Гістарычныя асобы. Агінскі Міхал Казімір (1730—1800) — вялікі гетман літоўскі, мецэнат; па яго ініцыятыве пачалося будаўніцтва Агінскга канала

Агінскі Міхал Казімір (1730—1800) — вялікі гетман літоўскі, мецэнат; па яго ініцыятыве пачалося будаўніцтва Агінскга канала, вядомы як пісьменнік і кампазітар.

Агінскі Міхал Клеафас (1765—1833) —сусветнавядомы кампазітар, яго аўтарству належыць паланез «Развітанне з Радзімай».

Аляксей Міхайлавіч — маскоўскі цар падчас вайны Рэчы Паспалітай і Расіі, па яго загаду сотні тысяч беларусаў былі пераселены ў Масковію.

Баторый Стэфан(1533—1586) — дзяржаўны дзеяч, палкаводзец, вялікі князь, першы кароль Рэчы Паспалітай.

Іван ІV (Грозны, Жахлівы) — маскоўскі цар падчас Лівонскай вайны.

Касцюшка Андрэй Тадэвуш Банавентура(1745—1817) — палітычны і ваенны дзеяч Рэчы Паспалітай, кіраўнік нацыянальна-вызваленчага паўстання 1794 г., зрабіў важкі ўклад у барацьбу за незалежнасць ЗША.

Кацярына ІІ — расійская імператрыца падчас падзелаў Рэчы Паспалітай.

Кунцэвіч Іасафат (1580—1623) — уніяцкі царкоўна-палітычны дзеяч ВКЛ, жорсткі змагар супраць праваслаўя, з-за чаго і быў забіты, таму ў 1867 г. папа Пій ІХ абвясціў Кунцэвіча святым.

Лышчынскі Казімір (каля 1634—1689) — беларускі мысляр-атэіст, напісаў філасофскі трактат «Аб неіснаванні бога».

Панятоўскі Станіслаў Аўгуст (1732—1798) — апошні кароль Рэчы Паспалітай (1764— 1795 гг.)

Пацей Іпацій (1541—1613) — адзін з арганізатараў і ідэйных натхняльнікаў Брэсцкай уніі.

Пётр І — расійскі цар падчас Паўночнай вайны, калі быў падзарваны Сафійскі сабор.

Полацкі Семяон (1629—1680) — беларускі і рускі пісьменнік, філософ-асветнік, педагог, тэолаг, грамадскі і царкоўны дзеяч.

Радзiвiл Мiкалай Чорны (1515—1565) — буйны магнат, вiленскi ваявода, канцлер, тагачасны некаранаваны ўладар Вялiкага княства Лiтоўскага.

Радзівіл Караль Станіслаў («пане Каханку», 1734—1790) — дзяржаўны дзеяч ВКЛ, найбагацейшы магнат Рэчы Паспалітай, вядомы сваімі баляваннямі. Даходы яго перавышалі гадавы бюджэт Рэчы Паспалітай.

Радзівіл Міхаіл Казімір (Рыбанька, 1702—1762) — дзяржаўны і ваенны дзеяч ВКЛ, мецэнат, заснавальнік фабрыкі шаўковых паясоў у Слуцку і іншых мануфактур.

Радзівіл Францішка Уршуля (1705—1753) — пісьменніца, педагог, кіраўніца Нясвіжскага тэатра; вядома вершамі і п’есамі.

Радзівіл Януш(1612—1655) — дзяржаўны і ваенны дзеяч ВКЛ.

Сапега Леў (1557—1633) — палітычны, грамадскі і ваенны дзеяч ВКЛ, дыпламат, мысліцель, канцлер, а з 1625 г. — гетман ВКЛ; удзельнічаў у стварэнні Трэцяга Статута 1588 г.

Семяновіч Казімір (каля 1600 — пасля 1651) — інжынер і тэарэтык артылерыі, мысліцель-гуманіст, першы стваральнік праекта шматступеньчатай ракеты, выдаў кнігу «Вялікае мастацтва артылерыі» (Амстэрдам, 1650 г.)

Скарга Пётр (1536—1612) — рэлігійны і палітычны дзеяч Рэчы Паспалітай, ідэолаг контррэфармацыі, адзін з прапагандыстаў і ініцыятараў Брэсцкай уніі.

Сматрыцкі Мялецій (1572—1630) — грамадска-палітычны і царкоўны праваслаўны дзеяч, пісьменнік і публіцыст, філолаг і педагог; шырокую вядомасць атрымала яго «Граматыка» (1619), у якой абагульнены правілы і законы тагачасных моўных нормаў.

Сувораў Аляксандр — палкаводзец расійскай арміі падчас падзелаў Рэчы Паспалітай, уганараваны званнем фельдмаршала за падаўленне паўстання 1794 г.

Тызенгаўз Антоній (1733—1785) — палітычны і грамадскі дзеяч, асветнік, адкрывальнік шматлікіх навучальных устаноў і устаноў культуры.

Філіповіч Афанасій (1597—1648) — пісьменнік-публіцыст, палітычны і царкоўны праваслаўны дзеяч; найбольш вядомы па зборніку публіцыстыкі «Дыярыуш» («Дзённік», 1646).

Хмяльніцкі Багдан — кіраўнік паўстання ўкраінскіх казакаў за нацыянальную і сацыяльную свабоду.

Ясінскі Якуб (1761—1794) — паэт-рэвалюцыянер, генерал войск Рэчы Паспалітай, удзельнік паўстання 1794 г. (кіраваў рухам інсургентаў на Літве і Беларусі).

Дата добавления: 2015-06-25