Фрагмент о гостиницах 3 страница

- арнаулы жедел-іздестіру әрекеттері олар көбінесе жеке және заңды тұлғалардың конституциялық құқықтары мен мүдделерін қозғайтын болғандықтан, түрлері, көлемі және субъектілері бойынша шектеліп отырып жүзеге асырылады. Атап айтсақ:

- жедел-іздестіру қызметін жүзеге асырушы органдардың барлығы арнаулы жедел-іздестіру әрекеттерін толық көлемде жүзеге асырмайды:

а) ішкі істер, Әділет министрлігінің қылмыстық-атқару жүйесі және қаржы полициясы – сотталғандардың хат-хабарларын цензуралау; посылка және бандероль түрінде пошта жөнелтілімдеріне бақылау жасау; бейне-, аудиотехниканы немесе өзге де арнаулы техникалық құралдарды пайдалана отырып, сөздерді жасырын тыңдау және жазып алу, телефондар және басқа да сөйлесу құрылғылары арқылы жүргізілетін сөлесулерді тыңдау және жазып алу, сондай-ақ телефон арқылы жүргізілетін сөйлесулер туралы мәліметтер алу; компьютер жүйелерінен және өзге техникалық құралдардан хабарламалар алып тастау; байқау, соның ішінде арнаулы техникалық құралдарды (дыбыс-, бейнежазбаларды, кино-, суреттүсірілімдерін және басқа техникалық құралдарды), жеке адамның өміріне, денсаулығына және айналадағы ортаға зиянын тигізбейтін заттарды және материалдарды пайдалана отырып байқау; тұрғын және басқа жайларға, үйлерге, ғимараттарға, жер учаскелеріне, көлік және өзге техникалық құралдарға кіру және оларды тексеру;

б) ұлттық қауіпсіздік органдары - пошта жөнелтілімдерін бақылау; байланыс желілеріндегі жедел іздеу; бейне-, аудиотехниканы немесе өзге де арнаулы техникалық құралдарды пайдалана отырып, сөздерді жасырын тыңдау және жазып алу, телефондар және басқа да сөйлесу құрылғылары арқылы жүргізілетін сөлесулерді тыңдау және жазып алу, сондай-ақ телефон арқылы жүргізілетін сөйлесулер туралы мәліметтер алу; байланыстың техникалық арналарынан, компьютер жүйелерінен және өзге техникалық құралдардан хабарламалар алып тастау; байқау, соның ішінде арнаулы техникалық құралдарды (дыбыс-, бейнежазбаларды, кино-, суреттүсірілімдерін және басқа техникалық құралдарды), жеке адамның өміріне, денсаулығына және айналадағы ортаға зиянын тигізбейтін заттарды және материалдарды пайдалана отырып байқау; тұрғын және басқа жайларға, үйлерге, ғимараттарға, жер учаскелеріне, көлік және өзге техникалық құралдарға кіру және оларды тексеру;

в) жедел қаматамасыз ету объектілерінде Қазақстан Республикасы Қорғаныс министрлігінің әскери барлауы мен Президентінің Күзет қызметі - байқау, соның ішінде арнаулы техникалық құралдарды (дыбыс-, бейнежазбаларды, кино-, суреттүсірілімдерін және басқа техникалық құралдарды), жеке адамның өміріне, денсаулығына және айналадағы ортаға зиянын тигізбейтін заттарды және материалдарды пайдалана отырып байқау; тұрғын және басқа жайларға, үйлерге, ғимараттарға, жер учаскелеріне, көлік және өзге техникалық құралдарға кіру және оларды тексеру жедел-іздестіру әрекеттерін жүргізеді; бейне-, аудиотехниканы немесе өзге де арнаулы техникалық құралдарды пайдалана отырып, сөздерді жасырын тыңдау және жазып алу, телефондар және басқа да сөйлесу құрылғылары арқылы жүргізілетін сөлесулерді тыңдау және жазып алу, сондай-ақ телефон арқылы жүргізілетін сөйлесулер туралы мәліметтер алу; байланыстың техникалық арналарынан, компьютер жүйелерінен және өзге техникалық құралдардан хабарламалар алып тастау ісін жүзеге асырады.

Қазақстан Республикасының ішкі істер, Әділет министрлігінің қылмыстық-атқару жүйесі, Ұлттық қауіпсіздік органдары, Қорғаныс министрлігінің әскери барлау, қаржы полициясы мен Қазақстан Республикасы Президентінің Күзет қызметі қажет болған жағдайда арнаулы жедел-іздестіру әрекеттерін ұйымдастыру мен жүргізуде өзара жәрдемдесуге міндетті.

Жедел-іздестіру қызметін жүзеге асырушы органдардың міндеттерді шешу мүддесіне орай телекоммуникациялар желілері мен байланыстың пошта арналарын пайдалануына орай арнаулы жедел-іздестіру әрекеттерін техникалық жағынан Қазақстан Республикасының Ұлттық қауіпсіздік органдары жүзеге асырады, бұл үшін оларға қажетті күштер мен қаржы бөлінеді.

Заңмен қорғалатын жеке өмірге тиіспеушілік, хат жазысу, телефонмен сөйлесу, телеграф хабарлары мен пошта жөнелтілімдері құпиясын, сондай-ақ тұрғын үйді қол сұғудан қорғау құқығын қозғайтын арнайы жедел-іздестіру әрекеттері тек ауыр және аса ауыр қылмыстарды, сондай-ақ қылмысты топтар әзірлеп жатқан және жасаған қылмыстарды анықтау, алдын алу және ашу үшін прокурордың рұқсатымен ғана жүзеге асырылады. Мұндай әрекеттерді жүргезуге рұқсатты жедел-іздестіру қызметін жүргізуші органдардың қаулысы бойынша Қазақстан Республикасының Бас Прокуроры, оның орынбасарлары, республикалық әскери прокуроры, облыстардың прокурорлары мен оларға теңестірілген прокурорлар береді. Бұл жедел-іздестіру әрекеттерін жүргізуге рұқсат алу кезінде прокурорға жедел-іздестіру қызметін жүзеге асырушы органдармен құпия негізде қызмет жасаушы немесе қызмет жасаған азаматтардың жеке басы туралы мағлұматтар құпиясын ашуға мүмкіндік бермейтін нысанда және мазмұнда оларды жүргізуге негіздеме материалдар тапсырылады.

Жоғарыда аталған арнаулы жедел-іздестіру әрекеттерін жүзеге асырудың ерекше жағдайлары көзделген:

а) Бас Прокурормен келісілген тәртіпте;

б) жедел-іздестіру әрекеттерін жүргізгеннен кейін 24 сағат ішінде міндетті түрде прокурорды хабардар ете отырып;

в) прокурорды хабардар ете отырып және оларды жүзеге асырғаннан соң 24 сағат ішінде рұқсат алумен.

Қазақстан Республикасының қауіпсіздігін қамтамасыз ету, шет мемлекеттер мен шетел ұйымдарының арнаулы қызметтерінің, сондай-ақ терроризмнің барлау-бүлдіру мақсатында қол сұғушылықтарын анықтау, алдын алу және болдырмау мақсатында тек қана барлау хабарламасын алу үшін заңмен қорғалатын жеке өмірге тиіспеушілік, хат жазысу, телефонмен сөйлесу, телеграф хабарлары мен пошта жөнелтілімдері құпиясын, сондай-ақ тұрғын үйді қол сұғудан қорғау құқығын қозғайтын арнайы жедел-іздестіру әрекеттері Қазақстан Республикасының Бас Прокурорымен келісілген тәртіппен жүзеге асыруы мүмкін.

Жекелеген адамдардың өміріне, денсаулығына, меншігіне қауіп төнген жағдайда олардың өтініші немесе жазбаша келісімі бойынша жедел-іздестіру қызметін жүргізуші орган басшысы бекіткен қаулы негізінде, 24 сағаттың ішінде міндетті түрде прокурорды хабардар ете отырып, олардың телефондарынан немесе басқа да сөйлесу құрылғыларынан жүргізілгенсөйлесулерді тыңдауға және жазып алуға рұқсат етіледі.

Кейінге қалдыруға болмайтын және террористік әрекет бүлдіру және басқа да ауыр қылмыстар жасауға әкеліп соғуы мүмкін жағдайларда жедел-іздестіру қызметін жүргізуші тиісті орган басшылары бірінің дәлелді қаулысы негізінде прокурорды хабардар ету және соңынан 24 сағат ішінде рұқсат алу арқылы заңмен қорғалатын жеке өмірге тиіспеушілік, хат жазысу, телефонмен сөйлесу, телеграф хабарлары мен пошта жөнелтілімдері құпиясын, сондай-ақ тұрғын үйді қол сұғудан қорғау құқығын қозғайтын арнайы жедел-іздестіру әрекеттерін жүргізуге жол беріледі.

Заң шығарушы өзге шарттарды қарастырмайды, сондықтан келтірілген шарттар тізімі түпкілікті болып келеді.

Жасырын жедел-іздестіру әрекеттерін ұйымдастыру және оларды жүргізу тактикасы 1995 жылғы 15 наурыздағы «Мемлекеттік құпиялар туралы» Қазақстан Республикасының Заңы негізінде Қазақсатн Республикасының Үкіметі бекітетін құпияландыруға жататын мағлұматтар тізбесіне сәйкес қызметтік, әскери және мемлекеттік құпияны құрауы мүмкін. Мемлекеттік құпия дегеніміз тиімді әскери, экономикалық, ғылыми-техникалық, сыртқы экономикалық, сыртқы саяси, барлау, қарсы барлау, жедел-іздестіру және өзге қызметті жүзеге асыру мақсатында таратылуы мемлекетпен шектелген, мемлекеттік және қызметтік құпияны құрайтын, жалпы танылған халықаралық құқық нормаларына қайшы келмейтін мемлекетпен қорғалатын мәліметтер (1999 жылғы 15 наурыздағы №349-I «Мемлекеттік құпиялар туралы» Қазақстан Республикасының Заңының 1 бабы).

Тексерудің үш түрі бар: жария, жасырын және шифрланған.

Жария тексеру қаралып жатқан объектінің иесінің келісімі, оның қатысуымен, куәгерлерді тартпай-ақ жүргізілуі мүмкін. Бұл жағдайда иесінің ғимараттың құрылыс жоспары талап етілуі, тиісті өлшеулер жүргізілуі, схемалар, сызбалар құрастырылуы, фото-, бейнетүсірілімдер жүргізілуі мүмкін. Жария тексеру кезінде заттарды, құжаттарды иесінің келісімімен алуға, қатысушы адамдардан уәкілді қызметкердің назар аударған объектілердің табиғаты туралы тиісті түсініктемелер алуға, соның ішінде жазбашаға да жол беріледі.

Шифрланған тексеруде уәкілді қызметкер, әдеттегідей, не болмаса қараудың шынайы мақсатын, не болмаса жедел бөлімшеге қатыстылығын жасырады. Шифрлау тәсілдері әр түрлі болуы мүмкін (пәтер иелері кооперативінің өкілінен бастап қайырымдылық ұйымның өкіліне дейін).тексерудің осы түрі кезінде жағдайды бейнелеуге мүмкіндік беретін жасырын алып жүрілетін техникалық құралдардың мүмкіншіліктері пайдаланылады.

Шифрланып қараудың мақсаты тұрғын-жайда іздеудегі адамдардың тұрып жатқандығы, ұрланған заттардың бар екендігі және т.б. туралы хабарламаларды тексеру болуы мүмкін.

Жасырын тексеру ерекше процедураны талап етеді, себебі ол азаматтардың тұрғын үйге қол сұғылмаушылық конституциялық құқығын шектеумен байланысты. Бұл тексеру түрі прокурордың санкциясының негізінде жүргізіледі.

Тұрғын-жайды жасырын тексеруді жүргізу туралы жедел-іздестіру қызметін жүзеге асырушы органдардың жедел бөлімшесінің басшысымен бекітілген қаулы шығарылады.

Жасырын тексеруді жедел-іздестіру қызметін жүзеге асырушы органдардың арнаулы жедел-техникалық бөлімшелері сұрау салу бастамашысының қатысуымен жүзеге асырады. Объектілерді жасырын қарау кезінде табылған заттарды алу немесе ауыстыру ерекше жағдайларда және тек осы әрекетті жүргізу туралы қаулыны бекітетін басшының рұқсатымен жүргізіледі.

Жасырын тексеру кезінде қоршаған орта бұзылмайды және тиісінше ол фиксацияланады (жоспар-схемалар жасалады, фототүсірілімдер, бейнетүсірілімдер жүргізіледі, құжаттар көшірмесі түсіріледі). Қажет болғанда іздердің жасалуы үшін жағдайлар жасалады (химиялық тұзақтар, микробөлшектерді тарататын немесе әсер ету аймағында адамның пайда болуына әсер ететін субъектілер қойылады, т.б.).

Тексерудің кез-келген түріне тиісті іздерді іздеу, қоршаған ортаны фиксациялау, химиялық тұзақтарды, аудио-, бейне бақылау техникалық құралдарын орнату және т.б. дағдыларына ие маманды шақырған дұрыс.

Пошта жөнелтілімдерін бақылау. Пошта жөнелтілімдерін бақылау – прокурор санкциясы негізінде жүзеге асырылатын және пошта, телеграф, телефакс, телефонограмма хабарларын жедел-іздестіру қызметінің міндеттерін шешу үшін маңызы бар ақпаратты алу мақсатында хабарламаларды жөнелту және қабылдау мекемесінде (кәсіпорнында) жасырын алу және зерттеуден тұратын жедел-іздестіру әрекеті.

Бұл жедел-іздестіру әрекеті азаматтардың хат жазысу, пошта, телеграф және өзге хабарламалар құпиясына конституциялық құқығының аясына араласатын болғандықтан, оны жүргізу тек прокурор санкциясы, жедел-іздестіру қызметін жүзеге асырушы органның бастығының дәлелді қаулысы негізінде жүзеге асырылады.

Бақылауға нақты бір адамға да, одан шығатын да пошта хабарламалары жатады. Қажет болған жағдайда нақты мекен-жайға келген одан шығатын хабарламаларда бақылауға жатады.

Пошта жөнелтілімдерін бақылау бір жолғы сипатта және созылмалы сипатта болуы мүмкін.

Бір жолғы бақылауға келісім қызметкермен дереу қарауды және зерттеуді талап ететін хабарламаның пошта бойынша жіберілгені туралы ақпарат алынғанда рәсімделеді.

Пошта хабарламаларын созылмалы бақылау жедел-іздестіру қызметін жүзеге асырушы органдардың жедел-техникалық бөлімшелерінің қызметкерлерімен жүзеге асырылады.

Осы жедел-іздестіру әрекетін жүргізу кезінде жедел уәкілді міндетті:

- бақылау фактісінің құпияда сақталуын қамтамасыз етуге;

- пошта жөнелтілімінің сақталуын қамтамасыз етуге;

- пошта жөнелтіліміндегі мәліметтерді құпияда сақтауға.

Телефонмен және өзге сөйлесулерді тыңдау. Телефонмен және өзге сөйлесулерді тыңдау – прокурор санкциясы негізінде арнаулы техникалық құралдарды пайдалану арқылы жүзеге асырылатын, сондай-ақ есту бақылауынан жеке адамдардың (тексерілуші) байланыстың телефон желілерімен жүргізіліп жатқан сөйлесулерін жазып алудан тұратын жедел-іздестіру әрекеті.

Телефон сөйлесулерін тыңдау, әдетте, ҚР ІІМ-нің немесе ҚР ҰҚК-нің жедел-техникалық бөлімшелерінің арнаулы аппараттарының көмегімен жүргізіледі.

Бұл әрекетті прокурордың санкциясынсыз жүзеге асыруға жол беріледі, егер адамның өз өміріне, денсаулығына немесе меншікке қауіп төну кезінде арызы немесе келісімі болса. Бірақ бұл жағдайды ҚР ІІМ-нің немесе ҚР ҰҚК-нің тиісті басшысымен дәлелді қаулы шығару міндетті және қолданылған іс-әрекеттер туралы 24 сағат ішінде прокурорға хабарланады.

Телефон сөйлесулерін тыңдау тек сезік келтірілген адамдардың байланыс желілерін ғана пайдалану кезінде ғана емес, сонымен бірге радиотелефон арналарын, сондай-ақ ұялы, космостық байланыс арналарын пайдаланғанда да мүмкін. Екі абоненттің сөйлесулеріндегі де, автожауапбергіштегі де хабарламаларды беру де тыңдалуы мүмкін.

Телефон сөйлесулерін тыңдау қажеттігі туындайтын келесідей жағдайларды атап көрсетуге болады:

қылмысты топ мүшелері – қатысушылар арасында сөйлесу болуы мүмкін болғанда;

сезікті өз құрбанына қылмыс алдында немесе оны жасағаннан кейін телефон соққанда;

іздестіруші тұлға өз туысқандарымен, таныстарымен, қылмысқа қатысушылармен байланысқа шыққанда.

Жедел-іздестіру әрекеттерін жүргізу нәтижелері қылмыстық іс жүргізудегі тергеу іс-әрекеттері сияқты тиісті құжаттармен құжаттандырылады. Олар жедел-іздестіру әрекеттерінің жария немесе жасырын жүргізілуіне байланысты анықтама, рапорт акті және өзге құжаттар түрінде рәсімделуі мүмкін. Олардың нысаны мен түрлері жедел-іздестіру қызметін жүзеге асырушы органдардың ведомстволық нормативтік-құқықтық актілерімен белгіленеді.

Бұл құжаттарда бейнеленетін ақпарат қылмыстық іс жүргізуде дәлелдемелер ретінде пайдаланылуы мүмкін.

Құжаттандыру дегеніміз – жедел есепке алу ісі бойынша жүзеге асырылатын мәліметтерді жинау және жүйелеу, жедел-іздестіру қызметінің нәтижелерін тексеру және бағалау процесі, сондай-ақ олардың негізінде жедел-іздестіру қызметін жүзеге асырушы органдардың тиісті шешімдерін қабылдауы.

Азаматтарға, лауазымды адамдарға сауал-сұрақ қою, олардан хабарламалар алуды жүргізу нәтижелері жедел уәкілдінің анықтамасымен немесе рапортымен рәсімделеді, кейде сауал-сұрақ қойылушының келісімімен – түсініктемемен, арызбен, өз кінәсін мойындап келу хаттамасымен рәсімделеді.

Азаматтарға, лауазымды адамдарға сауал-сұрақ қою нәтижелері түсініктеме, арыз, өз кінәсін мойындап келу хаттамасы түрінде толтырылған құжат қылмыстық іс материалдарына қоса тіркелуі мүмкін және сауал-сұрақ қойылғаннан қылмыстық іс бойынша куә ретінде жауап алынады. Нәтижелері анықтама (рапорт) түрінде рәсімделген құжаттағы мәліметтер тергеуші немесе жедел уәкілді тергеу немесе ЖЕАІ бойынша өндірісті жоспарлау кезінде болжаулар ұсыну кезінде бағыттаушы ақпарат ретінде қолданылады.

Мекемелердің, кәсіпорындардың және ұйымдардың (олардың бағыныстылығына және меншік нысандарына қарамастан) есептері бойынша анықтамалар мен тексерулер жүргізу нәтижелері рапортпен не болмаса анықтамамен рәсімделеді. Анықтама ретінде рәсімделгенде, егер құжат мемлекеттік органдардан, мекемелерден келіп түскен ресми жауап түрінде болса, онда ол қылмыстық іске анықтамасымен бірге қоса тіркелуі мүмкін. Егер анықтама нәтижелері рапортпен рәсімделсе, онда ол тек бағыттаушы маңызға ие болады.

Зерттеу үшін үлгілер мен сынамаларды іріктеп алу нәтижелері зерттеу үшін үлгілер мен сынамалар алу актісімен, дактилоскопиялық картамен немесе үлгілер мен сынамаларды іріктеп алуды жүзеге асырушы адамдар толтырған өзге құжаттармен, жедел-іздестіру қызметін жүзеге асырушы органдардың қызметкерлерінің рапортымен немесе анықтамамен рәсімделеді. Мұндай қызметтік құжатта үлгі мен сынама ретінде алынғанның сапасындағы саны (оны сипаттаумен), үлгілер мен сынамалар алу жүзеге асырылған жағдай, қолданылған техникалық құралдар және олардың сипаттамалары, буып-түйілген материал түрі. Акт үш данадан жасалады. Біріншісі мен үшіншісі жедел уәкілдіде қалады, ал екіншісі үлгілер мен сынамалардың иесіне немесе оның өкіліне қолын қойғызып отырып беріледі. Үлгілермен, сынамалармен бірге актінің бірінші данасы салыстырмалы зерттеу үшін жіберіледі, ал үшінші данасы алдын ала немесе кейінгі жедел тексеру материалдарына тіркеледі. Жедел уәкілді рапортына құжаттар, заттар, дыбыс-, бейнежазба және ақпараттың өзге техникалық құралдары қоса тіркеледі.

Бақылау үшін сатып алу нәтижелері бойынша бақылаушы органдардың ведомстволық нормативтік актілермен белгіленген талаптарды сақтай отырып акт түріндегі құжат толтырылады. Егер қаулы шығармай тұрып жүзеге асырылған бақылау үшін сатып алу объектісі заңмен айналымына тыйым салынған немесе шектелген заттар болса, онда жедел-іздестіру әрекеттерінің нәтижелері заңды бұза отырып жүргізілген болып есептеліп, оның нәтижелері дәлелдемелік маңызға ие болмайды. Бұл мәселені шешу бақылау үшін сатып алудың сипатына байланысты – жария немесе жасырын сипатта болуы. Жария болған жағдайда жедел-іздестіру әрекеттерін жүргізу әрекеттерін жүргізуге бақылау үшін сатып алуды бақылаушы және оның нәтижелерін өз қолдарымен куәландыратын қоғам өкілдері тартылады, ал актінің өзі жарияланады.

Жедел уәкілділермен немесе олардың тапсырмасымен әрекет етуші, қылмыстық іс үшін маңызы бар мән-жайлар мен фактілерді куәландырған қоғам өкілдерімен толтырылған мемлекеттік сауда инспекторының бақылау үшін сатып алу актіс, бухгалтерия қызметкері толтырған тауар-материалдық құндылықтардың жетіспеу актісі сияқты құжат болып табылады.

Бір жағдайларда сатып алу жүргізілгеннен кейін жедел уәкілді қоғам өкілдерінің, сатушының қатысуымен акт толтырады. Өзге жағдайларды – тауарларды қате есептеу, артық-кемітіп өлшеу және сауда сататын орыннан тыс жүйелі түрде жүзеге асырылған жағдайда, сатып алу олардың нәтижелерін жарияламай-ақ жүргізіледі. Толтырылған актілермен сатып алуды жүзеге асырған сауда-саттық қызметкерін таныстырмайды.

Жария тексеру сатып алу актілерін дәлелдеме-құжат деп оларды жинауды және ұсынуды реттеуші заң талаптарын сақтаған кезде қылмыстық іске қоса тіркелген жағдайда пайдалануға болады.

Сатып алу актісін жариялау, оның нәтижелерін іс-әрекеттері байланысты акт толтырылған адамдардың куәландыруы, құжатты бағалауға және тексеру жүргізумен байланысты міндетті тергеушінің шешуін жеңілдетеді.

Актіде іс-әрекеттер аяқталғаннан кейін тез арада оларды фиксациялау және оны жариялау оқиғаны, оның мән-жайларын нақты сипаттауға кепіл береді.

Жүргізілген байқау нәтижелері анықтамаларда, сондай-ақ кино-, бейне-, аудиожазбалармен фиксацияланады. Қорытынды анықтамада байқау жүргізілген оқиғаның дамуы, байқалушы адамның өзге адамдармен байланыстары және өзге мән-жайлар көрсетіледі.

Байқау нәтижелері алдын ала тергеу органдарына немесе сотқа берілген жағдайда ақпараттық техникалық қайнар көздерінің объективтілігі және дұрыстығы жекелеген тергеу іс-әрекеттері кезінде (мысалы, жедел қызметкерден іс бойынша куә ретінде жауап алу кезінде, онымен және сезікті арасында беттестіру өткізу кезінде) немесе сот сараптамасы кезінде тексерілуі мүмкін (мысалы, жәбірленушіден ақша талап етуші байқалушы адамның телефон сөйлесулерінің магниттік жазбасына фоноскопиялық сараптама жүргізеді. Мұнда маман нақты адамдардың сөйлесуі жазылғанын кейде толық анықтап қоймай, сондай-ақ сөйлесу жүргізілген жайдың негізгі сипаттамаларын, оның жанында интенсивті автомобильдік немесе темір жолдарының бар екендігін анықтай алады). Осының барлығы жиынтықта сотта ұсынылған ақпараттың объективтілігіне және дұрыстығына сендіре алады.

Белгілері бойынша адамдарды ұқсастыру нәтижесінде алынған деректер анықтамамен, рапортпен, деректемемен, адамдарды ұқсастыру актісімен, конфиденттің хабарламасымен, жедел-іздестіру әрекеттернің қатысушысы – азаматтың түсініктемесімен немесе азаматтың арызымен рәсімделуі мүмкін. Оған әрекеттің жүзеге асыру процесін фиксациялаған немесе оны жүргізу кезінде пайдаланылған аудио-, бейнежазбалар, фотосуреттер қоса тіркеледі.

Белгілері бойынша адамдарды ұқсастыру құжаттандырудың сипатына қарамастан тек дәлелдемелерді іздеу үшін, жолдарды, бағыттарды анықтау үшін маңызы бар ретінде пайдалануы мүмкін, бірақ дәлелдемелік маңызы бар іс жүзіндегі деректер ретінде емес.

Тұрғын-жайларды, ғимараттарды, жер учаскелерін және көлік құралдарын жасырын тексеру нәтижелері жедел қызметкердің анықтамасы түріндегі құжаттандырылады. Анықтама тексеру кезінде не табылғаны, жедел-техникалық құралдардың көмегімен фиксацияланған қылмыс белгілері және қылмысты анықтау мен ашу үшін маңызы бар өзге мән-жайлар, бейне- және аудиожазуларды, кино- және фототүсірілімдерді пайдалану, арнаулы химиялық заттарды қолдану; алынған заттар мен құжаттар көрсетіледі. Анықтама қылмыстық іс жүргізу дәлелдеуі кезінде өзге құжат ретінде пайдаланылуы мүмкін. Ал, арнаулы техникалық құралдардың көмегімен ақпараттық-техникалық заттарға фиксацияланған деректер ҚР ҚІЖК-нің талаптарын сақтай отырып дәлелдемеге айналуы мүмкін.

Дата добавления: 2017-01-14