)л(ос)ть твоя г(оспод)и помагаше мне:
19. По оумноженью болезнии моихъ въ с(е)рдци моемь,
оутешения твоя вьзвеселиша д(у)шю мою.
20. Да не пребоудеть тобе пр(ес)т(о)лъ безакония, сзидаяи троуд на повеление.
21. Оуловять на д(у)шю праведничю, и кровь неповинноу осоудять.
22. И быс(ть) мне г(оспод)ь вь прибежище,
и б(ог)ъ мои в помощь оупованию моемоу.
23. И вьздасть имъ г(оспод)ь по безаконию ихъ,
и по лоукавьствию ихъ погоубить я г(оспод)ь б(ог)ъ.

СЛАВА :

ПСАЛОМ 94
Хвала пения.

1. Придете вьзрадоуемся г(осподе)ви, въскликнемь б(ог)оу сп(аси)т(е)лю нашемоу:
2. Предваримъ лице его во исповедани, и въ пс(а)лмехъ вьскликнемь емоу.
3. Яко б(ог)ъ велеи г(оспод)ь, и ц(а)рь вел(е)и по всеи земли.
4. Яко в роуце его конци земля, высоты горъ того соуть.
5. Яко того есть море, и тъ створи е, и соушю роуце его создасте.
6. Приидете поклонимся и припадемъ емоу,
и вьсплачемся пред г(осподе)мь створшиим нас.
7. Яко то есть б(ог)ъ нашь, и мы люд(и)е паствины его, и овца роукы его.
дньс(ь) аще гласа его оуслышите,
8. Не ожестите с(е)рд(е)ць ваших яко в прогневании,
по д(ь)ни искоушения в поустыни:
9. Идеже искоусиша мя о(т)ци ваши, искоусиша мя, и видеша дела моя.
10. Четыредесять леть негодовах рода того, и рехъ:
присно блоудять с(е)рдц(е)мь, ти же не познаша поутии моихъ.
11. Яко кляхся в гневе моемь, аще внидоуть в покои мои.

 


ПСАЛОМ 95
Хвала пения д(а)в(и)д(о)ва.

1. Въспоите г(осподе)ви пес(нь) новоу, вспоите г(осподе)ви вся земля:
2. Вспоите г(осподе)ви, бл(аго)в(е)с(ти)те имя его:
бл(а)г(о)вестите д(е)нь от д(ь)ни сп(асе)нье его.
3. Вьзвестите вь языцех славоу его, во всехъ людехъ чюдеса его:
4. Яко велеи г(оспод)ь и хваленъ зело, страшенъ есть надъ всеми богы.
5. Яко вси бози языкъ бесове: г(оспод)ь же н(е)б(е)са створи.
6. Исповедание и красота пред нимь, с(вя)т(ы)ни и велелепота вь с(вя)т(и)ле его.
7. Принесете г(осподе)ви отечествия языкъ, принесете г(осподе)ви славоу и ч(е)сть.
8. Принесете г(осподе)ви славоу имени его:
возмете жертвы, и входите в дворы его.
9. Поклонитеся г(осподе)ви вь дворе с(вя)темь его:
да подвижится от лица его вся земля.
10. Рцете вь языцехъ, яко г(оспод)ь вьц(а)р(и)ся: ибо исправи вселеноую,
яже не подвижится: соудить людемь вь правость.
11. Да вьзвеселятся н(е)б(е)са, и радоуется земля:
да подвижится море и исполнение его.
12. Вьзрадоуются поля, и вся яже в них:
тогда вьзрадоуются вся древа доубравная.
13. От лица г(оспод)ня, яко грядет, яко приидеть соудити земли:
соудити вселенеи в правдоу, и людемъ истиною своею.

ПСАЛОМ 96
Д(а)в(и)д(о)въ.

1. Г(оспод)ь воц(а)рися, да радоуется земля, да веселятся острови мнози.
2. Облакъ и съмракъ окр(ес)тъ его, правда и соудба исправление пр(ес)т(о)ла его.
3. Огнь пред нимь преидеть, и попалит окр(ес)тъ врагы его.
4. Осветиша молния его вселеноую, виде, и подвижася земля.
5. Горы яко воскъ растаяшася от лица г(оспод)ня, от лица г(оспод)а всея земля.
6. Вьзвестиша н(е)б(е)са правдоу его: и видеша вси люд(и)е славоу его.
7. Да постыдятся вси кланяющеися истоуканнымъ, хвалящеися о идолехъ своихъ:
поклонитеся емоу вси анг(е)ли его.
8. Оуслыша и вьзвеселися сион, възрадовашася дщери июдеискыя,
соудебъ ради твоихъ г(оспод)и:
9. Яко ты г(оспод)ь вышнии по всеи земли,
зело превознесеся надо всеми богы.
10. Любящеи г(оспод)а, ненавидите зла: хранить г(оспод)ь д(у)шю
пр(е)п(о)д(о)бныхъ своих, изъ роукы грешнича избавит я.
11. Светъ восия праведникоу, и правымь с(е)рдц(е)мь веселье.
12. Вьзвеселитеся праведнии о г(оспод)и, и исповедаите память с(вя)т(ы)ня ег(о).

СЛАВА :

 

ПСАЛОМ 97
Д(а)в(и)д(о)въ.

1. Въспоите г(осподе)ви пес(нь) новоу, яко дивна створи г(оспод)ь:
сп(а)се его десница его, и мышца с(вя)тая его.
2. Сказа г(оспод)ь сп(асе)нье свое, пред языкы откры правдоу свою.
3. Помяноу м(и)л(о)сть свою ияковоу, и истиноу свою домоу изр(аи)л(е)воу:
видеша вси конци земля сп(а)сение б(ог)а нашего.
4. Вьскликнете б(ого)ви вся земля, вспоите, и радоуитеся и поите.
5. Поите г(осподе)ви в гоуслех, в гоуслехъ, и гл(а)се псаломьсте,
6. Вь троубахъ кованнах, гл(асо)мь троубы рожаны:
вьскликнете пред ц(а)р(е)мь г(осподе)мь.
7. Да подвижится море и исполнение его, вселенная, и вси живоущеи на неи.
8. Рекы всплещють роуками вкоупе, горы вьзрадоуются.
9. От лица г(оспод)ня, яко грядеть, яко приидет соудит(и) земли:
соудити вселенеи в правдоу, и люд(е)мъ правостью.

ПСАЛОМ 98
Д(а)в(и)д(ов).

1. Г(оспод)ь воц(а)рися, да гневаются люд(и)е:
седяи на хероувимех, да подвижится земля.
2. Г(оспод)ь в сионе велеи, и высокъ есть над всеми людми.
3. Да исповедятся имени твоемоу великомоу: яко страшно и с(вя)то есть.
4. И ч(е)сть ц(а)ря соуд любити: ты оуготова правины,
соуд и правдоу во иякове ты створи.
5. Вьзносите г(оспод)а б(ог)а нашего, и кланяитеся подножью ногоу его,
яко с(вя)тъ есть.
6. Моисеи и аронъ во иереихъ его, и самоилъ в призывающих имя его:
призовахоу г(оспод)а, и тъ оуслышаше ихъ.
7. В столпе облачьне гла(го)лаше к нимь: яко храняноу свидения его,
и повеления его, яже дас(ть) имъ.
8. Г(оспод)и б(ож)е наш, ты послушааше ихъ: б(ож)е,
ты милостивъ бывааше имъ, и мщая на всяка начинания их.
9. Възносите г(оспод)а б(ог)а нашего, и поклонитеся в горе с(вя)теи его:
яко с(вя)тъ г(оспод)ь б(ог)ъ нашь.

ПСАЛОМ 99
Д(а(в(и)д(о)въ, исповеданию.

1. Въскликнете б(ого)ви вся земьля:
2. Работаите г(осподе)ви въ веселии, внидете пред ним в радость.
2. Оуведите, яко г(оспод)ь то есть б(ог)ъ нашь: тои створи насъ, а не мы:
мы же люд(и)е его, и овца пажити его.
3. Внидете во врата его во исповедании, во дворы его въ пениих:
исповедаитеся емоу, хвалите имя его.
4. Яко бл(а)гъ г(оспод)ь, въ векы м(и)л(о)сть его.
и даж(е) до рода и рода истина его.

 

ПСАЛОМ 100
Д(а)в(и)д(ов).

1. М(и)л(о)сть и соуд вспою тобе г(оспод)и:
2. Пою и разоумею в поути непорочне, когда придеши ко мне;
прехожах в незлоби с(е)рдца моего, посреде домоу моего.
3. Не предлагахъ пред очима моима вещь законопрестоупноу:
творящая престоупленье възненавидехъ.
4. Не прилпе мне с(е)рдце лоукаво: оуклоняющагося от мене злаго не познах.
5. Оклеветающаго таи искреннего своего, сего изногях: гордымъ окомь,
и несытымъ с(е)рдц(е)мь, съ симь не ядяхъ.
6. Очи мои на верныя земли, посажати я с собою:
ходяи по поути непорочноу, сеи ми слоужааше.
7. Не живяше посреде домоу моего творяи гордыню:
г(лаго)ля неправедная, не исправляше пред очима моима.
8. На оутрия избивах вся грешныя земли,
потребити от града г(оспод)ня вся творящая безаконие.

СЛАВА :

К А Ф И З М А Ч Е Т Ы Р Н А Д Ц А Т А Я

ПСАЛОМ 101
1. М(о)л(и)тва нищаго, егда оуныеть, и пред б(о)гомь
прол(ь)ет молбоу свою.

2. Г(оспод)и, оуслыши м(о)л(и)твоу мою, и вопль мои к тобе да приидет.
3. Не отврати лица твоего от ме[не]: вонже д(е)нь тоужю, приклони ко мне
оухо твое: вонже д(е)нь призовоу тя, скоро оуслыши мя.
4. Яко исчезоша яко дымь дн(и)ье мои, и кости моя яко соушило сосхошася.
5. Оуязвленъ бых яко трава, и и[з]сше с(е)рдце мое, яко забых снести хлебъ мои.
6. От гла(са) вьздыханья моего прилпе кость моя плоти моеи.
7. Оуподобихся неясыти поустыннеи, быхъ яко нощны вранъ на нирищи.
8. Забдехъ, и бых яко птица особящаяся на зъде.
9. Весь д(е)нь поношахоу ми врази мои, и хвалящеи мя мною кленяхоуся.
10. Зане пепелъ яко хлебъ ядях, и питие мое с плачемь растворях,
11. От лица гнева твоего и ярости твоея: яко взнесъ низверже мя.
12. Дн(и)ье мои яко сень оуклонишася, и язъ яко сено и[з]схох.
13. Ты же г(оспод)и в векы пребываеши, и память твоя в род и род.
14. Ты въскр(е)съ оущедриши сиона: яко время оущедрити его, яко прииде время.
15. Яко бл(а)говолиша раби твои камение его, персть его оущедрять.
16. И оубоятся языци имени г(оспод)ня, и вси ц(а)рие земьстии славы твоея:
17. Яко сзижеть г(оспод)ь сиона, и явитс(я) вь славе своеи.
18. Призре на молитвоу смиреных, и не оуничижи моления ихъ.
19. Да пишются сие в род инъ, и люд(и)е зиж[д]емии вьсхвалять г(оспод)а:

 

20. Яко приниче с высоты с(вя)тыя своея, г(оспод)ь с н(е)б(е)се на землю призре,
21. Оуслышати вьздыхание окованых, разрешити с(ы)ны оумершвленых:
22. Вьзвестити в сионе имя г(оспод)не, и хвалоу его во иер(уса)л(и)ме.
23. Егда сбероутся люд(и)е вкоупе, и ц(а)рие работати г(осподе)ви.
24. Отвеща емоу на поути кре(по)сти своея: оумаление днии моих възвести мне.
25. Не възведи мене вь препловление днии моихъ: в роде родовъ лета твоя.
26. В начатцехъ ты г(оспод)и землю основа, и дела роукоу твоею соуть н(е)б(е)са.
27. Та погыбноуть, ты же пребываеши: и вся яко риза обетшають, и яко
одежю свиеши я, и изменятся.
28. Ты же тоже еси, и лета твоя не оскоудеют.
29. С(ы)н(о)ве рабъ твоихъ вселятся, и семя ихъ в векы исправитс(я).

ПСАЛОМ 102
Д(а)в(и)д(ов).

1. Б(лагос)л(о)ви д(у)ша моя г(оспод)а, и вся вноутренея моя имя с(вя)тое его:
2. Б(лагос)л(о)ви д(у)ше моя г(оспод)а, и не забываи всехъ въздании его:
3. Оцещающаго вся безакония твоя, и целяющаго вся недоугы твоя,
4. Избавляющаго от истления живот твои,
венчающаго тя м(и)л(ос)тью и щедротами,
5. Исполняющаго въ бл(а)г(и)хъ желанье твое: обновится яко орлоу оуность твоя.
6. Творяи м(и)л(ос)т(ы)ню г(оспод)ь, и соудбоу всемъ обидимым,
7. Сказа поути своя моисееви, с(ы)н(о)мъ изр(аи)л(е)вымъ хотенья своя.
8. Щедръ и м(и)л(ос)т(и)въ г(оспод)ь, долготерпеливъ и многом(и)л(ос)т(и)въ.
9. Не до конца прогневается, ни в векы враждоуеть:
10. Ни по безаконьемъ нашимъ створилъ есть намъ,
ни по грехомъ нашимъ въздалъ есть намъ.
11. Яко по высоте н(е)б(ес)неи от земля,
оутвердилъ есть г(оспод)ь м(и)л(ос)ть свою на боящихся его:
12. Елико отстоять в[о]стоци от запада, оудалилъ есть от нас безакония наша.
13. Якоже щедрить о(те)ць с(ы)ны, оущедрить г(оспод)ь боящаяся его.
14. Яко то позна созданье наше, помяноу, яко персть есмы.
15. Человекъ, яко трава дн(и)ье его, яко цветъ селныи тако оцве[те]ть:
16. Яко д(у)хъ проидет в немъ, и не боудеть, и не познаеть ктомоу места своего.
17. М(и)л(о)сть же г(оспод)ня от века и до века на боящихся его:
18. И правда его на с(ы)нохъ с(ы)н(о)въ, хранящих заветь его,
и помнящих заповеди его творити я.
19. Г(оспод)ь на н(е)б(е)си оуготова пр(ес)т(о)лъ свои,
и ц(а)р(с)тво его всеми обладаеть.
20. Б(лагос)л(о)в(и)те г(оспод)а вси анг(е)ли его, силнии крепостью,
творящеи слово его, оуслышати гла(с) словесъ его.
21. Б(лагос)л(о)в(и)те г(оспод)а вся силы его, слоугы его, творящеи волю его.
22. Б(лагос)л(о)в(и)те г(оспод)а вся дела его на всякомъ месте вл(а)д(ы)ч(ес)твия его:
б(лагос)л(о)ви д(у)ша моя г(оспод)а.





Дата добавления: 2014-11-25; Просмотров: 249; Нарушение авторских прав?


Нам важно ваше мнение! Был ли полезен опубликованный материал? Да | Нет



ПОИСК ПО САЙТУ:


Рекомендуемые страницы:

studopedia.su - Студопедия (2013 - 2020) год. Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав! Последнее добавление
Генерация страницы за: 0.011 сек.