II. Умштн

I. ТОДЛТН

(Портреты героев):

Деликов Э. Санджиров Н.

Хальмгин үрдүд яһҗ дәәллдв?

1941 – 1945 җилмүдт Төрскән харсгч Алдр дән болв. Немшин деермчнр Әрәсәһүр дәврв. Цуг әмтн хортна өмнәс босв. Хальмг улс хортнас төрскән харсв. Эн дәәңд олн зөрмг баатрмуд алдр нерән туурулв.

Теднә негнь – Делгә Эрднь. 1941 җил бар сард Делгә Эрднь цергт мордв. Тең һол деер зөрмг йовдларн нер һарв. 1942 җил така сарин 26 өдр, әрә гиҗ 20 настадан, әмнәсн хаһцв. Өңгрснәннь хөөн 1943 җил Делгә Эрдньд Советск Союзин Герой нер зүүлһсмн.

1942 җилин зунар хальмг тег өшәтнә һарт орсмн. Эн цагла партизанск отрядмуд бүрдв. Баатр хальмг партизанмуд Адучин Бадм, Молокан Һәрә, Хахлынә Тамара, Юрий Клыков, Володя Косиев, Илья Гермашев нань чигн теегин үрдүд. Балһсдын болн селәдин уульнцс эднә нерд зүүнә.

Мини үй ах Цаһан Нуурин школд сурна. Эн школ зөрмг баатр Николай Мартынович Санджировин нер зүүнә. Алдр Төрскнә дәәнд Санджиров экнәснь авн сүл күртлнь гилтә орлцв. Днепр һол һатллһнд ах лейтенант Санджиров өөрән хойр салдста, хортна пулемётин халһн күчтә болв чигн, берк чинртә даалһвр күцәв. Днеприн барун эргиг эзлхд, энүнә һурвн оңһц 408 дәкҗ цергчнриг, зер-зевиг һол һатлһҗ зөөв. Немшин деермчнрлә кесн ноолданд зөргтә, баатр керг күцәснднь үр Санджиров правительствин ах ачллһ – Советск Союзин Герой нер зүүв.

Төрскналдр зөрмг үрдүдән мартсн уга. Элстд дәәнә баатрмудт нерәдсн Мөңк һал бәәнә. Энүнә өөр баатрмудын бумб зогсчана. Балһснд баатрмудын аллей бәәнә. Чолун эрс деер Хальмгин зөрмг үрдүдин зургуд бәәнә. Эднә кесгнь мана сәәхн иргчин төлә әмән өгсмн. Эднә алдр нерд кезә чигн мартгдшго.

III. УРН АМН-ҮГИН ЗӨӨРӘС

Үлгүр умштн, чинринь цәәлһтн:

Заһсн үкхлә, ясн үлддг,

Залу үкхлә, нерн үлддг.

Дата добавления: 2014-11-06